بۇل تۋرالى ونلاين وتكەن ءباسپاسوز ءماسليحاتىندا پاۆلودار وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسى باسشىسىنىڭ مىندەتىن اتقارۋشى ساۋلە وسپانوۆا ءمالىم ەتتى.
«مەرەكەلىك شارالار بارىسىندا 3 شىلدەدە استانا كۇنى قارساڭىندا نۇر-سۇلتان قالاسىندا قانىش ساتباەۆ ەسكەرتكىشىنىڭ اشىلۋى وتەدى.
ەسكەرتكىش پاۆلودار وبلىسىنىڭ اكىمدىگى اتىنان نۇر-سۇلتان قالاسىنىڭ اكىمدىگىنە سىيعا تارتىلادى. ونىڭ اۆتورى – بەلگىلى ءمۇسىنشى, بىرقاتار ۇلكەن ەسكەرتكىشتەردىڭ اۆتورى اسقار نارتوۆ. ەسكەرتكىش ەلورداداعى قانىش ساتباەۆ پەن قاجىمۇقان مۇڭايتپاسوۆ كوشەلەرىنىڭ قيىلىسىنداعى «قازاقستان» سپورت كەشەنىنىڭ الدىندا ورناتىلادى», دەدى ساۋلە وسپانوۆا.
ەسكەرتكىش قولادان قۇيىلعان, بيىكتىگى 5,25 م, سالماعى 4,9 توننا.
تۇعىر تاسى گرانيتتەن جاسالعان, بيىكتىگى – 5,8 م, سالماعى – 3,6 توننا.
سونداي-اق استانا كۇنىنە پاۆلودار وبلىسى بويىنشا 270-تەن استام ءىس-شارا وتكىزۋ جوسپارلانىپ وتىرعانىن ايتتى.
