قر پرەمەر-ءمينيسترى اسقار مامين بيىل 1 شىلدە كۇنى الماتى قالاسىنا جۇمىس ساپارى اياسىندا ۇلكەن الماتى اينالما اۆتوموبيل جولىنىڭ ء(ۇاااج) سالىنۋ بارىسىن تەكسەردى.
ۇكىمەت باسشىسى قۇرىلىس-مونتاجداۋ جۇمىستارىنىڭ قارقىنىن ارتتىرۋدى جانە بارلىق ساپا ستاندارتتارىن قامتاماسىز ەتە وتىرىپ, كەستەدەن 2 جىلعا ەرتەرەك, جۇمىستى 2022 جىلدىڭ سوڭىنا دەيىن اياقتاۋدى تاپسىردى. ا.ءماميننىڭ ايتۋىنشا, اتالعان اينالما جول الماتى اگلومەراتسياسىن عانا ەمەس, جالپى ەلدىڭ ترانزيتتىك-كولىك الەۋەتىن دامىتۋ ءۇشىن دە ماڭىزدى.
ءۇاااج پايدالانۋعا بەرىلگەننەن كەيىن تاۋلىگىنە شامامەن 38 مىڭ اۆتوموبيل الماتى قالاسىن اينالىپ وتەتىن بولادى. بۇل قىتاي مەن ەۋروپا اراسىنداعى جۇك تاسىمالداۋ كولەمىنىڭ وسۋىنە دە سەپتىگىن تيگىزەدى دەپ كۇتىلۋدە. جوبانى ىسكە اسىرۋ كولىك قىزمەتىن كورسەتۋ ساپاسىن ارتتىرادى, جول قوزعالىسى قاۋىپسىزدىگىن قامتاماسىز ەتەدى, اۆتوموبيل كولىگىنىڭ قورشاعان ورتاعا تەرىس اسەرىن ازايتادى.
قۇرىلىس الاڭىنا شامامەن 1600 ادام مەن 600 بىرلىك تەحنيكا جۇمىلدىرىلعان. قۇرىلىس اسا بەلسەندى جۇرگىزىلەتىن كەزدە 3 مىڭعا جۋىق ادامدى تارتۋ جوسپارلانىپ وتىر.
ۇزىندىعى 66 كم جانە التى جولاقتى قوزعالىستى ۇلكەن اينالما اۆتوموبيل جولى I تەحنيكالىق سانات پارامەترلەرىنە سايكەس كەلەتىن بولادى. اۆتوجول قۇرىلىسىمەن قاتار جاڭا كوپىرلەر, كولىك جول ايرىقتارى مەن ەستاكادالار سالۋ كوزدەلگەن.
ايتا كەتەيىك, ءۇاااج – قازاقستان مەن ورتالىق ازياداعى مەملەكەتتىك-جەكەشەلىك ارىپتەستىك سالاسىنداعى جول قۇرىلىسىنىڭ ءىرى ينفراقۇرىلىمدىق جوباسى. قۇرىلىس-مونتاج جۇمىستارىنىڭ قۇنى 150 ملرد تەڭگەنى قۇرايدى. جوبانى ەۋروپا قايتا قۇرۋ جانە دامۋ بانكى, يسلام دامۋ بانكى, ەۋرازيا دامۋ بانكى قارجىلاندىرادى. كونتسەسسيا شارتىنا 2018 جىلى 20 جىل مەرزىمگە قول قويىلدى. كونتسەسسيونەر – «السيم الاركو», «ماكيول ينشاات», «سك ەكوپلانت», «كورەيا ەكسپرەسسۆەي» سەكىلدى تۇركيا جانە وڭتۇستىك كورەيا كومپانيالارى قۇرعان ء«ۇاااج ينۆەستيتسيالار جانە وپەراتسيالار» جشس.
