ىندەتكە تويتارىس بەرۋدىڭ بىردەن-ءبىر امالى ۆاكتسينالاۋ ەكەنى تۇسىنىكتى. حالىقتىڭ باسىم بولىگى ۆاكتسينا الىپ, ۇجىمدىق يممۋنيتەت قالىپتاسقان جاعدايدا عانا قالىپتى تىرشىلىگىمىزگە ورالا الامىز. بىراق ەلىمىزدە ۆاكتسينالاردىڭ قولجەتىمدى قورى قانشالىقتى قامتاماسىز ەتىلگەنىمەن, ونى سالدىرىپ جاتقانداردىڭ كورسەتكىشى كوڭىل كونشىتەرلىك ەمەس. سوندىقتان ىندەتتىڭ تارالۋ قارقىنى ءالى دە باسەڭدەمەي وتىر. كوپشىلىك ورىنداردا ماسكا تاعۋ, اراقاشىقتىق ساقتاۋ سياقتى قازىرگى قىسىلتاياڭ شاقتىڭ قاراپايىم ەرەجەلەرى ساقتالا بەرمەيدى, ودان قالسا جاسىرىنىپ دۋمانداتاتىن جۇرت تا از بولماي تۇر. مۇنداي كەلەڭسىز جاعدايلاردى ارنايى مونيتوريگ توپتار ءجيى انىقتاپ جاتىر. كاسىبىن جۇرگىزۋدە كارانتين تالاپتارىن ساقتامايتىندار بەلگىلى ءبىر دەڭگەيدە ىندەتتىڭ ودان سايىن ورشۋىنە جول بەرىپ وتىر. ياعني ۆاكتسينالانباعاندار ءۇشىن ءتۇرلى بيزنەس ورىندارىنىڭ ەسىگى اشىق بولعان سايىن وندا باس سۇعاتىن كوپشىلىك تە باسىنا ىندەت قاۋپى تونبەي, ۆاكتسينا سالدىرۋدىڭ جاۋاپكەرشىلىگىن ۇعىنا بەرمەيدى. بۇل رەتتە ۆاكتسينالاۋدىڭ قارقىنىن ارتتىرۋعا كاسىپكەرلەردىڭ اتسالىسۋى ماڭىزدى.
جاقىندا نۇر-سۇلتان قالاسىندا ء«ۇندى» شتامىنىڭ انىقتالۋى كارانتين تالاپتارىن قاتايتۋعا سەبەپ بولدى. جاڭا قاۋلى 27 ماۋسىمنان باستاپ كۇشىنە ەنىپ, كاسىپورىنداردىڭ جۇمىس رەجىمىنە وزگەردى. جاڭا قاۋلى قر اۋماعىندا كوروناۆيرۋس ينفەكتسياسىنىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيا وتىرىسىنىڭ 2021 جىلعى 22 ماۋسىم كۇنگى حاتتاماسىنا سايكەس قابىلداندى. قۇجاتقا سايكەس, مەملەكەتتىك ورگانداردىڭ, ۇلتتىق كومپانيالاردىڭ, كاسىپورىنداردىڭ اكىمشىلىك قىزمەتكەرلەرىنىڭ كەمىندە 80%-ى قاشىقتان جۇمىس ىستەۋ تارتىبىنە كوشۋى كەرەك. ال ۆاكتسينالاۋدى تولىق قابىلداعان قىزمەتكەرلەر وفلاين رەجىمدەگى جۇمىسقا جىبەرىلەدى. بۇل رەتتە سوڭعى 3-6 اي ىشىندە سovid-19-عا قارسى ۆاكتسينالاۋدىڭ تولىق كۋرسىن العان جانە كوروناۆيرۋسپەن اۋىرىپ جازىلعان بارلىق قىزمەتكەردىڭ كۇندىزگى رەجىمدە جۇمىس ىستەۋىنە جول بەرىلەدى.
راسىندا, كەز كەلگەن سالاداعى جۇمىسشىنىڭ ۆاكتسينا سالدىرۋى ەڭ الدىمەن ءوزىنىڭ قاۋىپسىزدىگى ءارى ءىسىنىڭ ىركىلىسسىز ءجۇرۋى ءۇشىن قاجەت. ماسەلەن, ەلورداداعى Zeken-moda تىگىن شەبەرحاناسىنىڭ باسشىسى قايروللا ابىشەۆ ۆاكتسينالاۋ كەز كەلگەن كاسىپتىڭ جاندانۋىنا سەپتىگىن تيگىزەتىنىن اتاپ ءوتتى.
ء«بىزدىڭ جۇمىستا ءبارى ۆاكتسينانى سانالى تۇردە سالدىرىپ جاتىر. ياعني ەشقانداي ماجبۇرلەۋ جوق. ويتكەنى جۇمىسشىلار ۆاكتسينا الماي, ءىسىمىز ءونىمدى بولمايتىنىن ءتۇسىندى. وسى ۋاقىتقا دەيىن تىگىنشىلەرىمىزگە تاپسىرىستاردى ۇيىندە وتىرىپ ورىنداۋعا تۋرا كەلدى. بىراق بۇل جۇمىس پروتسەسىن ايتارلىقتاي تەجەيدى. بىراق قاشىقتان ىستەۋدەن باسقا امال جوق ەدى. ەندى قولجەتىمدى ءارى ءتيىمدى ۆاكتسينا باردا ءىسىمىزدى قايتا قولعا الماساق بولمايدى. قازىر ۆاكتسينا الۋدىڭ اسا قاجەت ەكەنىن تۇسىنەتىن كەز جەتتى. ءارى كليەنتتەرمەن دە بەتپە-بەت جۇزدەسىپ, تاپسىرىستاردى ناقتىلاپ العان ءجون. بۇگىندە ءبىزدىڭ جۇمىسشىلاردىڭ باسىم بولىگى ۆاكتسينا سالدىردى. باسىندا كوبى سپۋتنيك V ۆاكتسيناسىن سالدىرعان, قازىر Hayat Vax-تى العاندى قۇپ كورگەندەر دە بار», دەيدى كاسىپكەر.
نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا ۆاكتسيناتسيالانعان قىزمەتكەرلەردىڭ قاتارى از بولسا نىساننىڭ جۇمىسى توقتاتىلاتىنىن ءمالىم ەتتى.
«بيىل الەۋمەتتىك نىساندار, ياعني قولجەتىمدى, جەڭىلدىكتى تۇرعىن ءۇي, وقۋ ورىندارى, اۋلا كلۋبتارى جانە باسقا دا نىساندار قۇرىلىسىنىڭ كولەمى ۇلعايدى. ءىرى قۇرىلىس كومپانيالارىنىڭ باسشىلارىمەن كەزدەستىك. جۇمىس جوسپارىن تالقىلاپ, ۋاقىتىن بەلگىلەدىك. ەپيدەميالىق جاعدايدى جانە نىساندا جۇمىس ىستەيتىن ادامنىڭ كوپتىگىن ەسكەرە وتىرىپ, مىندەتتى تۇردە ۆاكتسينالاۋ (مەديتسينالىق تۇرعىدا رۇقسات ەتىلمەگەندەردەن بولەك) ۇسىنىلدى. ۆاكتسينالاۋ نىساندا جۇمىس ىستەيتىن قىزمەتكەرلەردى جانە ولاردىڭ وتباسىلارىن, سونداي-اق اينالاسىنداعى جۇرتتى قورعايدى. وسىلايشا كوروناۆيرۋستىڭ تارالۋى توقتايدى. ۆاكتسينالانعان قىزمەتكەرلەردىڭ قاتارى از بولسا نىساننىڭ جۇمىسىن توقتاتۋعا ءماجبۇر بولامىز. سەبەبى ەلوردامىز بەن تۇرعىندارىمىزدىڭ قاۋىپسىزدىگى بارىنەن جوعارى», دەپ جازدى ەلوردا اكىمى.
