ەل پرەزيدەنتى سالتاناتتى جيىندا تۋ كوتەرۋ ءراسىمىنىڭ تاريحي ءمان-ماڭىزى ايرىقشا ەكەنىن ايتتى.
«كوك تۋىمىز – تاۋەلسىز قازاقستاننىڭ ەڭ باستى ءرامىزى. حالقىمىز ءۇشىن ازاتتىقتان اسىل, بايراقتان بيىك قۇندىلىق جوق. قازاقتىڭ تاريحى «تۋىڭ جىعىلماسىن!» دەگەن ءبىر اۋىز تىلەككە سىيىپ تۇر. بابالارىمىز قاشاندا تۋىن بيىك ۇستاعان. ەلدىگى سىنعا تۇسكەن ساتتە بايراق استىنا بىرىگىپ, تۇتاستىعىن تانىتقان. ەرلىك پەن بىرلىكتىڭ ءداستۇرى ۇرپاقتان ۇرپاققا جالعاسىپ, تاۋەلسىزدىك داۋىرىنە ۇلاستى. ەگەمەن ەلدىڭ كوك بايراعى – مىزعىماس مەملەكەتتىگىمىزدىڭ بەلگىسى», دەدى پرەزيدەنت.
قاسىم-جومارت توقاەۆ استانانى ەلباسى مەن ميلليونداعان وتانداسىمىزدىڭ قاجىرلى ەڭبەگىنىڭ ارقاسىندا بوي كوتەرگەن قالا دەپ باعالادى.
«ەلوردامىز – قازىرگى قازاقستاننىڭ بەتكە ۇستار باس قالاسى. ەلىمىزدىڭ ورتالىق مەگاپوليسى بولاشاققا جول اشاتىن ورداعا, جالپى ۇلت بولىپ ۇيىسۋدىڭ جانە شىناي ءپاتريوتيزمنىڭ ۇلگىسىنە اينالدى. تۇڭعىش پرەزيدەنت – ەلباسى مەن ميلليونداعان وتانداسىمىزدىڭ قاجىرلى ەڭبەگىنىڭ ارقاسىندا بوي كوتەرگەن قالا – حالقىمىزدىڭ ماقتانىشى. وتانىمىزدىڭ جۇرەگى ءدال وسى جەردە سوعىپ تۇر. اسا ماڭىزدى شەشىمدەردىڭ ءبارى وسى جەردە قابىلدانىپ, سالماقتى وي-پىكىرلەر ورتاعا سالىنىپ, بىرەگەي جوبالار جۇزەگە اسىرىلىپ جاتىر», دەدى مەملەكەت باسشىسى.
قازاقستان پرەزيدەنتىنىڭ پىكىرىنشە, ەلوردا دارىندى, جىگەرلى وتانداستارىمىزدىڭ, سونداي-اق, وزگە مەملەكەتتەردىڭ كوپتەگەن ازاماتتارىنىڭ باس قوساتىن ورتالىعىنا اينالدى. قاسىم-جومارت توقاەۆ ۇلى دالا كىندىگىندە قاسيەتتى تۋدى بيىكتە جەلبىرەتە وتىرىپ, ەركىندىك پەن ەگەمەندىك مۇراتىنا بەيىلدى ەكەنىمىزدى اتاپ ءوتتى.
«ەلوردا كۇنى ادامداردى قولداپ, شابىتتاندىرۋ, بىرلىكتىڭ كۇشىن, ءوزارا كومەكتىڭ ماڭىزدىلىعى مەن ءار ازاماتتىڭ ورتاق ىسكە قوسقان ۇلەسىنىڭ قۇندىلىعىن دارىپتەۋ ءۇشىن اسا ماڭىزدى. ەلوردا تۇرعىندارى ەكپە سالۋ ناۋقانى مەن شەكتەۋ شارالارىن ساقتاۋ كەزىندە الدىڭعى قاتاردا بولۋى قاجەت. جاپپاي ۆاكتسينالاۋ قالىپتى تىنىس-تىرشىلىككە قايتا ورالۋدىڭ, ادامداردىڭ دەنساۋلىعىن ساقتاۋدىڭ جالعىز جولى ەكەنىن دۇرىس ءتۇسىنۋىمىز كەرەك. ء«بىز بىرگەمىز» ۇرانى اسا قاتەرلى ىندەتكە قارسى كۇرەستەگى جەڭىسىمىزدىڭ بويتۇمارى بولاتىنىنا سەنىمدىمىن», دەدى قاسىم-جومارت توقاەۆ.
ءراسىم بارىسىندا جوعارى اسكەري وقۋ ورنىنىڭ 12 ۇزدىك تۇلەگى قازاقستان پرەزيدەنتى – قازاقستان رەسپۋبليكاسىنىڭ جوعارعى باس قولباسشىسىنىڭ قولىنان وفيتسەر پوگونىن الدى.
جيىن سوڭىندا قاسىم-جومارت توقاەۆ بارلىق قاتىسۋشىلاردى كەلە جاتقان ەلوردا كۇنىمەن قۇتتىقتاپ, وتانىمىزدىڭ ءوسىپ-وركەندەي بەرۋىنە تىلەكتەستىك ءبىلدىردى.
