كولۋمبيا پرەزيدەنتىنىڭ تىكۇشاعىنا شابۋىل جاساعاندار تۋرالى اقپارات ءۇشىن ءۇش ميلليارد پەسو (796 000 اقش دوللارى, 573 000 فۋنت ستەرلينگ) سىياقى ۇسىندى.
يۆان دۋكە جۇما كۇنى تىكۇشاققا وق جاۋدىرعان كەزدە ۆەنەسۋەلا شەكاراسىنا جاقىن جەردەگى كۋكۋت اۋەجايىنا جاقىنداپ قالعان. كەيىنىرەك جاريالانعان فوتوسۋرەتتەردە تىكۇشاقتىڭ تىرەك بۇرانداسى مەن ارت جاعىنا وق تيگەنى كورىنەدى. بورتتاعى ادامداردىڭ ەشقايسىسى زارداپ شەككەن جوق. بىرىككەن ۇلتتار ۇيىمى, ەو مەن اقش بۇل شابۋىلدى ايىپتادى.
بورتتا بولعان ەلدىڭ قورعانىس ءمينيسترى ديەگو مولانو سەنبىدە قىلمىسكەرلەر تۋرالى كەز كەلگەن اقپارات ءۇشىن سىياقى ۇسىندى. ال ۇلتتىق پوليتسيا كۋكۋتا ايماعىندا اك-47 جانە 7,62 كاليبرلى ەكى مىلتىق تابىلعانىن مالىمدەدى. ولار شابۋىل كەزىندە قولدانىلعان. ۇلتتىق پوليتسيا باستىعى گەنەرال حورحە ۆارگاس 7,62 كاليبرلى مىلتىقتا ۆەنەسۋەلا قارۋلى كۇشتەرىنىڭ بەلگىلەرى بولدى دەدى. ء«بىز كىنالىلەردى ىزدەپ جاتىرمىز. ولاردى قولعا تۇسىرمەيىنشە توقتامايمىز», دەپ جازدى ول ءوزىنىڭ Twitter-دەگى پاراقشاسىندا.
بۇل شابۋىلدى كىم جاساعانى ءالى بەلگىسىز. وقيعاعا دەيىن دۋكە كاتاتۋمبو ايماعىنداعى ءىس-شاراعا قاتىسقان. بۇل ايماق كولۋمبيا – ۆەنەسۋەلا شەكاراسى ارقىلى وتەدى جانە كوكاين قۇرامىنداعى باستى زات – كوكا وسىرەتىن نەگىزگى ايماقتاردىڭ ءبىرى.
بۇرىندارى كولۋمبيا ۆەنەسۋەلانى ب ۇلىكشى سودىرلاردى جاسىردى دەپ ايىپتاعان, ال ۆەنەسۋەلا مۇنى جوققا شىعارعان. دۋكە 2018 جىلى بيلىككە كەلگەننەن كەيىن قوس ەل اراسىنداعى ديپلوماتيالىق قاتىناستاردى ءۇزدى.
كولۋمبيانىڭ ەڭ ءىرى ب ۇلىكشى توبى – سولشىل ۇلت-ازاتتىق ارمياسى (ELN) كاتاتۋمبو ايماعىندا ارەكەت ەتەدى. وسى ايدىڭ باسىندا ELN ءوزىنىڭ كۋكۋتتاعى اسكەري بازاداعى مينالانعان كولىكتىڭ جارىلىسىنا قاتىسى بار دەگەندى جوققا شىعارعان-دى. شابۋىلدا 36 ادام, ونىڭ ىشىندە ەكى امەريكالىق اسكەري كەڭەسشى جاراقات العان.
