تالعار اۋدانىندا ورنالاسقان «بايسەركە-اگرو» جشس جانىنان اشىلعان جاڭا كاسىپورىن جىلىنا 36,5 مىڭ توننالىق قۋاتتىلىققا يە. جوبالىق قۇنى - 1,4 ميلليارد تەڭگە. زاۋىتتا 15 جۇمىس ورنى اشىلعان. نىساننىڭ ىسكە قوسىلۋ سالتاناتىنا وبلىس اكىمى اماندىق باتالوۆ, «بايسەركە-اگرو» اگروحولدينگىنىڭ پرەزيدەنتى تەمىرحان دوسمۇحامبەتوۆ, وڭىرگە جۇمىس ساپارىمەن كەلگەن ءبىر توپ سەناتورلار, عالىمدار مەن اگرارلىق سالا ماماندارى قاتىستى.
تالعار اۋدانى اكىمىنىڭ ورىنباسارى ەرمەك تولقىنوۆتىڭ ايتۋىنشا, اۋداندا بۇعان دەيىن مۇنداي ءىرى زاۋىت بولعان جوق. مالدىڭ جەمى تەك كورشى اۋدانداردان جەتكىزىلەتىن. ەندى قىزمەتىن ەندى باستاعان زاۋىت «بايسەركە-اگرو» اگروحولدينگكە ارناپ مول جەم قورىن قالىپتاستىرىپ قانا قويماي, اۋداننىڭ, ءتىپتى وبلىستىڭ اۋماعىنداعى مالمەن اينالىساتىن شارۋاشىلىقتار ءۇشىن زور پايدا اكەلمەك.
«مال باسىن ازايتپاۋ ءتاسىلىنىڭ ءبىرى – وعان قاجەتتى جەم قورىن قالىپتاستىرۋ. سوندىقتان مال ازىعىن دايىندايتىن جاڭا زاۋىتتىڭ اشىلۋى ءوڭىردىڭ اۋىل شارۋاشىلىعى ءۇشىن ۇلكەن مۇمكىندىكتەرگە جول اشادى. تەحنولوگيانى ساقتاۋ, عالىمدارمەن بىرلەسىپ جۇمىس ىستەۋ وتە ماڭىزدى. سوندا ءبىز مال باسى سانىن ءوسىرىپ قانا قويماي, سۋ جانە باسقا دا تابيعي بايلىقتاردىڭ جەتىسپەۋشىلىگىن سەزىنبەستەن مول ءونىم الا الامىز. ول ءۇشىن بىزگە ەڭ الدىمەن عىلىمي كوزقاراس, جوعارى بىلىكتى ماماندار, اۋىل شارۋاشىلىعى داقىلدارىنىڭ زاماناۋي ساپالى سورتتارى, ونىمدىلىگى جوعارى مال تۇقىمى قاجەت. ءبىزدىڭ بولاشاعىمىز – اگرارلىق سالادا, سوندىقتان وسى سالانى دامىتۋ - اسا جاۋاپتى دا قاجەتتى شارا», دەدى سەناتور اقىلبەك كۇرىشباەۆ جەتىسۋلىقتاردى ماڭىزدى كاسىپورىننىڭ اشىلۋىمەن قۇتتىقتاعان سوزىندە.
