قازىرگى تاڭدا قاراقيا كاسىپتىك كوللەدجىنىڭ وقىتۋشىلىق قۇرامى وزدەرىنىڭ وقۋ-تاربيە جۇمىستارىندا ەلباسى ماقالاسىن زەرتتەپ-زەردەلەۋگە ايرىقشا نازار اۋدارىپ, كەڭ كولەمدە ىزدەنىس جۇمىستارىن جۇرگىزۋ ۇستىندە. وسى كۇنگە دەيىن وقۋ ورنىندا ۇلتتىق قۇندىلىقتاردى ناسيحاتتاۋ باعىتىندا وتكەن اۋقىمدى ءىس-شارالار – سونىڭ دالەلى. اتاپ ايتساق, اتالعان باعىت بويىنشا دوڭگەلەك ۇستەلدەر وتكىزىلىپ, عىلىمي جوبالاردى قولعا الۋ ماقساتىندا ولكەمىزدە ورنالاسقان شوپان اتا, بەكەت اتا, شاقپاق اتا, قارامان اتا, ماسات اتا كيەلى ورىندارىنا كوللەدج اكىمشىلىگىنىڭ مۇرىندىق بولۋىمەن ساياحاتتار ۇيىمداستىرىلدى, اتا-بابا ءداستۇرىن ناسيحاتتاۋ, ۇرپاق بويىنا ۇلتتىق مەنتاليتەتتى ءسىڭىرۋ, بولاشاق اتا-انالاردىڭ بويىنا ۇلتتىق قاسيەتتەردى دارىتۋ ىسىندە جاڭا قارقىن پايدا بولدى.
ۇلتتىق قۇندىلىقتار, ياعني انا ءتىلىمىز, ادەبي, مادەني مۇرالارىمىز – اتا-بابامىزدان ميراس بولىپ قالعان قاسيەتتى جادىگەرلەرىمىز. اسىل مۇرالاردى ۇرپاقتان-ۇرپاققا جەتكىزۋ – ءوز ۇلتىن ۇلىقتاعان ءاربىر ازاماتتىڭ قاسيەتتى بورىشى. وسى ماقساتپەن كوللەدجىمىزدىڭ ستۋدەنتتەرى مەن قۇرىق اۋىلىنىڭ اعا بۋىن ارداگەرلەرىنىڭ, قۇرمەتتى ەڭبەك دەمالىسىنداعى ۇلاعاتتى ۇستازدارىنىڭ كەزدەسۋلەرى ۇنەمى وتكىزىلىپ كەلەدى.
قازىرگى دامىعان, جاڭا زاماندا ءومىر ءسۇرىپ جاتقان ءبىز, قوعام مۇشەلەرى وتباسى قۇندىلىقتارىن ۇرپاعىمىزعا تولىققاندى جەتكىزىپ كەلە جاتىرمىز با, قازىرگى وتباسى قانداي, قازاق شاڭىراعىندا ۇلتتىق سالتىمىز, ءداستۇرىمىز, ۇلى بابالارىمىز سالىپ كەتكەن سارا جول جالعاسىپ كەلە مە جانە وتباسىنداعى ۇل مەن قىزعا بەرىلىپ جاتقان اكە مەن انانىڭ تاربيەسىنىڭ ماڭىزدىلىعى قانداي دەگەن ساۋالدارعا جاۋابىمىزدى الىپ, كوزىمىزدى جەتكىزۋ ماقساتىندا كوللەدج اتا-انالارىنا «وتباسى – تاربيە ىرگەتاسى», «وتباسى – ادامزات بەسىگى تەربەتكەن ۇيا», «سالت-ءداستۇر – سان عاسىرلىق ساف مۇرا» تاقىرىپتارىندا سۇحباتتار جۇرگىزىلدى.
تشو كومپانياسى «قوعامدىق كەڭەستەر» جوباسى بويىنشا ۇلتتىق قۇندىلىقتاردى دارىپتەۋ جونىندەگى « ۇلى دالانىڭ رۋحى» جوباسىمەن جەڭىمپاز اتانىپ, ول اۋىل تۇرعىندارىنىڭ يگىلىگىنە بەرىلدى.
ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا ۇلت تۇتاستىعى مەن ۇرپاقتار ساباقتاستىعى, ەل مۇددەسى مەن ۇلتتىق قۇندىلىقتار ءمانىن تەرەڭدەتە ءتۇسۋ ماقساتىندا ۇيىمداستىرىلعان «ۇلتتىق قۇندىلىق جادىگەرلەرى» تاقىرىبىندا كوللەدجىمىزدىڭ وقىتۋشىلارى مەن قىزمەتكەرلەرى 50 بەينەروليك دايىنداپ, ءبىلىم الۋشى جاستارعا ۇلتتىق ءتالىم-تاربيە بەرۋدە. بۇل بەينەروليكتەردە اتا-بابالارىمىز قولدانعان كونە جادىگەرلەر, ەرتەدەن جالعاسىپ كەلە جاتقان قولونەر بۇيىمدارىن دايىنداۋ شەبەرلىكتەرى, سالت-داستۇرلەردى دارىپتەۋ, ۇلتتىق تاعام تۇرلەرى تۋرالى ماعلۇماتتار بەرىلەدى. وسى بەينەروليكتەر توپتاماسى كوللەدجىمىزدىڭ 3-قاباتىندا ارنايى بۇرىش رەتىندە ورناتىلىپ, ستۋدەنتتەرىمىزگە, مەكتەپ وقۋشىلارىنا تۇراقتى كورسەتىلۋدە.
قازىرگى تاڭدا الەۋمەتتىك جەلىلەر ازاماتتاردىڭ تۇلعالىق الەۋمەتتەنۋىنە ەرەكشە ىقپال ەتەدى. الەۋمەتتەندىرۋ ۇدەرىسى بارىسىندا ءبىلىم بەرۋ تەحنولوگيالارى, ءادىس-تاسىلدەرى قولدانىلاتىندىعىن ەسكەرە وتىرىپ, جوعارىدا باياندالعان اۋقىمدى جۇمىستار تۋرالى مالىمەتتەر كوللەدجىمىزدىڭ ينستاگرامم, فەيسبۋكتەگى پاراقشالارىندا جاريالانىپ, اتالعان جەلىلەر قولدانۋشىلارىنا تۇسىنىكتەر بەرىلىپ وتىرادى.
سونىمەن قاتار, دالا وركەنيەتىنىڭ مادەني مۇراسى, ەسكەرتكىشتەرى بۇگىندە وقۋ ورنىنىڭ اۋلاسىنا جانە تۇڭعىش پرەزيدەنت پاركىنە ورناتىلدى. تاريحي تاڭبالار شاعىن كوركەم مۇسىندەرگە اينالىپ, كونە تاريحتى ۇمىت قالدىرماي, كورۋشىلەر ساناسىن سەلت ەتكىزەرلىكتەي ەرەكشە سۇيىسپەنشىلىكپەن جاسالعان. ولار – «نايزا», «ساداق», «قازان», «قوبىز», «اسىق», «قۇمىرا», «دومبىرا», «دۋلىعا», «كوكبورى», «بۇركىت». بۇل جۇمىس ءالى دە جالعاسىن تابۋدا.
قورىتا ايتقاندا, ۇلى دالانىڭ ۇلتتىق قۇندىلىقتارىن قازاق مادەنيەتىنىڭ نەگىزگى قاينار كوزدەرى دەپ بىلەمىز. ولاردى جاس ۇرپاقتىڭ سانا-سەزىمى مەن تاربيەسىنە سىڭىرۋدەگى پەداگوگيكالىق ۇجىمنىڭ ەڭبەگى ولشەۋسىز.
دالاباي بەكماعامبەتوۆ,
قاراقيا كاسىپتىك كوللەدجىنىڭ ديرەكتورى
ماڭعىستاۋ وبلىسى
