فۋتبول • 29 ماۋسىم، 2021

رونالدۋ چەمپيوناتپەن قوش ايتىستى

35 رەت كورسەتىلدى

 

ەۋروپا چەمپيوناتىنىڭ كەزەكتى جارىس كۇنىندە پلەي-وفف كەزەڭىنىڭ تاعى ەكى ويى­نى ءوتتى. بۋداپەشتتە نيدەرلاند پەن چەحيا شيرەك فينالدىڭ جولداماسىن ساراپقا سالسا، سەۆيليادا بەلگيا مەن پورتۋگاليا قۇرامالارى باق سىنادى.

سوڭعى ەكى ۇجىمنىڭ پلەي-وفف باسەكەسىندەگى ماتچى جان­كۇي­ەرلەر تاراپىنان ۇلكەن قىزى­عۋشىلىق تۋدىرعان ەدى. ويتكەنى ءبىرى قۇرامالار اراسىندا فيفا رەيتينگىندە كوش باستاپ تۇرسا، ەكىنشىسى ەۋروپانىڭ ازىرشە ەڭ سوڭعى چەمپيونى سانالادى. سون­دىقتان ەكى قۇرامانىڭ دا بيىلعى ماقساتى جوعارىداعى اتاقتارىنا ساي ءوز مىقتىلىعىن دالەلدەۋ بولاتىن.

پورتۋگاليا توپتىق كە­زەڭ­دە ەرەكشە ويىنىمەن جانكۇي­ەر­لەردىڭ كوڭىلىنەن شىقتى دەپ ايتا المايمىز. رونالدۋ باس­تاعان ۇجىم ماجارستاندى قيىن­شىلىقپەن جەڭىپ، توپتان ءبىرىنشى ورىنمەن شىعۋدى كوزدەگەن فرانتسۋزدارمەن تەڭ ويناپ، نەمىستەردەن وڭباي جەڭىلىپ، توپتىق كەزەڭدى ءۇشىنشى ورىنمەن اياقتادى. پور­تۋ­گاليا وسىدان بەس جىل بۇرىن چەم­پيون بولعان كەزدە دە توپتىق كەزەڭدەگى ءۇش ماتچ­تا تەڭ ويناپ، ءۇشىنشى ورىنمەن كەلەسى كەزەڭگە شىققان بولاتىن. بيىل بۇل ساي­كەستىك پورتۋگالياعا ساتتىلىك اكەلە المادى. 

دەي تۇرعانمەن، بەلگيالىقتار دا توپتىق كەزەڭدە مىقتى وينادى دەپ ايتۋ قيىن. بىراق روبەرتو مار­تينەس شاكىرتتەرى ءۇش ويىندا تو­عىز ۇپاي جيناپ، 100 پايىزدىق كورسەتكىشپەن كەلەسى كەزەڭگە جولداما الدى. ەگەر بايقاعان بولساڭىزدار، بەلگيا ءار ويىندا بار كۇشىن جۇمساپ وينامايدى. كەشەگى پورتۋگالياعا قارسى وتكەن ويىندا دا ولار ءالى بار كۇشىمەن جۇمساۋعا اسىقپايتىنىن كورسەتتى.

ماتچ باسىندا پورتۋگاليا قار­سى­لاستى قارسى شابۋىلدا قاپى قال­دىرۋدى كوزدەگەنىمەن، ديوگۋ جوتا ءوز مۇمكىندىكتەرىن ءتيىمدى پاي­دالانا ال­مادى. كەيىننەن بەل­گيالىقتار پوزي­تسيالىق شابۋىل­عا كوشىپ، جانكۇيەرلەردى ءبىراز زە­رىكتىرىپ السا دا، ماتچ سوڭىندا جەڭىسكە جەتتى. ءبىرىن­شى تايمنىڭ 42-مينۋتىندا تورگان ازاردىڭ الىستان تەپكەن دوبى قاقپا­شىعا ىڭعايسىزدىق تۋدىرىپ، دوپ قاقپا تورىنەن تابىلدى.

پورتۋگاليا قۇراماسى ماتچ بويى بەلگيا قاقپاسىنا 23 مارتە ءدال سوق­قى جاساعانىمەن، ونىڭ بىردە-بىرەۋى قاقپا تورىنان تابىلمادى. ال ماتچ بويى ءبىر عانا ءدال سوققى جاسا­عان مارتينەس شاكىرتتەرى كەلەسى كەزەڭ­گە شىقتى. رونالدۋدى رەكوردسىز قال­دىر­عان بەلگيا ەندى شيرەك فينالدا اۋس­تريانى ارەڭ جەڭگەن يتاليا قۇراما­سىمەن جولىعادى.

توپتىق كەزەڭدە جيناقى ويىن كور­سەتىپ، مۇمكىن بولعان توعىز ۇپايدىڭ ءبارىن شاشپاي-توك­پەي جيناپ العان نيدەرلاند قۇرا­ماسىن فۋتبول ماماندارى چەم­پيوندىقتان ۇمىتكەر كو­مان­دالار­دىڭ قاتارىنا قوسقان ەدى. ال توپ­تىق كەزەڭدە 4 ۇپايمەن ءۇشىن­شى ورىن الىپ، قوسىمشا جولداما­مەن كەلە­سى كەزەڭگە شىققان چەحيا قۇرا­ماسى ەۋروداعى جورىعىن پلەي-وفف كە­زەڭىندە اياقتايدى دەگەندەر كوپ بول­عان-دى. مامانداردىڭ سەنىم­­سىز­دىگىنە يە بولعان سول چەحيا بارلىق بول­جامنىڭ كۇل-تالقانىن شىعارىپ، ەۋرودا كىشىگىرىم سەنساتسيا جاسادى. 

چەحيانى چەمپيونات بويى ورگە سۇيرەپ كەلە جاتقان پاتريك شيك بۇل جولى دا قۇراماسىن شيرەك فينال­عا الىپ شىقتى. ءبىرىنشى تايمدا قۇرا­مالاردىڭ كۇشى تەڭ بولىپ، ۇزىلىسكە دە 0:0 ەسەبىمەن تارقاستى. ەكىنشى تايم­دى دا ەكى ۇجىم تاپ-تاماشا باستا­عان بولاتىن. الايدا ويىننىڭ 55-مي­نۋتىنداعى جاعداي كەزدەسۋ سۋرە­تىن 180 گرادۋسقا وزگەرتىپ جىبەردى. ما­تچتى باسقارعان رەسەيلىك تورەشى سەرگەي كاراسەۆ ويىن ءتارتىبىن بۇزعان نيدەرلاند قۇراماسىنىڭ قورعاۋشىسى  ماتتەيس دە ليگتكە العاش سارى قاعاز كورسەتكەنىمەن، كەيىننەن ۆار جۇيەسىندە وتىرعان ۆيدەواسسيستەنتىنىڭ كەڭەسىنەن سوڭ بەينەقايتالاۋدى كورىپ، قاعاز ءتۇسىن قىزىلعا وزگەرتتى. بۇل – وسى چەمپيوناتتاعى ءتورتىنشى قى­زىل قاعاز. بۇعان دەيىن گجەگوش كرىحوۆياك (پولشا)، گارري ۋيل­سون (ۋەلس) جانە يتان امپادۋ (ۋەلس) سەكىلدى فۋتبولشىلار الاڭنان قۋىلعان ەدى.

الاڭدا ءبىر ويىنشى كەم بولعانىنا قاراماستان، نيدەرلاند فۋتبولشىلارى 10 مينۋتتان اسا ۋاقىت شابۋىلدا دا، قورعانىستا دا ءتاۋىر ويناپ جاتقان ەدى. بىراق ءبارىبىر ويىندا ءبىر ادام كوپ بولىپ ويناعان چەحيا قۇراماسى 68-مينۋتتا ەسەپتى اشتى. گول اۆتورى – توماش حولەش. ارادا كوپ وتپەي شابۋىلدا تىنىپ-تىنشىمايتىن پاتريك شيك چەمپيوناتتاعى ءتورتىنشى گولىن سوعىپ، ويىننىڭ نۇكتەسىن قويدى. قورىتىندى ەسەپ – 0:2.

چەحيا جارتىلاي فينالعا شى­عۋ ءۇشىن شيرەك فينالدا ۋەلس قۇ­را­ما­سىن جارىس جولىنان شىعارىپ جى­بەرگەن دانيا فۋتبولشىلارىمەن كەزدەسەدى.

 

 

سوڭعى جاڭالىقتار

جىل ءسوزى

الەم • بۇگىن، 20:36

ەنەرگەتيكا – ەكونوميكا درايۆەرى

ەكونوميكا • بۇگىن، 20:31

قۇلدىرامايتىن قۇندىلىق

تانىم • بۇگىن، 20:20

اۋعانستاندا جارىلىس بولدى

الەم • بۇگىن، 12:21

ۇقساس جاڭالىقتار