اتاپ ايتقاندا, دەپۋتاتتار بيىلعى 1 قىركۇيەككە دەيىن پارلامەنتتىك كانيكۋل دەپ جاريالاناتىنى تۋرالى ارنايى قاۋلى قابىلدادى.
«بۇگىن ءبىز جەتىنشى شاقىرىلعان پارلامەنتتىڭ العاشقى سەسسياسىن اياقتاپ وتىرمىز. بۇل سەسسيا جۇمىسى قاسيەتتى وتانىمىز قازاقستانىمىزعا 30 جىل تولعان مەرەيلى كەزەڭدە باستالدى. اتا-بابامىز اڭساعان تاۋەلسىزدىك ءاربىر وتباسىن, ءاربىر قازاقستاندىقتىڭ زور ماقتانىشى جانە باعا جەتپەس بايلىعى بولىپ سانالادى. سەبەبى ءدال وسى 30 جىلدىڭ ىشىندە ءبىزدىڭ ەلىمىز بارلىق سالادا زور تابىستارعا جەتتى. بۇگىنگى كۇنى قازاقستانىمىز بۇكىل الەم مويىنداعان بەدەلى جوعارى, ىرگەسى بەرىك قۋاتتى مەملەكەتكە اينالدى», دەدى ءماجىلىس توراعاسى نۇرلان نىعماتۋلين.
وسى ورايدا ول تاۋەلسىزدىك جىلدارىنداعى قر تۇڭعىش پرەزيدەنت نۇرسۇلتان نازارباەۆتىڭ ەڭبەگىنە توقتالدى.
«بۇگىندە وسى 30 جىل بۇرىن نەگىزىن قالاعان, ماقساتى ايقىن, بولاشاعى زور «قازاقستاندىق جولدى» مەملەكەت باسشىسى قاسىم-جومارت كەمەل ۇلى توقاەۆ ودان ءارى تابىستى جالعاستىرىپ كەلەدى. قازىردىڭ وزىندە ەل دامۋىنا ناقتى سەرپىن بەرەتىن ماڭىزدى باستامالار, بىرقاتار ساياسي ءارى ەكونوميكالىق-الەۋمەتتىك رەفورمالار ناتيجەلى قولعا الىندى. ونىڭ بارلىعىن زاڭ جاعىنان قامتاماسىز ەتىپ كەلە جاتقان قوس پالاتالى كاسىبي پارلامەنتتىڭ قۇرىلعانىنا دا بيىل 25 تولىپ وتىر. بۇل ارقاشاندا قازاقستاننىڭ زاڭنامالىق تىرەگى بولىپ كەلە جاتقان پارلامەنت ءۇشىن وتە ماڭىزدى وقيعا. وسىنداي تاريحي كەزەڭدە ءبىزدىڭ دەپۋتاتتىق كورپۋستىڭ ءرولى دە, جاۋاپكەرشىلىگى دە بۇرىنعىدان دا ارتا ءتۇستى», دەدى ءماجىلىس توراعاسى.
