Capital Bank Kazakhstan اكتسيونەرلىك قوعامىن بانك جانە وزگە دە وپەراتسيالاردى, باعالى قاعازدار نارىعىندا قىزمەتتى جۇرگىزۋگە بەرىلگەن ليتسەنزيادان ايىرۋ تۋرالى شەشىم وسى جىلدىڭ 24 ماۋسىمىندا قابىلدانعان. بۇعان بىرنەشە سەبەپ نەگىز بولىپ وتىر. اتاپ ايتقاندا, بانك پرۋدەنتسيالىق نورماتيۆتەردى جانە باسقا دا ساقتالۋى ءتيىس وزگە دە نورما مەن ءليميتتى جۇيەلى تۇردە بۇزىپ كەلگەن. ياعني مۇنداي جاعداي ءبىر جىلدىڭ ىشىندە ءۇش رەتتەن ارتىق قايتالانعان. بۇدان بولەك, بانكتىڭ ءىرى قاتىسۋشىسى ۋاكىلەتتى ورگاننىڭ قوسىمشا كاپيتالداندىرۋ جونىندەگى تالاپتارىن ورىنداماعان. سونداي-اق قارجى ينستيتۋتى تولەمگە قابىلەتسىز بانك ساناتىنا جاتقىزىلعان.
ليتسەنزيادان ايىرىلعان كۇنگى جاعداي بويىنشا بانك اكتيۆتەرىنىڭ مولشەرى 38,5 ملرد تەڭگەنى, نەسيە قورجىنى 33,9 ملرد تەڭگەنى قۇرادى. ونىڭ ىشىندە 30,4 ملرد تەڭگە نەمەسە بانكتىڭ نەسيە قورجىنىنىڭ 89,8 پايىزى – مەرزىمى 90 كۇننەن اسقان جۇمىس ىستەمەيتىن كرەديتتەر. بانكتىڭ ءوتىمدى اكتيۆتەرىنىڭ مولشەرى 149 ملن تەڭگەنى قۇرايدى. بۇل رەتتە ورىندالماعان كليەنتتىك تولەمدەردىڭ كولەمى 15 ملرد تەڭگەدەن اسادى.
پرۋدەنتسيالىق نورماتيۆتەردى ورىنداماۋىنا بايلانىستى قارجى نارىعىن رەتتەۋ جانە دامىتۋ اگەنتتىگى بانككە قاتىستى 29 قاداعالاپ دەن قويۋ شاراسىن قابىلداپ, 67 اكىمشىلىك قۇقىقبۇزۋشىلىق تۋرالى حاتتاما جاساعان.
«2020 جىلى بانك اكتسيونەرى بانكتىڭ قارجىلىق جاعدايىن جاقسارتۋ جونىندەگى ءىس-شارالار جوسپارىن ۇسىندى. كورسەتىلگەن جوسپاردى ورىنداۋ شەڭبەرىندە اگەنتتىكتىڭ قاتاڭ باقىلاۋىمەن بانك 2020 جانە 2021 جىلدارى دەپوزيتورلار الدىنداعى 31 ملرد تەڭگە سوماسىنداعى مىندەتتەمەلەرىن تومەندەتتى. جوسپاردى ىسكە اسىرۋ شەڭبەرىندە الەۋمەتتىك تۇرعىدان ماڭىزدى مەكەمەلەر (مەكتەپتەر مەن اۋرۋحانالار) الدىنداعى مىندەتتەمەلەر تولىعىمەن جانە كۆازيمەملەكەتتىك سەكتور الدىنداعى مىندەتتەمەلەردىڭ ايتارلىقتاي بولىگى دە وتەلدى. الايدا بانك پەن ونىڭ اكتسيونەرى قابىلداعان شارالار بانكتىڭ قارجىلىق جاعدايىن تۇراقتاندىرا المادى. بانك پرۋدەنتسيالىق نورماتيۆتەردى بۇزۋدى جالعاستىرۋدا جانە كليەنتتەر الدىنداعى تولەمدەر مەن اۋدارىمدار بويىنشا مىندەتتەمەلەرىن ورىندامايدى» دەپ حابارلادى اگەنتتىك.
بانك سالىمشىلارىنىڭ, جەكە تۇلعالاردىڭ
99 پايىزىنىڭ دەپوزيتتەرى قازاقستاننىڭ دەپوزيتتەرگە كەپىلدىك بەرۋ قورىنىڭ كەپىلدىگىمەن تولىق كولەمدە وتەلەدى.
اگەنتتىك توراعاسىنىڭ 2021 جىلعى 24 ماۋسىمداعى بۇيرىعىمەن ۋاقىتشا اكىمشىلىك تاعايىندالدى. بانكتىڭ بارلىق باسقارۋ ورگاندارىنىڭ وكىلەتتىكتەرى ۋاقىتشا اكىمشىلىككە اۋىستى. ۋاقىتشا اكىمشىلىك بانكتىڭ تاراتۋ كوميسسياسى تاعايىندالعانعا دەيىن ارەكەت ەتەتىن بولادى.
وسىلايشا, 25 ماۋسىمنان باستاپ قازاقستان رەسپۋبليكاسىنىڭ زاڭناماسىندا كوزدەلگەن جاعدايلاردى قوسپاعاندا, كليەنتتەردىڭ جانە بانكتىڭ ءوزىنىڭ بانك شوتتارى بويىنشا بارلىق وپەراتسيا توقتاتىلدى. اگەنتتىك زاڭنامادا بەلگىلەنگەن تارتىپپەن بانكتىڭ قىزمەتىن ماجبۇرلەپ توقتاتۋ (تاراتۋ) تۋرالى وتىنىشپەن سوتقا جۇگىنەدى.
