IPO – قانداي دا ءبىر كومپانيانىڭ ءوز اكتسيالارىن جالپىعا ۇسىنۋى. جاريا ورنالاستىرۋدىڭ نەگىزگى سەبەپتەرى – جوبالاردى قارجىلاندىرۋ جانە كومپانيانىڭ ودان ءارى ءوسۋىن قامتاماسىز ەتۋ, مىندەتتەمەلەردى ءارتاراپتاندىرۋ. سونىڭ ىشىندە ەڭ باستىسى – سول مەكەمەگە كاپيتال تارتۋ ءۇشىن وتكىزىلەدى.
سەسسيانى ۇيىمداستىرۋشىلار استانا حالىقارالىق قارجى ورتالىعى بيرجاسىندا اكتسيا ورنالاستىرۋ جايىن قاتىسۋشىلارعا ءتۇسىندىردى. مامانداردىڭ ايتۋىنشا, Astana International Exchange بيرجاسىندا اكتسيانى اشىق ورنالاستىرۋ ءۇشىن كومپانيالاردا ەڭ الدىمەن اۋديتتەلگەن قارجىلىق ەسەبى بولۋى كەرەك. سونداي-اق اۋديت جۇرگىزگەن كومپانيالاردىڭ AIX تالاپتارىنا سايكەس كەلەتىندىگىنە, اكتسيالاردىڭ ەڭ از كولەمى ەركىن اينالىمىندا بار ەكەندىگىنە كوز جەتكىزىپ العانى ءجون جانە ۇسىنىستىڭ كولەمى كەم دەگەندە 1 ملن اقش دوللارىن قۇراۋى قاجەت. «كەز كەلگەن كومپانيا العا ۇمتىلۋدى, وركەندەۋدى قالايدى. IPO دا – كومپانيانى العا سۇيرەيتىن تەتىكتىڭ ءبىرى. ەگەر كومپانيا باسشىلىعى وزدەرىنىڭ نارىقتاعى بولاشاعىنا سەنىمدى بولسا, وندا IPO باسقا كومپانيالارعا ساتۋدان گورى اكتسيونەرلەر ءۇشىن ءتيىمدى بولۋى مۇمكىن. جەكە ينۆەستورلاعا قاراعاندا IPO مەنەدجمەنتكە كوپ قاراجات جيناۋعا مۇمكىندىك بەرەدى. دەگەنمەن بيزنەستىڭ جالپى باعاسى جوعارى, ويتكەنى كەز كەلگەن ادام اكتسيالاردى ساتىپ الا الادى», دەيدى Astana International Exchange نارىقتى دامىتۋ دەپارتامەنتىنىڭ ديرەكتورى اسەل مۇقاجانوۆا.
اكتسيالارىن جارياعا ۇسىنباس بۇرىن سول كومپانيانىڭ باسشىلىعى دا, قىزمەتكەرلەرى دە وعان دايىن بولۋى قاجەت. «IPO-نى ءتيىمدى جۇرگىزۋدىڭ ماڭىزدى شارتتارى كوپ. وعان دايىندىق جانە وتكىزۋ ۇدەرىسى جوعارى جاۋاپكەرشىلىك جۇكتەيدى. كومپانيالار وعان ۇلكەن دايىندىقپەن كەلۋى كەرەك. كومپانيانىڭ تاجىريبەلى باسقارۋ توبى, وڭ قارجىلىق ناتيجەسى, وزگەلەردەن ەرەكشەلەنىپ تۇراتىنى ساپالى ءونىمى مەن قىزمەتى, ناقتى بيزنەس-جوسپارى, سەنىمدى قارجىلىق, وپەراتسيالىق باقىلاۋى بولۋى قاجەت. جوعارى بىلىكتى قىزمەتكەرلەرى مەن جوعارى ساپالى ادامي كاپيتالدىڭ بولۋى دا – اكتسيا ساتىلىمىندا جوعارى ناتيجەگە جەتۋدىڭ باستى كەپىلى», دەيدى احقو ۇزدىكسىز كاسىبي دامۋ بيۋروسىنىڭ دامۋ باعىتىنىڭ جەتەكشىسى ەلەونورا كۋسەمباەۆا.
قىزمەتكەرلەردى وقىتۋ مەن بىلىكتىلىكتى ارتتىرۋ ستراتەگياسىن قۇرۋ كەزىندە احقو ۇزدىكسىز كاسىبي دامۋ بيۋروسى كاسىبي سەرتيفيكاتتاۋ ءتاسىلىن – ءبىلىم مەن داعدىلاردى حالىقارالىق دەڭگەيدە راستاۋدى ۇسىندى. ال ارنايى سەرتيفيكاتتاۋدان وتكەن ماماندار كومپانياعا ەڭ جاقسى حالىقارالىق ستاندارتتار مەن تاجىريبەلەردى ەنگىزۋگە جانە نارىقتاعى كومپانيانىڭ باسەكەگە قابىلەتتىلىگىن ارتتىرۋعا ىقپال ەتەدى.
ءىرو وتكىزۋدىڭ ءبىر ماقساتى كومپانياعا ينۆەستور تارتۋ دەپ جوعارىدا ايتتىق. وزىنە ينۆەستورلاردىڭ كوڭىلىن اۋدارعىسى كەلەتىن كومپانيانىڭ اۋديتتىك قارجى ەسەبى دە ءمىنسىز بولۋى قاجەت. «كوپشىلىككە اكتسيالارىن ۇسىنعىسى كەلەتىن كومپانيا قارجىلىق ەسەپتىلىگىنە مۇقيات بولعان ءجون. بۇل بۋحگالتەرلىك ەسەپ پەن قارجىلىق ەسەپتىلىك ماسەلەلەرىمەن شەكتەلمەيدى. ونىڭ ەڭ كۇردەلىسى – نەگىزگى فۋنكتسيالاردى تالداۋ جانە كومپانيانى جاريالىلىققا دايىنداۋ ءۇشىن قانداي سالالاردى قۇرۋ كەرەك, قاي سالانى كەڭەيتۋ قاجەت – وسىنى انىقتاپ العان ابزال», دەيدى احقو ۇزدىكسىز كاسىبي دامۋ بيۋروسىنىڭ, Develop باعىتىنىڭ جەتەكشىسى اسەل مۇساعۇل.
ساراپشىلاردىڭ پىكىرىنشە, كومپانيالار مۇددەلى تاراپتاردىڭ قاجەتتىلىگىن قاناعاتتاندىرۋ ءۇشىن ىشكى باعالاۋ جۇرگىزۋى كەرەك. بۇل تالاپتارعا دەرەكتەردىڭ اشىقتىعى, بيۋدجەتتەر مەن بولجامداردى قاتاڭ تالداۋى كىرەدى, ياعني ىشكى اۋديت قىزمەتىن كۇشەيتۋ – IPO ءساتتى ءوتۋىنىڭ تاعى ءبىر العىشارتى. «ينۆەستيتسيالاردى باسقارۋ پروتسەسىن جەتىلدىرۋ كەزىندە قارجىلاندىرۋدىڭ جالپى ستراتەگياسىن, ونىڭ ىشىندە ماقساتتى كاپيتال قۇرىلىمىن جانە الەۋەتتى اكتسيونەرلەر تولەمدەرى ستراتەگياسىن, ديۆيدەندتىك ساياسات پەن اكتسيالاردى ساتىپ الۋ باعدارلامالارىن ەسكەرۋ ماڭىزدى. نەگىزىنەن تابىستى كومپانيالار تاۋەكەلدەردى باسقارۋدىڭ قۇندىلىعىن جاقسى تۇسىنەدى. سوڭعى ونجىلدىقتاعى الەمدىك قارجىلىق كۇيزەلىستەر ينۆەستورلاردى, رەتتەۋشىلەردى, باسقا دا مۇددەلى تاراپتاردى تاۋەكەلدەرگە باسقاشا قاراۋعا ۇيرەتتى, ولار مەملەكەتتىك كومپانيالاردىڭ تاجىريبەسىنە دە مۇقيات قاراۋعا ماشىقتاندى», دەپ ءسوزىن قورىتتى ءا.مۇساعۇل.
ال ستراتەگيالىق ماسەلەلەر جونىندەگى ديرەكتور, «استانا» حالىقارالىق قارجى ورتالىعىنىڭ عىلىمي كەڭەسىنىڭ توراعاسى جانە كورپوراتيۆتى باسقارۋدىڭ توراعاسى, پروفەسسور الەكساندر ۆان دە پۋت IPO جوسپارلاپ وتىرعان كومپانيالار دايىندىقتى كەمى ءبىر جىل بۇرىن باستاۋى كەرەكتىگىن ەسكەرتتى. ويتكەنى بۇل ادام رەسۋرستارىن باسقارۋ جانە جوبالاردى باسقارۋ كومپانيالاردى ترانسفورماتسيالاۋ مەن IPO-عا عانا تىرەلىپ وتىرعان جوق. بۇل – كورپوراتيۆتىك باسقارۋدى جەتىلدىرۋدىڭ, ودان ءارى تۇراقتى دامۋدىڭ ماڭىزدى تەتىگى.
سەسسيا سوڭىندا ۇيىمداستىرۋشىلار ۇزدىكسىز بىلىكتىلىكتى ارتتىرۋ بيۋروسىنىڭ «بولاشاق ۋنيۆەرسيتەتى» اتتى جاڭا جوباسىن ۇسىنىپ, وندا ءارتۇرلى باعىتتار بويىنشا وفلاين, ونلاين جانە ۆيرتۋالدى كۋرستار مەن ترەنينگتەر, دايىندىق باعدارلامالارى, بىلىكتىلىكتى ارتتىرۋعا ارنالعان IPO-عا ترانسفورماتسيالىق دايىندىق باعدارلاماسى بويىنشا سەرتيفيكاتتاۋ وتكىزىلەتىنىن جەتكىزدى.
