ەلورداداعى باستى ماسەلە باسپانا ەكەنى تۇسىنىكتى. مۇندا قۇرىلىسى اياقتالىپ, قۇجاتى دايىن بولعان جاڭا ۇيگە اقشا سالعاننان گورى, قاڭقاسى ەندى كوتەرىلگەن نىسانعا اقشا سالعان الدەقايدا ارزان. مىسالى, ىرگەتاسى جاڭادان قالانعان تۇرعىن ۇيدەن ءبىر بولمەلى ءۇي العىڭىز كەلسە, ونىڭ باعاسى 10-12 ملن تەڭگە ارالىعىن قۇراۋى مۇمكىن. ال بۇل ءۇيدىڭ قۇرىلىسى اياقتالىپ, پايدالانۋعا بەرىلگەن كەزدە ونىڭ قۇنى بىردەن 14-16 ملن-عا شارىقتايدى. سوندىقتان دا حالىق جاڭادان سالىنىپ جاتقان تۇرعىن ۇيگە اقشا سالعاندى دۇرىس كورەدى. بىراق ۇيگە «ەرتە» قارجى قۇيۋدىڭ قيىندىعى سول, ءارتۇرلى جاعدايعا بايلانىستى قۇرىلىس ۋاقتىلى اياقتالماي نەمەسە ورتا جولدان توقتاپ قالۋى مۇمكىن. سوسىن جۇرەسىز جىلدار بويى ءۇيىڭىزدى سارىلا كۇتىپ.
كەزىندە قۇرىلىس جاپپاي جۇرگىزىلگەن ساتتە جۇرت الدى-ارتىنا قاراماي, ەلورداداعى نىساندارعا قارجى قۇيدى. كەيىن كوپتەگەن قۇرىلىس نىسانى توقتاپ قالىپ, نە اقشاسى, نە ءۇيى جوق قالعان ۇلەسكەرلەرگە مەملەكەت قول ۇشىن بەردى. بۇل جاعداي مەملەكەتكە دە جاقسى ساباق بولىپ, زاڭعا وزگەرتۋلەر ەنگىزدى. ەندى تەك ارنايى رۇقساتى بار, ءۇيدىڭ قاڭقاسىن كوتەرگەن قۇرىلىس سالۋشىلار عانا ۇلەسكەرلەردىڭ اقشاسىن تارتا الادى. زاڭ تىلىمەن ايتساق, «تۇرعىن ءۇي قۇرىلىسىنا ۇلەستiك قاتىسۋ تۋرالى» قازاقستان رەسپۋبليكاسىنىڭ زاڭناماسىندا ۇلەسكەرلەردىڭ قاراجاتىن ءتيىستى رۇقساتسىز تارتۋعا تىيىم سالىنادى, بۇل رەتتە قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 320-بابى, سونداي-اق قازاقستان رەسپۋبليكاسى قىلمىستىق كودەكسىنىڭ 214-بابى بويىنشا كاسىپكەرلىك قىزمەتتىڭ تىيىم سالىنعان تۇرلەرىمەن اينالىسقانى ءۇشىن جاۋاپكەرشىلىك كوزدەلگەن».
بىراق زاڭدى قونىشىنان باسىپ, ەش رۇقساتى بولماسا دا حالىقتىڭ اقشاسىن قۇرىلىسقا پايدالانىپ وتىرعان كومپانيالار دا بار. جاقىندا ەلوردا اكىمدىگى سولاردىڭ ءتىزىمىن شىعارىپ, ەلگە قىراعى بولۋدى ەسكەرتتى. قالالىق ىشكى ساياسات باسقارماسىنىڭ جۋرناليستەرگە تاراتقان مالىمەتى بويىنشا باس قالاداعى رۇقساتسىز قۇرىلىس سالۋشىلاردىڭ ۇزىن-ىرعاسى 50-گە جۋىقتايدى. ونىڭ ءبارىن جىكتەپ جازۋ مۇمكىن دە ەمەس. بىراق سونىڭ ىشىندە حالىق اراسىندا تانىمال بىرقاتار تۇرعىن ءۇي كەشەنى مەن ونى سالىپ جاتقان كومپانيالاردى اتاپ وتەيىك: «ەكسپو-2017» كورمەسى اۋماعىنداعى «Expo new life» كوپ فۋنكتسيونالدى كەشەنى, 2-كەزەك (سالۋشى – «شانگ حي گرۋپپ» جشس), ەسىل اۋدانى, ش.ايتماتوۆ كوشەسى, ە10 كوشەسىنىڭ سولتۇستىگىندەگى «ايسافي» تك («كازكۋاتسەرۆيس 2050» جشس), ە 344 كوشەسى №5 ۋچاسكەدەگى «Gold Land» تك («Transcapital» جشس), الماتى اۋدانى ا كوشەسىندەگى «Sancy» تك (قۇرىلىس سالۋشى ساليموۆ س.س.), «لەيا station city», «لەيا سەۆەر», «لەيا زا رەكوي» («لەيا» جشس قۇرىلىس كومپانيالارى توبى) جانە «ەمير», «Qazanat river», «كاسپي-1,2 كەزەك», «بۇحار جىراۋ De Luxe», «وتان-2», «داۋلەتكەرەي», ت.ب تۇرعىن ءۇي كەشەندەرىن سالىپ جاتقاندار رۇقساتى جوق كومپانيالار قاتارىنان. «قولدانىستاعى زاڭنامانى اتتاپ ءوتىپ جاسالعان بارلىق مامىلە, ونىڭ ىشىندە الدىن الا برونداۋ شارتى, رەزەرۆتەۋ شارتى, ينۆەستيتسيالاۋ شارتى, تالاپ ەتۋ قۇقىعىن باسقاعا بەرۋ شارتى – بۇل كوپپاتەرلى تۇرعىن ءۇي كەشەندەرىنە جارامسىز بولىپ سانالادى. نۇر-سۇلتان قالاسىنىڭ اكىمدىگى تۇرعىنداردىڭ ءوز اقشاسىنا ساق بولۋىن جانە رۇقسات قۇجاتتارى بولماعان جاعدايدا تۇرعىن ءۇي ساتىپ الۋدان باس تارتۋ كەرەكتىگىن ەسكەرتەدى. ەگەر قۇرىلىس نىساندارىنا قاتىستى ماسەلەلەر تۋىنداسا, مىنا بايلانىس تەلەفوندارىنا حابارلاسۋعا بولادى: 8 (7172) 55-04-28, 55-04-30, 8-701-300-50-39» دەلىنگەن اكىمدىكتىڭ رەسمي سايتىنداعى مالىمەتتە.
جىل باسىنان بەرى نۇر-سۇلتان قالاسىندا تەك بەس قۇرىلىس كومپانياسىنا ۇلەسكەرلەردىڭ اقشاسىن تارتۋعا رۇقسات بەرىلگەن ەكەن. ولار: «ارۋ قالا-1» جانە حۋسەين بەن تالال كوشەسىنىڭ 7-ۋچاسكەسىندەگى ءۇيدىڭ 7-كەزەگى («ميلان-استانا» جشس); «Crocus 3» تك («BI EXPO City» جشس), «گراند تۇران» («Kaz industrial group» جشس) جانە «تۋرگو-4» تك («ميلان» جشس).
البەتتە, ەلوردادا ءۇي الۋشىلار دا, ءۇي سالۋشىلار دا كوپ. اسىرەسە باسپانا ىزدەگەندەرگە تاڭداۋ كوپ. بىراق جاڭادان سالىنىپ جاتقان ۇيلەرگە قارجى سالاردا سول كومپانيا تۋرالى اقپاراتتى جان-جاقتى سارالاپ, جەرگىلىكتى مەملەكەتتىك مەكەمەنىڭ ءتيىستى ماماندارىنان الدىن الا كەڭەس العان ارتىقتىق ەتپەيدى. بولاشاق پاتەرىڭىزگە كەدەرگىسىز, ابىگەرسىز قول جەتكىزۋ ءۇشىن ماماندار مىناداي كەڭەس بەرەدى: ەڭ الدىمەن كەلەشەك پاتەرىڭىزدى سالاتىن قۇرىلىس سالۋشى مەن جوبالاۋشىنىڭ زاڭدى اتاۋىن, مەكەنجايىن ناقتى ءبىلىپ العانىڭىز ءجون. كومپانيانىڭ مەملەكەتتىك تىركەۋدەن وتكەن-وتپەگەنىن انىقتاڭىز; كومپانيا قۇرىلتايشىلارى تۋرالى اقپارات جيناقتاڭىز; كومپانيانىڭ قۇزىرەتتى ورگانداردان بەرىلگەن ليتسەنزياسى مەن قۇرىلىس سالۋعا جانە ۇلەسكەرلەردىڭ اقشاسىن تارتۋعا رۇقساتى بار ما, جوق پا, تەكسەرىپ العانىڭىز ابزال; قۇرىلىس بوي كوتەرەتىن جەرگە رۇقساتى بار ما, ونى دا انىقتاۋ قاجەت; جەرگىلىكتى اكىمدىكتىڭ قۇرىلىس نىسانىنا بەرەتىن رۇقساتى بارىنان جانە قۇرىلىس كەزەڭدەرى مەن ونىڭ قاشان اياقتالاتىنىنان دا حاباردار بولىڭىز. ەڭ باستىسى, ءۇيدى سالۋشى كومپانيا «قارا تىزىمدە» بار-جوعىن مىندەتتى تۇردە انىقتاپ الىڭىز. بۇل تۋرالى اقپاراتتى وعان جاۋاپتى مەملەكەتتىك مەكەمەلەر مەن قالالىق اكىمدىكتىڭ رەسمي سايتىنان تابۋعا بولاتىنىن ەستەرىڭىزگە سالامىز.
