قازاقستان • 18 ماۋسىم، 2021

اسەت يسەكەشەۆ اۋعانستان پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسىمەن كەلىسسوز جۇرگىزدى

31 رەت كورسەتىلدى

نۇر-سۇلتان قالاسىندا قازاقستان پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى اسەت يسەكەشەۆ اۋعانستان پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى حامدۋللا موحيبپەن كەلىسسوز جۇرگىزدى، دەپ حابارلايدى Egemen.kz اقورداعا سىلتەمە جاساپ.

اتالعان ءىس-شارا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پەن اۋعانستان يسلام رەسپۋبليكاسىنىڭ پرەزيدەنتى اشراف عاني اراسىنداعى قول جەتكىزىلگەن ۋاعدالاستىقتار اياسىندا ءوتتى.

كەلىسسوز بارىسىندا تاراپتار وڭىرلىك جانە جاھاندىق قاۋىپسىزدىكتىڭ جاي-كۇيى، ورتالىق ازياداعى قازىرگى سىن-قاتەرلەر، حالىقارالىق ۇيىمدار اياسىنداعى ىنتىماقتاستىقتى ودان ءارى نىعايتۋ باعىتتارى جونىندە پىكىر الماستى.

سونداي-اق اۋعانستاننان اقش پەن ونىڭ ناتو-داعى وداقتاستارى اسكەرلەرىنىڭ شىعۋىنا بايلانىستى احۋالدىڭ دامۋ بارىسى، بۇكىل ءوڭىردىڭ قاۋىپسىزدىگى بويىنشا ەلدىڭ ورنىقتى دامۋىن قامتاماسىز ەتۋ پەرسپەكتيۆالارى تالقىلاندى.

اسەت يسەكەشەۆ حامدۋللا موحيبتى وڭىرلىك تۇراقتىلىقتىڭ نەگىزگى ماسەلەلەرىنە قاتىستى ەلىمىزدىڭ ۇستانىمى تۋرالى حاباردار ەتىپ، اۋعانستانداعى جاعدايدى رەتتەۋ جونىندەگى حالىقارالىق كۇش-جىگەر بۇۇ قامقورلىعىمەن ءوتۋى ءتيىس ەكەنىن اتاپ ءوتتى.

اۋعانستان يسلام رەسپۋبليكاسى پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى ءوز كەزەگىندە اۋعانىشىلىك رەتتەۋ جونىندەگى بەيبىت ۇدەرىستىڭ بارىسىن ەگجەي-تەگجەيلى باياندادى.

بۇدان بولەك اسكەري جانە اسكەري-تەحنيكالىق سالاداعى ىقپالداستىقتىڭ اسپەكتىلەرى، ەسىرتكى تاسىمالى مەن زاڭسىز كوشى-قونعا قارسى ءىس-قيمىل ماسەلەلەرى جانە باسقا دا وزەكتى سىن-قاتەرلەر قاراستىرىلدى.

كەلىسسوز سوڭىندا تاراپتار ورتالىق ازيا وڭىرىندەگى قاۋىپسىزدىكتى قامتاماسىز ەتۋ ءۇشىن ەكى ەل اراسىنداعى ىنتىماقتاستىقتى ارتتىرۋعا نيەتتى ەكەنىن ناقتىلادى.

سوڭعى جاڭالىقتار

ۇقساس جاڭالىقتار