ءبىلىم • 09 شىلدە، 2021

مەكتەپتەر ءداستۇرلى وقۋ فورماتىنا قاشان كوشەدى؟

«Nur Otan» پارتياسى جانىنداعى ءبىلىم مەن عىلىمدى دامىتۋ جونىندەگى رەسپۋبليكالىق قوعامدىق كەڭەستىڭ وتىرىسىندا جاڭا وقۋ جىلىن ۇيىمداستىرۋدىڭ وزەكتى ماسەلەلەرى تالقىلاندى، دەپ حابارلايدى Egemen.kz.

اسەل سارقىت

كەڭەس توراعاسى، پارلامەنت ءماجىلىسىنىڭ دەپۋتاتى جۇلدىز سۇلەيمەنوۆا بۇگىندە بىلىم بەرۋ سالاسىنداعى باسىم مىندەتتەردىڭ ءبىرى – وفلاين وقۋعا ورالۋ ەكەنىن اتاپ ءوتتى. ول ءۇشىن بارلىق سانيتارلىق-ەپيدەميولوگيالىق تالاپ قاتاڭ ساقتالۋى كەرەك.

باس مەملەكەتتىك سانيتارلىق دارىگەر ەرلان قياسوۆ مەكتەپتەر ءداستۇرلى وقىتۋ فورماتىنا كوشۋى ۇشىن پەداگوگتەر مەن قىزمەتكەرلەر 100% ۆاكتسينالاۋمەن قامتاماسىز ەتىتلۋى كەرەك ەكەنىن ايتتى.

«مەكتەپتەردەگى ساقتىق شارالارى بۇقارالىق ءىس-شارالاردى وتكىزۋگە تىيىم سالۋدى، سىنىپتاردى ءبولۋدى جانە ءارتۇرلى سىنىپتار ءۇشىن ۇزىلىس ۋاقىتىن بولۋدى، اسحانادا تاماقتانۋ بارىسىنا باقىلاۋدى كۇشەيتۋدى قامتيدى. جوعارى وقۋ ورىندارىنا كەلسەك، 18 جاستان اسقان ستۋدەنتتەر دە ۆاكتسينالانۋى نەمەسە قاشىقتان وقىتۋعا اۋىستىرىلۋى ءتيىس»، دەدى ە.قياسوۆ.

كەڭەس مۇشەسى، «رەسپۋبليكالىق فيزيكا-ماتەماتيكا مەكتەبى» كەاق باسقارما توراعاسى عابيت بەكاحمەتوۆ وقۋشىلاردى باستاۋىش، ورتا جانە جوعارى مەكتەپ بلوكتارىنا ءبولۋدى ۇسىندى. كوروناۆيرۋس انىقتالعان جاعدايدا، كارانتينگە بۇكىل مەكتەپ ەمەس، ناقتى بلوك جابىلادى.

ء«بىلىم بەرۋ مەكەمەلەرىنىڭ باسشىلارىنا وقۋشىلاردى فيزيكالىق تۇردە بولۋگە قاتىستى ناقتى ۇسىنىستار بەرۋ قاجەت. ماسەلەن، ولاردىڭ ۇزىلىسكە شىعاتىن ۋاقىتى عانا ەمەس، ءار بلوكتا ساباق باستالاتىن جانە اياقتالاتىن ۋاقىت تا ءارتۇرلى بولعانى ءجون»، دەدى ول.

كەڭەس مۇشەسى، الماتى مەملەكەتتىك ەنەرگەتيكا جانە ەلەكتروندىق تەحنولوگيالار كوللەدجىنىڭ ديرەكتورى تولەۋعالي تايتۋلەەۆ قوعامدىق كولىكتەردە باقىلاۋدى كۇشەيتۋ قاجەت دەپ سانايدى. ونىڭ ايتۋىنشا، وقۋشىلار مەن پەداگوگتەردىڭ ۆيرۋس جۇقتىرۋ قاۋپى ناق وسى قوعامدىق كولىكتەردە جوعارى.

ءبىلىم جانە عىلىم ۆيتسە-ءمينيسترى شولپان كارينوۆا ءوز كەزەگىندە 1 قىركۇيەكتەن باستاپ ەلىمىزدە 7 475 مەكتەپتى اشۋ جوسپارلانىپ وتىرعانىن جەتكىزدى. سونداي-اق «Nur Otan» پارتياسىنىڭ سايلاۋالدى باعدارلاماسىن ورىنداۋعا ارنالعان جول كارتاسى اياسىندا بيىل 200 مەكتەپ سالۋ جانە 1000 مەكتەپتى جاڭارتۋ مىندەتى تۇرعانىن اتاپ ءوتتى.

«289 مەكەمەگە كۇردەلى جوندەۋ جۇرگىزۋ، بىرقاتار مەكتەپتەردە جيھازداردى جاڭارتۋ، جاڭا پاندىك سىنىپتاردى اشۋ، كىتاپحانالار مەن اسحانالاردى جاڭعىرتۋ جوسپارلانعان»، دەدى ش.كارينوۆا.

وتىرىس سوڭىندا وقۋشىلاردىڭ ۇزاق ۋاقىت ونلاين فورماتتا وقۋىنا بايلانىستى ورىن العان ولقىلىقتاردى تالداۋ جانە ولاردىڭ ورنىن تولتىرۋ ءۇشىن كەشەندى باعدارلاما قابىلداۋعا قاتىستى بىلىم جانە عىلىم مينيسترلىگىنە بىرقاتار ۇسىنىم ازىرلەندى. كەڭەس مۇشەلەرى پەداگوگ تاپشىلىعىن تەحنيكالىق مامانداردى تارتۋ ارقىلى شەشۋدى ۇسىندى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز