«ورتالىق ازيا ۋنيۆەرسيتەتى, «استانا» ۋنيۆەرسيتەتى جانە اقتاۋ گۋمانيتارلىق-تەحنيكالىق ۋنيۆەرسيتەتىنىڭ اككرەديتاتسيالارى كەرى قايتارىلدى. سەبەبى, بۇل جوعارى وقۋ ورىندارى ءبىلىم بەرۋ ساپاسىنىڭ اككرەديتتەۋ ستاندارتتارىن ساقتاماعان. وسىعان بايلانىستى تاۋەلسىز قازاقستاندىق اككرەديتتەۋ ورتالىعى مەن اككرەديتتەۋ جانە رەيتينگتىڭ تاۋەلسىز اگەنتتىگى اتالعان جوعارى وقۋ ورىندارىنىڭ اككرەديتاتسياسىن قايتارىپ الدى. ەندى بۇل ۋنيۆەرسيتەتتەر جوعارى ءبىلىم تۋرالى قۇجاتتاردى بەرە المايدى, سونىمەن قاتار ستۋدەنتتەردى دە قابىلداۋعا قۇقىعى جوق», دەلىنگەن حابارلامادا.
ۆەدومستۆونىڭ مالىمدەۋىنشە, «استانا» ۋنيۆەرسيتەتى مەن اقتاۋ گۋمانيتارلىق-تەحنيكالىق ۋنيۆەرسيتەتىندە بۇدان بۇرىن دا اككرەديتاتسيالاۋ بارىسىندا قيىندىقتار بولعان.
ء«بىز وسى ۋنيۆەرسيتەتتەرمەن سوتتاسىپ جۇرگەنىمىزگە ءبىر جىلدان استى. انىقتالعان زاڭ بۇزۋشىلىقتارعا بايلانىستى قازىر ولاردى باس ليتسەنزيادان ايىرۋ شارالارى قابىلدانىپ جاتىر. سوڭعى ءۇشىنشى تەكسەرۋ قالدى. وسى جوعارى وقۋ ورىندارىنىڭ ستۋدەنتتەرى, اتا-انالار مەن وقىتۋشىلارىنان شاعىمدار تۇسكەنىن ايتا كەتكەن ءجون. ولار ءبىلىم ساپاسىنىڭ جوقتىعى, وقىتۋشىلار مەن عىلىمي جەتەكشىلەردىڭ جەتىسپەۋشىلىگى, سونداي-اق ديپلومنىڭ ۋاقىتىلى بەرىلمەۋىنە شاعىمداندى. ەندى ديپلوم الۋ ءۇشىن ستۋدەنتتەر باسقا جوعارى وقۋ ورىندارىنا اۋىسا الادى. ول ءۇشىن ءبىز جوو قىزمەتىنىڭ ۇلگىلىك قاعيداسىنا وزگەرىس پەن تولىقتىرۋلار ەنگىزدىك», دەلىنگەن حابارلامادا.
مينيسترلىكتىڭ مالىمەتىنشە, تالاپكەرلەر بۇل وقۋ ورىندارىنا گرانتقا تۇسە المايدى, ال تۇلەكتەر ديپلوم المايدى. مۇنداي جاعدايدا ستۋدەنتتەر تەك باسقا ۋنيۆەرسيتەتتەرگە اۋىسۋ ارقىلى عانا تىعىرىقتان شىعا الادى.
«اتالعان جوعارى وقۋ ورىندارىنداعى ءبىلىم الۋشىلاردىڭ سانى وسى ۋاقىت ىشىندە ايتارلىقتاي تومەندەدى. ۇلتتىق ءبىلىم بەرۋ دەرەكتور قورىنىڭ اقپاراتىنا سايكەس, ورتالىق ازيا ۋنيۆەرسيتەتىندەگى بيىلعى وقۋ جىلىنداعى ستۋدەنتتەردىڭ سانى 3 070-تەن 636-عا دەيىن, «استانا» ۋنيۆەرسيتەتىندە – 1 162-دەن 480-گە دەيىن, اقتاۋ گۋمانيتارلىق-تەحنيكالىق ۋنيۆەرسيتەتىندە – 1 207-دەن 398-گە دەيىن ازايعان», - دەدى قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
كوميتەت تۇلەكتەر مەن جۇمىس بەرۋشىلەرگە جوو-نىڭ وزىندىك ۇلگىدەگى ديپلومداردىڭ سەرياسى, ءنومىرى جانە QR كودى بولاتىنىن نازار اۋدارۋىن سۇرادى.
«ديپلومدار سەرياسىن قر بعم بەكىتەدى. ديپلوم نومىرلەرىن گەنەراتسيالاۋ ارنايى سەرۆيس ارقىلى جۇزەگە اسىرىلادى. ونىڭ كومەگىمەن جوعارى وقۋ ورىندارى سەريالاردى جانە رەتتىك نومىرلەردى, سونداي-اق QR كودتى الادى. سونداي-اق تالاپكەرلەر مەن اتا-انالاردى جوو-نىڭ وقىتۋ ساپاسى, وقۋ ورنىنىڭ ينفراقۇرىلىمى مەن وقىتۋ تاسىلدەرىن زەردەلەي وتىرىپ, جوعارى وقۋ ورىندارىن تاڭداۋعا اسقان جاۋاپكەرشىلىكپەن قاراۋعا شاقىرامىز», دەلىنگەن حابارلامادا.
سونىمەن بىرگە ۆەدومستۆو باستاماسىمەن «اتامەكەن» ۇكپ وتكىزەتىن جوعارى وقۋ ورىندارىنىڭ رەسمي رەيتينگىنە نازار اۋدارۋ قاجەت. رەيتينگ جۇمىس بەرۋشىلەردىڭ ءبىلىم بەرۋ باعدارلامالارىنىڭ مازمۇنى مەن قازاقستاندىق جوعارى وقۋ ورىندارى تۇلەكتەرىنىڭ سۇرانىسقا يە بولۋىن ەسكەرە وتىرىپ جاسالعان. رەيتينگىنە بعم جانە «اتامەكەن» ۇكپ سايتتارىنان قاراۋعا بولادى.
