اقتاۋ قالاسىنىڭ تۇرعىنى باقتىگۇل كابۋلدينا پەريناتالدىق ورتالىققا جەدەل جاردەم بريگاداسىمەن جەتكىزىلدى. جۇكتى ايەلدىڭ وكپەسى 70% زاقىمدالعاندىقتان, قۇرساقتاعى بالاعا جەتكىلىكتى وتتەگى بارماعان.
«باستاپقىدا مەن ۆيرۋسپەن ءوزىم كۇرەستىم. بىراق بۇل ۇلكەن قاتەلىك بولعانىن كەيىننەن ءتۇسىندىم. قۇرساعىمداعى بالانىڭ ءومىرى ءۇشىن قورىقتىم. ەنتىگۋ كۇشەيىپ, جۇرەگىم توقتاپ قالاتىنداي سەزىمدە بولدى. جاقىندارىم مەن نارەستەمدى ەندى كورمەيمىن دەپ ويلادىم. مەن جانە مەنىڭ بالام دارىگەرلەردىڭ ارقاسىندا امان قالدىق. پەريناتالدىق ورتالىقتىڭ دارىگەرلەرىنە العىسىمىز شەكسىز», دەيدى باقتىگۇل كابۋلدينا.
ءومىر ەسىگىن ەندى اشقان ءسابي باقتىگۇل كابۋلدينانىڭ بەسىنشى بالاسى. قازىر باتىر انا مەن بالانىڭ ومىرىنە قاۋىپ ءتونىپ تۇرعان جوق. بىرنەشە كۇننەن كەيىن ولار پەريناتالدى ورتالىقتان شىعارىلىپ, ۇيلەرىنە قايتادى.
ايتا كەتەيىك, وبلىستىق پەريناتالدىق ورتالىق بازاسىنداعى ينفەكتسيالىق بولىمشەدە 40 ايەل ەمدەلۋدە. ولاردىڭ 5-ءۋى جانساقتاۋ بولىمىنە اۋىستىرىلىپ, ءوجج اپپاراتىنا قوسىلعان.
دارىگەرلەر جۇكتىلىك رەسپيراتورلىق ۆيرۋستىق ينفەكتسيانىڭ قاۋپىن ارتتىراتىنىن ەسكە سالادى. سول سەبەپتەن, جۇكتى ايەلدەرگە كوروناۆيرۋستى جۇقتىرۋ مۇمكىندىگىن ازايتۋ ءۇشىن قاتاڭ وقشاۋلاۋ رەجيمىن ۇستانعان ءجون.
