«ەڭ الدىمەن, دەپۋتاتتىق كورپۋس مەملەكەت باسشىسى العا تارتقان ساياسي رەفورمانى زاڭ جاعىنان قامتاماسىز ەتتى. بۇل باعىتتا ەلىمىزدىڭ «سايلاۋ تۋرالى» كونستيتۋتسيالىق زاڭ جوباسىنا ەلەۋلى تۇزەتۋلەر ەنگىزىلدى. وندا پرەزيدەنتتىڭ ۇسىنىسى بويىنشا ساياسي پارتيالاردىڭ ماجىلىسكە ءوتۋ شەگى 7-دەن 5 پايىزعا دەيىن تومەندەتىلدى», دەدى ن. نىعماتۋلين.
سونىمەن قاتار ول سايلاۋدا بەرىلەتىن بيۋللەتەندەرگە «بارلىعىنا قارسىمىن» دەگەن جاڭا باعان ەنگىزىلگەنىن ەسكە سالدى. تاعى ءبىر ەرەكشەلىك – اۋىلدىڭ جانە اۋىلدىق وكرۋگ اكىمدەرىن تىكەلەي سايلاۋدى قاتاماسىز ەتەتىن نورمالار قوسىلدى. بۇل نورمالار مەملەكەتتىك ورگاندار مەن حالىق اراسىنداعى بايلانىستى كۇشەيتۋگە, اكىمدەردىڭ تۇرعىندار الدىنداعى جاۋاپكەرشىلىگىن نىعايتۋعا جانە اۋىل ازاماتتارىنىڭ ساياسي بەلسەندىلىگىن ودان ءارى ارتتىرۋعا ىقپال ەتەدى.
«وسى سەسسيادا ءبىز قابىلداعان جانە بۇكىل ەلدىڭ نازارىندا بولعان تاعى ءبىر زاڭ جوباسى – ول «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قۇجات.
وسىعان بايلانىستى تىكەلەي مەملەكەت باسشىسى قاسىم-جومارت توقاەۆتىڭ باستاماسىمەن زاڭ دەيگەيىندە ناقتى شەشىم قابىلداندى. ەندى, جەرىمىزدى شەتەلدىكتەرگە ساتۋعا دا, جالعا بەرۋگە دە تولىقتاي تىيىم سالىندى. وسى سالانىڭ باسقا سۇراقتارىن شەشۋ ءۇشىن پارلامەنت جەر قاتىناستارى تۋرالى زاڭ قابىلدادى. زاڭعا اۋىل شارۋاشىلىعى ماقساتىنداعى جەرلەردى جالعا بەرۋ ينستيتۋتىن ساقتاي وتىرىپ, جەردى جەكەمەنشىككە بەرۋدى 5 جىلعا توقتاتۋ تۋرالى نورما ەنگىزىلدى», دەدى ءماجىلىس توراعاسى.
بۇدان بۇرىن حابارلانعانداي, بۇگىن پارلامەنت پالاتالارىنىڭ بىرلەسكەن وتىرىسى ءوتىپ, وندا جەتىنشى سايلانعان پارلامەنتتىڭ ءبىرىنشى سەسسياسى رەسمي تۇردە جابىلدى. وسى ورايدا پارلامەنت دەپۋتاتتارى كانيكۋلعا كەتتى.
