ۆەلوتۋر – تۇركيا ۆەلوسيپەد سپورتشىلارى مەن باسقا مەملەكەت وكىلدەرىنىڭ بىرلەسە ۇيىمداستىرىپ وتىرعان العاشقى ءىسشاراسى.
اتالعان شارا قازاقستان رەسپۋبليكاسىنىڭ 30 جىلدىعىنا ورايلاستىرىلدى. ۆەلوتۋر انكارا قالاسىنىڭ ۇمىتكوي اۋدانىنان باستاۋ الىپ, تۇركيا رەسپۋبليكاسىنىڭ نەگىزىن قالاۋشى تۇڭعىش پرەزيدەنتى مۇستافا كەمال اتاتۇرىكتىڭ كەسەنەسى – «انىتكابير» تاريحي-مادەني كەشەنىنە دەيىن جالعاستى. تۋر سوڭىندا سپورتشىلار اتاتۇرىككە تاعىزىم ەتىپ, انىتكابيردى زيارات ەتىپ شىقتى. ءوز كەگىندە, بۇل ۆەلوتۋردىڭ اتاتۇرىك ماۆزولەيىنە دەيىنگى باعىتتا ۇيىمداستىرىلعان العاشقى تۋر ەكەندىگىن اتاپ وتكەن ءجون.
تۇرىك ەلىنىڭ باس قالاسىندا وتكەن ۆەلوتۋرعا 50-دەن استام ادام قاتىستى. ۆەلوتۋرعا ەلشى ابزال ساپاربەك ۇلى باستاعان ديپلوماتتار توبى, كاسىپقوي سپورتشىلار, ستۋدەنتتەر مەن اۋەسقوي ۆەلوسپورتشىلار جانە تۇرىكتىڭ ۇلتتىق سپورتشىسى احمەت قاھارمەن اقيۋرەك پەن قازاقستاندىق سپورتشى دامير كۋشەەۆ قاتىستى. ىسشاراعا قاتىسۋشىلاردىڭ قاۋىپسىزدىگى تۇركيانىڭ پوليتسيا باس باسقارماسى تاراپىنان قامتاماسىز ەتىلدى.
ەسكە سالا كەتەتىن بولساق, قازاق-تۇرىك باۋىرلاستىعى مەن دوستىعىن بەينەلەيتىن جوبا اياسىندا قازاقستاندىق اۋەسقوي ۆەلوسپورتشى دامير كۋشەەۆ 25 ماۋسىمدا تۇركيانى ۆەلوسيپەدپەن ارالاپ ءوتۋ ماقساتىندا ىستامبۇلدان اتتانعان بولاتىن.
قازاقستان ازاماتى ءبىر اي بويى ىستامبۇل-انتاليا-انكارا باعىتىندا تۇركيانىڭ قالالارىن ۆەلوسيپەدپەن ارالاپ كەلەدى. الدىمەن سپورتشى ىستامبۇل-بيلەجيك باعىتىنا بەت الدى. سوسىن كۋتاحيا, افيونكاراحيسار, بۋردۋر, انتاليا, كاش, فەتحيەنى ءوتىپ, پولاتلىعا تابان تىرەدى. ساپارى بارىسىندا تەمىر تۇلپار مىنگەن جيھانكەزدى قازاقستان ەلشىلىگىنىڭ قولداۋىمەن جەرگىلىكتى اكىمشىلىكتەر سالتاناتتى راسىممەن قارسى الىپ, قاۋىپسىزدىگىن قامتاماسىز ەتتى. سپورتشىنىڭ ايتۋىنشا, تۇركيانىڭ شارتارابىنداعى تۇرعىندار قازاقستاندىقتى جىلى قوناقجايلىلىقپەن قارسى العان. تۋىستاس ەلدەگى ۆەلوساپار ەل استاناسىنداعى ۆەلوتۋرمەن ءوز مارەسىنە جەتتى.
دامير كۋشەەۆ بۇل ۆەلوساپارىن قازاقستان تاۋەلسىزدىگىنىڭ 30 جىلىدىعىنا ارناعان. سپورتشى تۇركيانىڭ ەلىمىزدىڭ تاۋەلسىزدىگىن مويىنداعان العاشقى ەل بولۋىنا بايلانىستى كەزەكتى ۆەلوساپارىن تۇركيا ايماعىندا وتكىزۋگە بەل بۋعاندىعىن ايتادى.
تاعى قوسا كەتەتىن جايت, تۇركيا اۋماعىنداعى دامير كۋشەەۆتىڭ ۆەلوتۋرى ەلىمىزدىڭ تاۋەلسىزدىگىنىڭ 30 جىلدىعىنا وراي 30 كۇن بويى جالعاستى.
