2020 جىلى «وردا» جانە «ميراس» ۋنيۆەرسيتەتتەرىن تەكسەرۋ بارىسىندا ءبىلىم بەرۋ سالاسىنداعى زاڭنامانى ورەسكەل بۇزۋشىلىقتار انىقتالدى. ەكى جوعارى وقۋ ورنىنىڭ قىزمەتى توقتاتىلىپ, ولارعا انىقتالعان كەمشىلىكتەردى جويۋعا ۋاقىت بەرىلدى. الايدا جوعارى وقۋ ورىندارى ولارمەن جۇمىس جۇرگىزبەي, 8 اي كوميتەتتىڭ ليتسەنزيانى توقتاتا تۇرۋ تۋرالى شەشىمىنە شاعىمدانعان. سوڭىندا سوت كوميتەتتىڭ شەشىمىن ءوز كۇشىندە قالدىرۋ تۋرالى شەشىم قابىلدادى. ال ۋنيۆەرسيتەتتىڭ كوپتەگەن شاعىمى قاناعاتتاندىرىلمادى.
ەندى شىمكەنت قالاسىنىڭ مامانداندىرىلعان اۋدانارالىق اكىمشىلىك سوتىنىڭ 2021 جىلعى 1 شىلدەدەگى شەشىمىمەن اتالعان ەكى جوعارى وقۋ ورنى باس ليتسەنزياسىنان ايىرىلدى.
«وسى جىلدىڭ مامىر ايىندا قايتا تەكسەرۋ قورىتىندىسى بويىنشا قاتەلىكتەرمەن جۇمىس جۇرگىزىلمەگەنى انىقتالدى. ەڭ باستى ماسەلە كادرلاردى دايارلاۋ ساپاسىندا بولدى. مىسالى, «وردا» ۋنيۆەرسيتەتىندە وقيتىنداردىڭ 97%-ى شەكتى بالدان وتە المادى جانە وقۋ پروتسەسىندە الىنعان ءبىلىم مەن قۇزىرەتتەردىڭ جەتكىلىكتى دەڭگەيىن راستاي المادى. ەكى جوو-دا كەستەگە سايكەس جاپپاي ساباق وتكىزبەۋ فاكتىلەرى انىقتالدى. اعىمداعى باعالار قويىلماعان, بەكىتىلگەن كەستەگە سايكەس ەمتيحاندار وتكىزىلمەگەن, پاندەر تولىق كولەمدە وقىتىلماعان. ءتيىستى 5 كرەديتتىڭ ورنىنا تەك 3 كرەديت يگەرىلگەن. بارلىق ءپان وقۋ-ادىستەمەلىك ماتەريالدارمەن قامتاماسىز ەتىلمەگەن. وقىتۋشىلاردىڭ بەكىتىلگەن پەداگوگيكالىق جۇكتەمەسى مەن ونىڭ ناقتى ورىندالۋى اراسىندا ۇلكەن ايىرماشىلىق بار, ياعني وقىتۋشىدا جۇكتەمەدە بەلگىلى ءبىر ءپان بويىنشا ءدارىس وقۋ جوسپارلانۋى مۇمكىن, ال ءىس جۇزىندە ول ونى وقىمايدى», دەپ اتاپ ءوتتى قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ جوعارى جانە جوعارى وقۋ ورنىنان كەيىنگى ءبىلىم بەرۋ سالاسىنداعى باقىلاۋ باسقارماسىنىڭ باسشىسى ەلۆيرا ساپاربەكوۆا.
بۇعان دەيىن تاۋەلسىز ءبىلىم بەرۋ ساپاسىن قامتاماسىز ەتۋ اگەنتتىگى دە وسى جوعارى وقۋ ورىندارىن اككرەديتتەۋدى توقتاتتى. سوندىقتان بۇل ۋنيۆەرسيتەتتەر تۇلەكتەرگە ديپلوم بەرە المايدى. ديپلوم الۋ جانە وقۋدى اياقتاۋ ءۇشىن ستۋدەنتتەر باسقا ۋنيۆەرسيتەتتەرگە اۋىسۋى كەرەك. بۇل جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمدارى قىزمەتىنىڭ ۇلگىلىك قاعيدالارىندا كوزدەلگەن.
قر ء«بىلىم تۋرالى» زاڭىنا سايكەس ءبىلىم بەرۋ قىزمەتىمەن اينالىسۋعا ارنالعان ليتسەنزيادان ايىرىلعان نەمەسە ءبىلىم بەرۋ ۇيىمى تاراتىلعان كەزدە قۇرىلتايشى ءبىلىم الۋشىلاردى باسقا ءبىلىم بەرۋ ۇيىمدارىنا اۋىستىرۋ ءۇشىن شارالار قابىلدايدى.
