وبلىستىق دەنساۋلىق ساقتاۋ باسقارماسىنىڭ مالىمەتىنشە, ۋاقىتتىڭ ۇلكەن ايىرماشىلىعىنا قاراماستان, تاراپتار ونلاين-كەزدەسۋ وتكىزىپ, كوروناۆيرۋس ينفەكتسياسىن ەمدەۋدىڭ قىر-سىرىن تالقىلاي الدى.
مەديتسينا عىلىمدارىنىڭ دوكتورى بەندجامين بودنار پاۆلودارلىق ارىپتەستەرىنە ترومبوز قاۋپى جوعارى پاتسيەنتتەردە انتيكواگۋليانتتىق تەراپيا جانە جۇرەكتىڭ يشەميالىق اۋرۋى, قانت ديابەتى جانە سەمىزدىك سياقتى ىلەسپە اۋرۋلارى بار پاتسيەنتتەرگە قارقىندى تەراپيا جۇرگىزۋ تۋرالى ايتىپ بەردى. دجونس حوپكينس ۋنيۆەرسيتەتىنىڭ پۋلمونولوگيا جانە رەانيماتسيا سالاسىنداعى عىلىمي قىزمەتكەرى رەبەككا دەزۋب سوزىلمالى وكپە پاتولوگياسى بار ناۋقاستاردا وكپەنى جاساندى جەلدەتۋدىڭ ءرولى جانە وكپەنى جاساندى جولمەن جەلدەتۋدى جۇرگىزۋ كەزىڭدەگى اسقىنۋلار تۋرالى بايانداما جاسادى.
سونىمەن قاتار ول COVID-19 ەمدەۋدەگى باكتەرياعا قارسى تەراپيا تاجىريبەسىمەن ءبولىستى.
«ۆەبيناردا تالقىلاعان كەيبىر ماسەلەلەر ءالى كۇنگە دەيىن داۋلى بولىپ كەلەدى - بۇل ەتيوتروپتى, پاتوگەنەتيكالىق ەمدەۋ, تسيتوكيندىك داۋىل, رەسپيراتورلىق جانە باكتەرياعا قارسى تەراپيا ماسەلەلەرى. مەنى انتيكواگۋليانتتىق تەراپيا تاقىرىبى قىزىقتىردى. مەن امەريكالىق ماماندار وعان قانداي كورسەتىلىمدەر بەرەتىنىن جانە قانداي انتيكواگۋليانتتارعا ارتىقشىلىق بەرەتىنىن بىلگىم كەلدى. ولار ءبىز سياقتى دارىلەردى - فراكتسيالانباعان جانە تومەن مولەكۋلالى گەپاريندەردى قولداناتىنى بەلگىلى بولدى», دەيدى پاۆلودار وبلىسىنىڭ شتاتتان تىس باس انەستەزيولوگ-رەانيماتولوگى يننا گلوۆاتسكايا.
ۆەبينارعا مەديتسينا قىزمەتكەرلەرىنەن باسقا قازاقستاننىڭ سان-فرانتسيسكوداعى باس كونسۋلى ازامات ءابدىرايىموۆ, پاۆلودار وبلىسى اكىمىنىڭ ورىنباسارى ايزادا قۇرمانوۆا جانە وبلىستىق دەنساۋلىق ساقتاۋ باسقارماسىنىڭ باسشىسى ايدار سەيىتقازينوۆ قاتىستى.
«بىزگە اقش-تاعى پاتسيەنتتەردى سۇرىپتاۋ بويىنشا ترياج-جۇيەسىنە قانداي ءتاسىل قاجەت ەكەنى قىزىق بولدى. جالپى, مۇنداي تاجىريبە الماسۋ بۇگىندە كوروناۆيرۋس ينفەكتسياسىن ەمدەۋمەن اينالىساتىن مەديتسينا قىزمەتكەرلەرىمىزگە پايدالى بولدى. ءبىز COVID-19 بار پاتسيەنتتەرگە مەديتسينالىق كومەكتى ۇيىمداستىرۋ تۇرعىسىنان دۇرىس باعىتتا كەلە جاتقانىمىزعا كوز جەتكىزدىك», دەدى ايدار سەيىتقازينوۆ.
دجونس حوپكينس ۋنيۆەرسيتەتى – اقش-تىڭ مەريلەند شتاتىنىڭ بالتيمور قالاسىندا دجونس حوپكينس نەگىزىن قالاعان جەكە زەرتتەۋ ۋنيۆەرسيتەتى. ۋنيۆەرسيتەتتىڭ فيليالدارى قىتايدىڭ نانكين جانە يتاليانىڭ بولونيا قالاسىندا ورنالاسقان. 2013 جىلى بۇل جوو الەم ۋنيۆەرسيتەتتەرىنىڭ اكادەميالىق رەيتينگىندە 17-ءشى ورىنعا يە بولدى. مۇندا ءارتۇرلى ۋاقىتتا 36 نوبەل سىيلىعىنىڭ لاۋرەاتتارى جۇمىس ىستەگەن.
حوپكينس ۋنيۆەرسيتەتى بۇگىنگى تاڭدا ناقتى ۋاقىت رەجيمىندە كوروناۆيرۋستىڭ بۇكىل الەمدە تارالۋىن باقىلايدى.
