ءىس-شاراعا ەڭبەك جانە حالىقتى الەۋمەتتىك قورعاۋ, دەنساۋلىق ساقتاۋ, مادەنيەت جانە سپورت مينيسترلىكتەرىنىڭ, سونداي-اق جەرگىلىكتى اتقارۋشى ورگانداردىڭ وكىلدەرى قاتىستى.
وتىرىس بارىسىندا دەنساۋلىق ساقتاۋ جۇيەسىن جەتىلدىرۋ جانە قارت ادامداردىڭ بوس ۋاقىتىن ۇيىمداستىرۋ ءۇشىن جاعداي جاساۋ ماسەلەلەرى تالقىلاندى.
قر ەڭبەكمينىنىڭ وكىلدەرى 2025 جىلعا دەيىنگى «بەلسەندى ۇزاق ءومىر ءسۇرۋ» اعا بۋىن ازاماتتارىنىڭ جاعدايىن جاقسارتۋ جونىندەگى ءىس-شارالار جوسپارىن ىسكە اسىرۋ بارىسى تۋرالى حاباردار ەتتى. ول جەرگىلىكتى بيۋدجەت ەسەبىنەن بەلسەندى ۇزاق ءومىر ءسۇرۋ ورتالىقتارىن قۇرۋدى كوزدەيدى. بۇگىنگى كۇنى مۇنداي ورتالىقتار 9 وڭىردە: نۇر-سۇلتان, الماتى, شىمكەنت قالالارىندا, اقمولا, جامبىل, قاراعاندى, قوستاناي, اقتوبە جانە تۇركىستان وبلىستارىندا اشىلىپ, جۇمىس ىستەۋدە.
ورتالىقتاردىڭ جۇمىسى قارت ادامدارعا دەنساۋلىقتى قولداۋ بويىنشا كومەك كورسەتۋگە, قولايلى جانە كەدەرگىسىز ورتا قۇرۋعا, ولاردى قوعامدىق ومىرگە تارتۋعا باعىتتالعان. وندا يوگا, سكانديناۆيالىق ءجۇرىس, ايكۋنە بويىنشا ساباقتار وتكىزىلەدى; مەديتسينالىق, پسيحولوگيالىق جانە زاڭ كونسۋلتاتسياسى; IT جانە smart-ساۋاتتىلىققا, شەت تىلدەرىنە وقىتۋ; كوشپەلى ءىس-شارالاردى ۇيىمداستىرۋ, مادەني وبەكتىلەرگە بارۋ; تاقىرىپتىق كونتسەرتتەر مەن وزگە دە ءىس-شارالار وتەدى.
«ارداگەرلەر مەن زەينەتكەرلەرگە قامقورلىق جاساۋ, قارت ادامداردىڭ ءومىر ءسۇرۋ ساپاسىن جاقسارتۋ, ونىڭ ىشىندە جۇيەلى بوس ۋاقىتتى ۇيىمداستىرۋ, ىشكى شىعارماشىلىق الەۋەتتى ىسكە اسىرۋ ءۇشىن جاعداي جاساۋ, ولاردى قوعامنىڭ بەلسەندى ومىرىنە تارتۋ مەملەكەتتىك ساياساتتىڭ باسىم باعىتتارىنىڭ ءبىرى بولىپ تابىلادى. وسى ورتالىقتاردىڭ جاسى ۇلعايعان ازاماتتاردى قوعامعا الەۋمەتتەندىرۋدەگى ماڭىزدىلىعىن ەسكەرە وتىرىپ, وسى جىلدىڭ سوڭىنا دەيىن قالعان وڭىرلەردە وسىنداي ورتالىقتار اشۋ قاجەت», دەپ اتاپ ءوتتى قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ.
ەگدە جاستاعى ادامداردىڭ دەنساۋلىعىن ساقتاۋدى جەتىلدىرۋ بولىگىندە ەمحانالار جانىنان گەرياتريالىق كابينەتتەر اشۋ ماسەلەلەرى قارالدى.
ەرلان اۋكەنوۆ وڭىرلەر دەڭگەيىندە جۇمىس ىستەيتىن دەنساۋلىق ساقتاۋشى جانە دەنساۋلىقتى نىعايتۋشى تەحنولوگيالاردى ايقىنداۋ, سونداي-اق دەنساۋلىقتى ساقتاۋ ءۇشىن نەعۇرلىم ماڭىزدى ءىس-شارالاردى وزەكتەندىرۋ قاجەت ەكەنىن اتاپ ءوتتى. ۆيتسە-مينيستر الدىن الۋ شارالارىنا ەرەكشە نازار اۋدارۋعا شاقىردى.
وتىرىس بارىسىندا الماتى قالاسى الەۋمەتتىك ءال-اۋقات باسقارماسىنىڭ باسشىسى الماسبەك قۇرمانعاليەۆ پەن اقمولا وبلىسى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى دينا احمەتجانوۆا اعا بۋىن ازاماتتارىنىڭ جاعدايىن جاقسارتۋ جونىندەگى وڭىرلىك جوسپارلاردىڭ ورىندالۋى تۋرالى بايانداما جاسادى.
ەستەرىڭىزگە سالا كەتسەك, 2025 جىلعا دەيىنگى «بەلسەندى ۇزاق ءومىر ءسۇرۋ» ءىس-شارالار جوسپارىن قر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ 2021 جىلعى اقپاندا بەكىتكەن بولاتىن. ول ەگدە جاستاعى ادامداردىڭ ءومىر ءسۇرۋ ساپاسىن ارتتىرۋ, حالىقتىڭ سالاۋاتتى ءومىر ءسۇرۋ ۇزاقتىعىن ارتتىرۋ, قارت ادامداردىڭ الەۋمەتتىك جانە پسيحولوگيالىق ءال-اۋقاتىن جاقسارتۋ, ەگدە جاستاعى ادامداردىڭ قوعام ءومىرىنىڭ ءارتۇرلى سالالارىنا, ەلدىڭ الەۋمەتتىك-ەكونوميكالىق دامۋىنا قاتىسۋ مۇمكىندىكتەرىن كەڭەيتۋ ءۇشىن ءىس-شارالاردى كوزدەيدى. وسى جوسپاردى ىسكە اسىرۋ ءۇشىن ۇلكەن جاستاعى ادامداردىڭ جاعدايىن جاقسارتۋ ماسەلەلەرى بويىنشا ۆەدومستۆوارالىق كوميسسيا قۇرىلدى.
قازاقستاندا 65 جاستان اسقان شامامەن 1,5 ملن ادام نەمەسە بۇكىل حالىقتىڭ 7,8% - ى تۇرادى. بۇل كورسەتكىش سوڭعى 6 جىلدا 1% - عا ءوستى (2015 جىلى 6,8%).
