ولار اقىرىنا دەيىن وزدەرىنىڭ انتىنا ادال بولدى. قىزىلوردا قالاسىندا مەديتسينا ماماندارىنىڭ كاسىبي مەرەكەسى كۇنى وزگەنىڭ ساۋلىعىن قورعاي ءجۇرىپ, ءوز ءومىرىن قيعانداردىڭ ەرلىگىن ەسكە سالىپ تۇراتىن ەسكەرتكىش اشىلدى.
قىزىلوردا جوعارى مەديتسينالىق كوللەدجى اۋلاسىنان ورىن تەپكەن ەسكەرتكىش بەلگىنىڭ اشىلۋ سالتاناتىنا وبلىس اكىمىنىڭ ورىنباسارى بالجان شامەنوۆا, سالا ارداگەرلەرى قاتىستى. وبلىس اكىمىنىڭ ورىنباسارى مەديتسينا قىزمەتكەرلەرىنىڭ ەل دەنساۋلىعىن ساقتاۋ جولىندا اتقارعان قىزمەتىنە لايىقتى باعا بەرىپ, ولاردىڭ تىنىمسىز ەڭبەگىنىڭ ناتيجەسىندە بۇگىندە وڭىردە اۋرۋ دەڭگەيى تومەندەگەنىن اتاپ ءوتتى. سالا ارداگەرلەرى تۇرعانباي ماحانوۆ, رايسا كوزدەنوۆا دەرتپەن الىسقان ارىپتەستەرىنىڭ ەڭبەگىنە تابىس تىلەدى.
– مەن ەل ساۋلىعى جولىندا ءومىرىن قيعان ارىپتەستەرىمىزدى بۇگىنگى زاماننىڭ باتىرلارىنا تەڭەر ەدىم. ولاردىڭ ەرلىگىن ۇمىتپاۋعا, ەل بولىپ ۇلىقتاۋعا ارنالعان ەسكەرتكىش ءۇشىن مەديتسينا قىزمەتكەرلەرى اتىنان العىس بىلدىرەمىن, – دەدى ت.ماحانوۆ.
ىندەتپەن كۇرەستە جان قيعان دارىگەرلەرگە ەسكەرتكىش ورناتۋ يدەياسىنىڭ اۆتورى – Q-Med مەديتسينالىق ورتالىقتارىنىڭ ديرەكتورى راۋشان بازارباي. ول وزگەگە جارىق سىيلاپ, وزدەرى مەرت بولعان ارىپتەستەرىنىڭ ەرلىگىن ەسكە سالاتىن ءمۇسىندى دايىنداۋعا, ورناتۋعا ءوز قاراجاتىن جۇمسادى. ال ديزاينىن جاساعان – بەلگىلى سۋرەتشى الىبەك قويلاقاەۆ. ونىڭ قيالىنان تۋعان دۇنيە قىزىلوردا قالاسىنداعى «نادىر» كومپانياسىندا مۇسىنگە اينالدى.
قورعانىش كوستيۋمىندە جەر شارىن قۇشاقتاپ وتىرعان دارىگەر بەينەسىنىڭ بولاشاق ماماندار دايىندايتىن وقۋ ورنى اۋلاسىنا قويىلۋىندا ءمان بار.
– مەن دارىگەرلەردىڭ ىندەت ءورشىپ تۇرعان كەزدەگى جانقيارلىق ەڭبەگىنە تالاي مارتە كۋا بولدىم. سوندىقتان دا مىڭداعان جاندى ىندەت تىرناعىنان اراشالاپ, وزدەرى قۇربان بولعاندارعا قۇرمەت كورسەتۋ بىلتىردان بەرى ويدا جۇرگەن ءىس ەدى سونىڭ ءساتى بۇگىن ءتۇسىپ جاتىر. وسى كوللەدجدە ءبىلىم الىپ جاتقان بولاشاق ماماندارعا انتىنا ادال بولعان اعا بۋىن ارىپتەستەرىنىڭ ەرلىگى ۇلگى بولادى دەگەن ويدامىن, – دەيدى ر.بازارباي.
سىر وڭىرىندە كوروناۆيرۋسپەن كۇرەسكە جۇمىلعان ماماندار اراسىنان 19 مەديتسينا قىزمەتكەرى قايتىس بولدى. شاراعا ولاردىڭ تۋىستارى قاتىسىپ, ەسكەرتكىشكە گۇل شوقتارىن قويدى.
قىزىلوردا
