بۇگىندە نۇر-سۇلتان قالاسىمەن قاتار الماتى قالاسى جانە اتىراۋ, باتىس قازاقستان جانە قاراعاندى وبلىستارى «قىزىل ايماق» قاتارىندا تۇر. ال «سارى ايماقتا» شىمكەنت قالاسى جانە قوستاناي, ماڭعىستاۋ وبلىستارى بار. قالعان وڭىرلەر – «جاسىل ايماقتا».
وتكەن اپتادا كوروناۆيرۋستىڭ جاڭا شتامى – ء«ۇندى» شتامىنىڭ انىقتالۋىنا بايلانىستى ەلوردادا كارانتين تالاپتارىن قاتايتۋ تۋرالى شەشىمدەر قابىلدانعان. ونسىز دا قانشا ۋاقىتتان بەرى «قىزىلدىڭ» قۇرساۋىندا تۇرعان نۇر-سۇلتان قالاسىنا ساقتىق شارالارىن كۇشەيتپەسە بولمايدى. ال جاقىندا عانا «قىزىل ايماققا» قوسىلعان ءتورت وڭىردە دە شەكتەۋ تالاپتارى قايتا قاراستىرىلىپ, سول ايماقتارداعى باس مەملەكەتتىك سانيتارلىق دارىگەرلەردىڭ قاۋلىسىنا وزگەرىستەر ەنگىزىلدى.
جالپى كارانتين تالاپتارىن قانشا جەردەن كۇشەيتكەنمەن, ىندەتكە تويتارىس بەرۋدىڭ باستى «قارۋى» ۆاكتسينالاۋ ەكەنى تۇسىنىكتى. دەگەنمەن قازىرگى شىرعالاڭ شاقتاعى وسى ماڭىزدى ءىس-شارانىڭ ىلگەرىلەۋى ويداعىداي بولماي تۇر. سوندىقتان وڭىرلەردە ۆاكتسينالاۋدىڭ قارقىنىن ارتتىرۋعا بارىنشا كۇش سالىنىپ جاتىر. بۇل رەتتە, البەتتە, حالىقتىڭ ۆاكتسينانى ەرىكتى تۇردە قابىلداۋ قۇقى ساقتالادى. تەك كوپشىلىك ۆاكتسينالاۋدى ءوزىنىڭ عانا ەمەس, اينالاسىنداعىلاردىڭ دا اماندىعى ءۇشىن قاجەت ەكەنىن ءارى قالىپتى تىرشىلىككە ورالۋدىڭ جولى ەكەنىن ءتۇسىنۋ كەرەك. 27 ماۋسىمداعى مالىمەت بويىنشا ەلىمىزدە ءبىرىنشى كومپونەنتپەن 3 130 095 ادام, ەكىنشى كومپونەنتپەن 1 891 022 ادام ۆاكتسينا سالدىردى.
قازاقستان ۆاكتسينالاۋ كولەمى بويىنشا الەمدە 42-ورىندى الدى. Our World in data ونلاين-باسىلىمى جاساعان رەيتينگتە قازاقستاندا ءاربىر ونىنشى ازامات ۆاكتسينا العانى كورسەتىلگەن. جالپى مۇندا ءبىزدىڭ ەلدە 1,79 ملن ادام ۆاكتسينالانىپ, بۇل حالىقتىڭ 9,4%-دى قۇرايتىنى ايتىلعان. ال اتالعان رەيتينگتە كوش باستاعان قىتايدا 223 ملن ادام ۆاكتسينا سالدىرعان, بىراق بۇل حالىقتىڭ تەك 15%-ى عانا ەكەن.
