ۇلىبريتانيا بيلىگى مىندەتتى ماسكا تاعۋ رەجيمىن جانە الەۋمەتتىك اراقاشىقتىقتى ساقتاۋ ەرەجەسىن الىپ تاستاۋعا شەشىم قابىلدادى. سونىمەن قاتار ۇكىمەت ۇيدەن جۇمىس ىستەۋدى توقتاتىپ, قىزمەتكەرلەرگە كەڭسەدە جۇمىس ىستەۋگە رۇقسات بەردى.
الايدا پرەمەر-مينيستر بوريس دجونسون پاندەميا ءالى اياقتالماعانىن, سوعان بايلانىستى ابايلاپ ارەكەت ەتۋ كەرەك ەكەنىن ەسكەرتتى. ول قوعامدىق كولىكتەردە, ادام جاپپاي جينالاتىن ورىنداردا ماسكا تاعۋعا شاقىردى. سونداي-اق ۇكىمەت باسشىسى ويىن-ساۋىق ورىندارىنىڭ يەلەرىنەن كەلۋشىلەردىڭ كوروناۆيرۋسقا قارسى ۆاكتسيناتسيا سەرتيفيكاتىن تەكسەرۋدى سۇرادى.
ء«بىز دۇيسەنبى, 19 شىلدەدەن باستاپ, COVID-19 بولماعان ومىرگە بىردەن ورالا المايمىز», دەپ ءتۇسىندىردى دجونسون.
ۇلىبريتانيالىق عالىمداردىڭ ايتۋىنشا, ەلدە كوروناۆيرۋس تولقىنىنىڭ شىڭى تامىزدىڭ ورتاسىنا دەيىن كۇتىلمەيدى جانە تاۋلىگىنە 1-دەن 2 مىڭعا دەيىن ادام اۋرۋحاناعا ءتۇسۋى مۇمكىن. سونىمەن قاتار ماماندار كۇنىنە 100-200 ءولىم جاعدايى بولادى دەپ بولجايدى. تاۋلىگىنە جاڭا ناۋقاستاردىڭ سانى 100 مىڭعا جەتكەن جاعدايدا دا بيلىك اۋرۋحانالار مەن دارىگەرلەر ونى جەڭە الاتىنىنا سەنىمدى.
«ۆاكتسيناتسيا «قورعانىستى» قۇردى – بۇل جازعى تولقىنعا توتەپ بەرە الاتىنىمىزدى بىلدىرەدى», دەدى ۇلىبريتانيا دەنساۋلىق ساقتاۋ ءمينيسترى سادجيد دجاۆيد.
