ەندى №1 كوپبەيىندى قالالىق اۋرۋحانا 9 شىلدەدەن باستاپ كوروناۆيرۋستىق ينفەكتسياسى بار پاتسيەنتتەردى قابىلدايدى. وندا 600 توسەك-ورىن ورنالاستىرىلعان. قوعامدىق دەنساۋلىق ساقتاۋ باسقارماسى بۇل شارا توسەك-ورىنداردىڭ جەتكىلىكسىز بولۋى سەبەپتى قابىلدانعانىمەن ءتۇسىندىردى.
«وكىنىشكە قاراي, ءبىز تاعى ءبىر قالالىق اۋرۋحانادا جوسپارلى گوسپيتاليزاتسيانى توقتاتۋعا, ونى كوۆيدتىك ستاتسيونارعا اينالدىرۋعا ءماجبۇر بولىپ وتىرمىز. سەبەبى ينفەكتسيا جۇقتىرعاندار سانى ازايماي تۇر. بارلىق پاتسيەنت اۋىستىرىلدى. الداعى ۋاقىتتا ولاردى قالانىڭ رەسپۋبليكالىق جانە ۆەدومستۆولىق كلينيكالارىنا جىبەرەمىز», دەپ ءتۇسىندىردى قالالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ.
وسىلايشا قالا تۇرعىندارىن اۋرۋحاناعا جاتقىزۋ ستاتسيونارلاردىڭ كەزەكشىلىگىنە سايكەس جۇرگىزىلەدى. سونداي-اق گينەكولوگيادان بولەك, تاۋلىك بويى جانە كۇندىزگى ستاتسيونارعا جوسپارلى جاتقىزۋدى №2 كوپبەيىندى قالالىق اۋرۋحانا دا ۋاقىتشا توقتاتادى.
وتكەن جازدا №1 كوپبەيىندى قالالىق اۋرۋحانا كۆي ناۋقاستارىن ەمدەيتىن ستاتسيونارعا اۋىستىرىلعان بولاتىن. ال تامىز ايىنىڭ سوڭىندا كوروناۆيرۋستىق ينفەكتسياسى بار سوڭعى ناۋقاس شىعارىلعان سوڭ بۇرىنعى پروفيلدىك جۇمىسىنا قايتا كىرىسكەن.
«ەپيدەميولوگيالىق جاعداي ناشارلاپ بارادى. سوڭعى اپتادا ءبىز ءۇش اۋرۋحانانى ينفەكتسيالىق ستاتسيونارعا اۋىستىردىق. قالاداعى ەپيدەميولوگيالىق جاعداي تۋرالى تۇرعىنداردىڭ «ينفەكتسيا جويىلدى, كارانتيندى ۇمىتۋعا بولادى» دەگەن پىكىرى بىزگە اۋىر تيەدى. ەلوردا ناۋرىز ايىنان بەرى «قىزىل» ايماقتان شىقپاعانىن تاعى دا ەسكە سالىپ وتەيىن. بۇل كورسەتكىش تۇرعىندارىمىزدىڭ سانيتارلىق تالاپتاردى ساقتاۋداعى جاۋاپكەرشىلىگىنە تىكەلەي بايلانىستى», دەپ تۇيىندەدى ۆەدومستۆو باسشىسى.
تيمۋر مۇراتوۆ تاۋلىگىنە اۋرۋحاناعا جاتقىزىلعانداردىڭ سانى 300 ادامعا جەتكەنىن اتاپ ءوتتى. ايتۋىنشا پاتسيەنتتەر اۋىر جانە وتە اۋىر كۇيدە ءتۇسىپ جاتىر.
ەستەرىڭىزگە سالا كەتەيىك, وتكەن دەمالىس كۇندەرى ينفەكتسيامەن اۋىرعانداردىڭ كوبەيۋىنە بايلانىستى قوسىمشا ەكى اۋرۋحانا ينفەكتسيالىق ستاتسيونارعا اۋىستىرىلعان: قالالىق پسيحيكالىق دەنساۋلىق ورتالىعى جانە قورعانىس مينيسترلىگىنىڭ باس اسكەري كلينيكالىق گوسپيتالى. ال جالپى توسەك-ورىن سانى: 300 ورىن.
نۇر-سۇلتان قالاسى بويىنشا 9 شىلدە كۇنى ينفەكتسيالىق ستاتسيونارلاردا بارلىعى 2 007 ناۋقاس جاتىر, بۇل توسەك جۇكتەمەسىنىڭ 81%-ىن قۇرايدى. ونىڭ ىشىندە 156 ادام (139 كۆي) رەانيماتسيا بولىمشەسىندە (جۇكتەمە 78%), 28 پاتسيەنت وكپەنى جاساندى جەلدەتۋ اپپاراتىندا جاتىر. بمسك ۇيىمدارىندا 7 088 ناۋقاس كوروناۆيرۋستىق ينفەكتسيا بويىنشا ەم الىپ جاتىر.
