ايماقتار • 18 ماۋسىم، 2021

ەلوردادا جاستاردى الەۋمەتتەندىرۋگە ارنالعان جوبا جۇزەگە اسىپ جاتىر

31 رەت كورسەتىلدى

بيىل 2021-2023 جىلدارعا ارنالعان «Elorda Jastary» باعدارلاماسى ازىرلەنىپ، ىسكە قوسىلدى. بۇل باعدارلاما جاستاردى جان-جاقتى قولداۋعا باعىتتالعان. باعدارلاما اياسىندا جاستار ساياساتى ماسەلەلەرى باسقارماسىنىڭ قولداۋىمەن NEET ساناتىنداعى جاستاردى الەۋمەتتەندىرۋگە باعىتتالعان «Transformation» جوباسى جۇزەگە اسىپ جاتىر، دەپ حابارلايدى ەلوردا اكىمدىگىنىڭ رەسمي سايتى.

NEET ساناتىنداعى جاستار دەگەنىمىز – جۇمىس ىستەمەيتىن (جۇمىسسىزدار جانە جۇمىس كۇشىنەن تىس ادامدار)، ءبىلىم الۋمەن نەمەسە كاسىپتىك وقىتۋمەن اينالىسپايتىندار، ءبىلىم بەرۋ جۇيەسى مەن جۇمىسپەن قامتۋ سفەراسىنان تىس جاستار ساناتى.

«جاستار ساياساتى ماسەلەلەرى باسقارماسىنىڭ قولداۋىمەن جاستاردى قولداۋ ورتالىعى اشىلدى. مۇندا ءبىز NEET ساناتىنداعى جاستارمەن جۇمىس ىستەيمىز. ولار 18-29 جاس ارالىعىندا. بۇل ساناتقا وقۋ اقىسىن تولەۋدە قيىندىق تۋىنداعان جاستار، فريلانسەر سەكىلدى جاستار جاتادى. ورتالىقتا سەمينار-ترەنينگتەر، قىسقا مەرزىمدى كۋرستار مەن ءتۇرلى ءىس-شارالار ۇيىمداستىرىلادى. قۇقىقتىق جانە پسيحولوگيالىق كەڭەس بەرىلىپ، جاستار جۇمىسقا ورنالاستىرىلدى»، دەيدى جاستاردى قولداۋ ورتالىعىنىڭ الەۋمەتتىك قىزمەتكەرى اسەم ورالحانوۆا.

2021 جىلدىڭ ءبىرىنشى توقسانىندا NEET جاستارىنىڭ رەسپۋبليكاداعى ۇلەسى 6،8%-دى قۇرادى. ەلوردادا 2021 جىلدىڭ ءبىرىنشى توقسانىندا NEET جاستارىنىڭ ۇلەسى 7%-دى قۇرادى، بۇل 2020 جىلدىڭ سايكەس كەزەڭىنەن جوعارى (2020 جىلدىڭ ءبىرىنشى توقسانى – 6،9%).

«ورتالىعىمىزدا قازاق، اعىلشىن، اراب تىلدەرىن، سول سياقتى جول قوزعالىسى ەرەجەلەرىن، گيتارادا ويناۋدى ۇيرەتەتىن تەگىن ۇيىرمەلەر بار»، دەيدى جاستاردى قولداۋ ورتالىعىنىڭ زاڭگەرى ەرىك قوجاحمەتوۆ.

جىل باسىنان بەرى ورتالىققا NEET ساناتىنداعى جانە پروباتسيا قىزمەتىنىڭ ەسەبىندە تۇرعان 18-29 جاس ارالىعىنداعى 132 ادام قابىلداندى. ورتالىق اباي كوشەسى 92/3 مەكەنجايىندا ورنالاسقان.

سوڭعى جاڭالىقتار

ۇقساس جاڭالىقتار