قازاقستاننىڭ ايەلدەر قۇراماسى پارسى شىعاناعىنداعى جارىستا كەرەمەت كورسەتكىشكە قول جەتكىزىپ, سەگىز بىردەي سۇلۋىمىز التىننان القا تاققان ەدى. ەلگە ورالعاننان كەيىن ولاردىڭ ەڭبەگى ەلەنىپ, چەمپيوندىق اتاققا قول جەتكىزگەن ءار بۇرىمدىعا 10 مىڭ اقش دوللارىنان بەرىلدى. ايەلدەر مەن ەرلەردى قوسا العاندا جەرلەستەرىمىز بارلىعى 16 (8 التىن+6 كۇمىس+2 قولا) جۇلدەنى قورجىنعا سالدى. قازاقستان بوكس فەدەراتسياسىنىڭ پرەزيدەنتى كەڭەس راقىشەۆتىڭ قاتىسۋمەن الماتىدا وتكەن ايتۋلى ءىس-شارا بارىسىندا كۇمىسپەن كۇپتەلگەندەرگە 5 مىڭ جانە قولا مەدالدى مويىندارىنا ىلگەندەرگە 2,5 مىڭ دوللار مولشەرىندە قارجى سەرتيفيكاتى تاپسىرىلدى. سونىمەن قاتار ۇلتتىق قۇراما باپكەرلەرى, بوكسشىلاردىڭ جەكە جاتتىقتىرۋشىلارى, كەشەندى-عىلىمي توپ مۇشەلەرى دە اقشالاي جانە باسقا دا باعالى سىيلىقتاردان قۇر قالعان جوق.
– تاريحي جەڭىسكە قول جەتكىزگەن قىزدارىمىزدى مەملەكەت باسشىسىنىڭ ءوزى قۇتتىقتاعانىن جاقسى بىلەسىزدەر. پرەزيدەنتتىڭ قۇتتىقتاۋى – ءبىز ءۇشىن اسا قۇندى. سەبەبى وسى كۇنگە دەيىن بىردە-ءبىر مەملەكەتتىڭ ايەلدەر قۇراماسى ءدال بىزدەردەي تولاعاي تابىسقا قول جەتكىزگەن ەمەس. سوندىقتان دا كوماندامىزدىڭ وسى جارقىن جەڭىسى ءبىزدى قاتتى مارقايتىپ وتىر. الدا وليمپيا ويىندارى «مەنمۇندالاپ» تۇر. قازاقستاننىڭ بىلعارى قولعاپ شەبەرلەرى توكيوداعى دودادا دا جوعارى دەڭگەيدە ونەر كورسەتەدى دەپ ۇمىتتەنەمىز, – دەدى كەڭەس راقىشەۆ.
