قازاقستان مۇسىلماندارى ءدىني باسقارماسى ۇسىنعان مالىمەتكە سايكەس, ەل بويىنشا 2500 ادام ونلاين قۇرباندىق شالۋعا تاپسىرىس بەرگەن. بۇل تەك تۇسكە دەيىنگى عانا كورسەتكىش. ساقتىق شارالارىن ۇستانعان حالىق قۇرباندىق شالۋدىڭ جاڭا فورماتىن تاڭداۋ ۇستىندە.ء ار تاپسىرىستى قازاقستان مۇسىلماندارى ءدىني باسقارماسىنىڭ وكىلدەرى رەسمي تىركەپ, ونىڭ ورىندالۋىن باسقارما ماماندارى ءجىتى قاداعالايدى.
بۇگىن ەلىمىزدىڭ باس ءمۇفتيى ەلوردا ماڭىنداعى قۇرباندىق شالۋعا ارنالعان ورىنداردى ارالاپ شىقتى.
«قازاق ەلى ارقاشان دا قۇرباندىق شالعان, بۇل داستۇرىمىزگە ساي قالىپتاسقان دۇنيە. كەز كەلگەن كىسى ساپاردا نەمەسە سىرتتا جۇرسە دە بۇل ءداستۇردى ۇمىتپاعان. بىراق قازىرگى ۋاقىتتا قۇربان شالۋ قالا تۇرعىندارىنا قيىنعا سوعادى, ياعني قالا سىرتىنداعى مال بازارعا بارىپ, مال تاڭداۋ كەرەك. وسى ورايدا قۇرباندىق شالىپ, قول ۇشىن سوزامىن دەگەن جاندار ونى ونلاين تۇردە ىسكە اسىرا الادى. سونىمەن قاتار ونلاين قۇرباندىق شالۋ ءداستۇرىن ءبىز ءالى دە جەتىلدىرە تۇسەمىز جانە ونى الداعى ۋاقىتتا تەك قۇربان ايت مەيرامىندا عانا ەمەس كەز كەلگەن ساتتە قولدانۋ مۇمكىندىگى بولادى دەگەن ۇمىتتەمىز. بايقاعانىمىزداي ونلاين قۇرباندىققا تاپسىرىس بەرۋشىلەردىڭ سانى ارتىپ كەلەدى», دەدى ەلىمىزدىڭ باس ءمۇفتيى ناۋرىزباي قاجى تاعان ۇلى.
ونىڭ ايتۋىنشا, ونلاين قۇرباندىق شالۋعا تاپسىرىس كوبىنەسە نۇر-سۇلتان مەن الماتى قالالارىنان ءتۇسىپ جاتىر.
ايتا كەتسەك, ونلاين قۇرباندىق شالۋ تاجىريبەسى تۇركيا, ءباا جانە مالايزيا ەلدەرىندە كەڭىنەن تارالعان.
