قوعامى قايىرىمدى, ورتاسى مەيىرىمدى بولسا, جەتىم بالا دا, باعۋسىز قارت تا جالعىزسىرامايدى. اۋىر تاعدىر اينالاداعى جانداردىڭ شۋاعىنان جىلىنىپ, كوڭىل سارايى نۇرلانا تۇسەدى. ماڭعىستاۋلىق ونەرپازدار ەل اراسىنداعى جەتىمدىكتەن جوق-جىتىكتىككە دۋشار بولعان بالالارعا قولداۋ كورسەتۋدى قولعا الدى.
قوعامى قايىرىمدى, ورتاسى مەيىرىمدى بولسا, جەتىم بالا دا, باعۋسىز قارت تا جالعىزسىرامايدى. اۋىر تاعدىر اينالاداعى جانداردىڭ شۋاعىنان جىلىنىپ, كوڭىل سارايى نۇرلانا تۇسەدى. ماڭعىستاۋلىق ونەرپازدار ەل اراسىنداعى جەتىمدىكتەن جوق-جىتىكتىككە دۋشار بولعان بالالارعا قولداۋ كورسەتۋدى قولعا الدى.
ماڭعىستاۋ وبلىستىق مادەنيەت باسقارماسى باسشىلىعىنىڭ ۇيىمداستىرۋىمەن وتكەن قايىرىمدىلىق شاراسى «سەن جالعىز ەمەسسىڭ» دەپ اتالدى. وبلىستىڭ جەتى اۋدان, قالالارىنان جينالعان 7 وقۋشىنىڭ ءبىرى ءانشى بولسا, ءبىرى ءبيشى, ءبىرى سپورتشى, ەندى ءبىرى وقۋ وزاتى. جاس ومىرلەرىنە ونەر مەن ءبىلىمدى سەرىك ەتۋدى ماقسات تۇتىپ, جاستايىنان ىزگىلىككە ۇمتىلعان بۇل بالالار اتا-انا جىلۋىنان ەرتە ايىرىلعاندار.
– كۇندەلىكتى قىم-قۋىت تىرلىگىمىزدە, جۇمىس بارىسىندا جەتىم بالالاردى جادىمىزدان شىعارماۋعا ءتيىسپىز. اتا-انا مەيىرىمىنەن ايىرىلعانمەن, ولار قوعام جىلۋىنان ايىرىلماۋى قاجەت. سوندىقتان, بيىلدان باستاپ بالالاردىڭ قاسىنان تابىلىپ, ومىرىنە ءسال دە بولسا قۋانىش سىيلاۋ ماقساتىندا وسى شارانى ۇيىمداستىرۋدى ماقسات ەتتىك, – دەيدى ماڭعىستاۋ وبلىستىق مادەنيەت باسقارماسىنىڭ باسشىسى بەكبول بازارباەۆ.
بالالارعا جاڭا جىلدىق سىيلىقتارمەن بىرگە, نوۋتبۋكتار تارتۋ ەتىلدى. ءار بالاعا سىيلىقتى ءوزىنىڭ بەيىمىنە ساي بەلگىلى ونەر ادامدارى مەن سپورتشىلار, سونداي-اق, مەملەكەتتىك قىزمەتكەرلەر تابىستادى.
كىم بىلگەن, بۇل جەتكىنشەكتەردىڭ اتا-اناسى بار بالالاردىڭ قولىنداعى نوۋتبۋكقا قىزىعىپ, ءبىر ۇستاپ كورسەم دەگەن ارماندارى بولعان دا شىعار. ەندى ولار قاجەت مالىمەتتى ءوز كومپيۋتەرىنەن ىزدەپ, تاباتىن بولادى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
