118 جىلدىق تاريحى بار ايتۋلى تۋرنيردە تالاي مىقتى ۆەلوشاباندوزداردىڭ ونەر كورسەتكەنى تاريحتان بەلگىلى. بيىل دا بۇل جارىستان الەمنىڭ ەڭ مىقتى دەگەن سپورتشىلارى تىس قالعان جوق. اتاپ ايتار بولساق, وسى دودانىڭ بىلتىرعى جەڭىمپازى, سونداي-اق تاۋلى كەزەڭ مەن جاستار اراسىنداعى باسەكەدە دە ۇزدىك شىققان سلوۆەنيالىق تادەي پوگاچار مەن 2019 جانە 2020 جىلدارعى «يسپانيا ۆۋەلتاسىندا» توپ جارعان ونىڭ وتانداسى پريموج روگليچ, وسى جارىستىڭ 2018 جىلعى جەڭىمپازى بريتانيالىق گەراينت توماس, «تۋر دە فرانس» باسەكەسىنىڭ ءتورت دۇركىن (2013, 2015, 2016, 2017) جەڭىمپازى, «يسپانيا ۆۋەلتاسى» (2017) مەن «دجيرو د’يتاليا» (2018) دوداسىندا ءبىر مارتەدەن دارا شىققان تاعى ءبىر بريتانيالىق كريس فرۋم, 2019 جىلعى «دجيرو د’يتاليا» دوداسىنىڭ باس جۇلدەسىن ولجالاعان ەكۆادورلىق ريچارد كاراپاس, سونداي-اق سايمون يەيتس ( ۇلىبريتانيا), ريچي پورت (اۋستراليا), ەستەبان چاۆەس (كولۋمبيا), بىلتىر «استانا» ساپىندا جاسىنداي جارقىلداعان كولۋمبيالىق ميگەل انحەل لوپەس سەكىلدى اتاقتى ۆەلوشاباندوزدار مەن تاعى باسقا سپورتشىلار وسى جارىستىڭ كورىگىن قىزدىرۋدا.
اتالعان جارىسقا قازاقستاندىق-كانادالىق Astana-Premier Tech ۆەلوكومانداسىنان الەكس ارانبۋرۋ (يسپانيا), ستەفان دە بود (وار), دميتري گرۋزدەۆ (قازاقستان), الەكسەي لۋتسەنكو (قازاقستان), يون يساگيررە (يسپانيا), ومار فرايلە (يسپانيا), ياكوب فۋلسانگ (دانيا), ۋگو ۋل (كانادا) سەكىلدى سپورتشىلار قاتىسىپ, باس جۇلدە ءۇشىن سىنعا تۇسەدى. ارينە جانكۇيەرلەر دە, كلۋب باسشىلىعى دا بۇل قۇراممەن جارىستىڭ كوشىن باستاۋ وڭاي ەمەس ەكەنىن جاقسى تۇسىنەدى. سوندىقتان كوماندا بيىل جالپى تۋردا ەمەس, جەكەلەي كەزەڭدەردە جەڭىسكە جەتۋدى كوزدەيدى.
– بيىل «تۋر دە فرانستا» ءبىز جەكە كەزەڭدەرگە نازار اۋدارامىز. قازىردىڭ وزىندە كەزەڭ جەڭىمپازدارى – الەكسەي لۋتسەنكو, يون يساگيررە جانە يسپانيانىڭ جاڭا چەمپيونى ومار فرايلە بار مىقتى جانە جىگەرلى سپورتشىلارمەن فرانتسياعا كەلدىك. سونىمەن قاتار بىزدە ەكى مونۋمەنتالدى كلاسسيكالىق جارىستىڭ جەڭىمپازى ياكوب فۋلسانگ, تاجىريبەلى دميتري گرۋزدەۆ, كوشباسشى مامان ۋگو ۋل جانە ەكى دەبيۋتانت – الەكس ارانبۋرۋ مەن ستەفان دە بود بار. كوماندا وتە مىقتى جانە ءبىز جىگىتتەرگە كەزەڭدەردە جەڭىس ءۇشىن كۇرەسۋگە ەركىندىك بەرۋدى جوسپارلاپ وتىرمىز. گراند-تۋردا, اسىرەسە «تۋر دە فرانستا» جەڭىسكە جەتۋ وڭاي شارۋا ەمەس. بىراق مەن بىلتىرعىداي جەتىستىككە جەتەتىنىمىزگە سەنىمدىمىن جانە Astana-Premier Tech جەيدەسى الدا بىرنەشە رەت جارقىرايتىن بولادى, – دەدى كوماندانىڭ سپورت مەنەدجەرى دميتري فوفونوۆ.
برەست پەن لاندەرنو قالالارىن جالعاعان ءتۋرنيردىڭ العاشقى كەزەڭىندە جۋليان الافيليپپ (Deceuninck-Quick Step) جەڭىمپاز اتاندى. 197,8 شاقىرىمعا سوزىلعان قاشىقتىقتى فرانتسيالىق ۆەلوشاباندوز 4 ساعات 39 مينۋت 05 سەكۋندتا باعىندىردى. الافيليپپتەن 8 سەكۋندقا قالىپ قويعان اۋستراليالىق مايكل مەتتيۋس (BikeExchange) ەكىنشى ورىنعا تابان تىرەسە, ۇزدىك ۇشتىكتى پريموج روگليچ (Jumbo-Visma) تۇيىندەدى.
Astana-Premier Tech كومانداسىنان ءبىرىنشى كەزەڭدە ەڭ ۇزدىك ناتيجەگە وتانداسىمىز الەكسەي لۋتسەنكو قول جەتكىزدى. مارە سىزىعىن 14-ءشى بولىپ كەسكەن لۋتسەنكو جەڭىمپازدان 8 سەكۋندقا قالىپ قويدى. سونىمەن قاتار قالىڭ توپپەن بىرگە كەلگەن «استانانىڭ» تاعى ەكى وكىلى – ياكوب فۋلسانگ پەن الەكس ارانبۋرۋ 21 جانە 23-ورىندارعا جايعاستى.
182,9 شاقىرىمعا سوزىلعان ەكىنشى كەزەڭدە 2020 جىلدىڭ قورىتىندىسى بويىنشا جىلدىڭ ەڭ ۇزدىك ۆەلوكومانداسى اتانعان بەلگيانىڭ Alpecin-Fenix كلۋبىندا ونەر كورسەتەتىن ماتە ۆان دەر پۋل مارە سىزىعىن ءبىرىنشى بولىپ كەستى. نيدەرلاند ۆەلوشاباندوزى پەرروس-گيرەك جانە ميۋر-دە-برەتان قالالارىن جالعاعان جارىس جولىن 4 ساعات 18 مينۋت 30 سەكۋندتا ءجۇرىپ ءوتتى. جەڭىمپازدان 6 سەكۋندقا قالىپ قويعان سلوۆەنيالىق سپورتشىلار – تادەي پوگاچار (UAE Team Emirates) مەن پريموج روگليچ (Jumbo-Visma) ەكىنشى جانە ءۇشىنشى ورىنداردى ءوزارا ءبولىستى. «استانا» ساپىنان بۇل كەزەڭدە تاعى دا الەكسەي لۋتسەنكو ۇزدىك بولدى. ول مارەگە تادەي پوگاچار باستاعان توپپەن بىرگە كەلىپ, جالپى ەسەپتە 16-شى بولدى.
ەكى كەزەڭنىڭ قورىتىندىسى بويىنشا جالپى ەسەپتە ماتە ۆان دەر پۋل كوش باستادى. ونى فرانتسيالىق ۆەلوشاباندوز جيۋليان الافيليپپ (Deceuninck-Quick Step) پەن بىلتىرعى جەڭىمپاز تادەي پوگاچار وكشەلەپ كەلەدى.
