قازاق عالىمى مۇحتار وتەلباەۆ «مىڭجىلدىق پروبلەمالارى» ساندارىنا ەنگەن ەڭ كۇردەلى جەتى ماتەماتيكالىق ەسەپتىڭ ءبىرىن شەشتى. بۇل تۋرالى RAS.KZ حابارلادى.
«ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى ەۋرازيا ماتەماتيكا ينستيتۋتىنىڭ ديرەكتورى, قازاقستان عىلىم اكادەمياسىنىڭ اكادەميگى, فيزيكا-ماتەماتيكا عىلىمدارىنىڭ دوكتورى, پروفەسسور مۇحتارباي وتەلباەۆ ەڭ كۇردەلى جەتى ماتەماتيكالىق ەسەپتىڭ ءبىرى بولىپ تابىلاتىن, كلەي ماتەماتيكا ينستيتۋتى 2000 جىلدان بەرى شەشىمى ءۇشىن ءبىر ميلليون دوللار كولەمىندە سىيلىق تاعايىنداپ وتىرعان ماتەماتيكالىق «مىڭجىلدىق پروبلەمالارىنىڭ» ءبىرىن شەشۋگە قول جەتكىزدى», - دەلىنگەن حابارلامادا.
مۇحتار وتەلباەۆ بۇل ەسەپتىڭ شەشۋىن ءوزىنىڭ «ناۆە-ستوكس تەڭدەۋىنىڭ كۇشتى شەشۋىنىڭ ورىن الۋى» دەگەن عىلىمي ەڭبەگىندە جاريالادى. ماقالانىڭ تولىق نۇسقاسى «ماتەماتيچەسكي جۋرنالدا» جارىق كوردى.
«جاريالانىمنىڭ ماڭىزدىلىعى سوندا, مۇنداعى پروبلەما «مىڭجىلدىقتىڭ پروبلەمالارى» دەپ ەڭ كۇردەلى جەتى ەسەپتىڭ ءبىرى بولىپ تابىلادى. اتاپ ءوتۋىمىز كەرەك, كلەي ماتەماتيكالىق ينستيتۋتى 2000 جىلدان بەرى بۇل پروبلەمالاردىڭ ءاربىرىنىڭ شەشۋشى ءۇشىن 1 ملن. دوللار سىيلىق تاعايىنداپ كەلەدى. قازىرگى تاڭدا مىڭجىلدىق پروبلەمالارىنىڭ بىرەۋى عانا (پۋانكارە گيپوتەزاسى) شەشىلدى. ونى شەشكەنى ءۇشىن گريگوري پەرەلمانعا فيلدس سىيلىعى بەرىلدى», - دەلىنگەن ەۋرازيا ۇلتتىق ۋنيۆەرسيتەتىنىڭ حابارلاماسىندا.
ەسكە سالا كەتەيىك, مۇحتارباي وتەلباەۆ وپەراتورلاردىڭ سپەكترلى تەورياسىن, وپەراتورلاردىڭ جيىرىلۋ جانە كەڭەيۋ تەورياسىن, فۋنكتسيونالدى كەڭىستىك قۇيىلىمى تەورياسىن, جاقىنداسۋ, ەسەپتەۋ ماتەماتيكاسى مەن قايتارما مىندەتتەر تەورياسىن زەرتتەيدى.
بۇدان باسقا, ول «التىن ادام» كونكۋرسىنىڭ 2002 جىلعى «جىلدىڭ عىلىم قايراتكەرى» اتاعىنىڭ يەگەرى, 2004-2005 جىلدارى عىلىم مەن تەحنيكانى دامىتۋعا قوسقان وراسان زور ۇلەسى ءۇشىن عالىمدار مەن ماماندارعا ارنالعان مەملەكەتتىك عىلىمي ستيپەنديا الدى. سول سياقتى ەكونوميكالىق ارىپتەستىكتى ۇيىمداستىرۋ سىيلىعىنىڭ 2004 جىلعى «عىلىم مەن تەحنولوگيا» نوميناتسياسىنىڭ جانە قازاقستاننىڭ عىلىم مەن تەحنيكا سالاسىنداعى مەملكەتتىك سىيلىعىنىڭ لاۋرەاتى. ءبىلىم جانە عىلىم مينيسترلىگىنىڭ «ۇزدىك جوعارى وقۋ ورنى وقىتۋشىسى».
مۇرات ايتقوجا.
دەرەككوز: Ras.kz.
