العاش رەت مەكتەپ بەتىن كورىپ, ءارىپ تانىپ اجەلەرىمىزدەن ەستىگەن ەرتەگىنى قاعازدان وقۋدىڭ عانيبەتىن تۇسىنگەنىمىزدەن باستالعان كىتاپقۇمارلىعىمىز ءومىر بويى جالعاسىپ, ءبىر تولاستاعان جوق. ءبىلىمنىڭ ازىعىن, ءومىردىڭ ءمانىن تاسقا باسىلعان پاراقتاردان ىزدەپ كەلەمىز.
بىلگەنگە, ادام بالاسىنىڭ بار جيعانىن وسى كىتاپ بەتىندە قالدىرىپ, اداماتا مەن حاۋانا جەر بەتىنە تۇسكەلى اعىپ جاتقان عاسىرلاردىڭ تاجىريبەسى دە وسىندا باسىلعانداي. ەكى اياقتى پەندەنىڭ ءبىر-بىرىمەن قارىم-قاتىناسىنىڭ, مىنەز-قۇلقىنىڭ سان الۋان سيپاتى, ءومىر ءسۇرۋدىڭ باعا جەتپەس تاجىريبەسىنىڭ شەجىرەسى دە وسىندا. مىقتى اۆتورلاردىڭ مۇراسىن وقىعان سايىن ورەمىز ءوسىپ, دۇنيەتانىمىمىز اياسىنان اسىپ ەرەكشە اقىل-ويدىڭ ۇلگىسىنە ءتانتى بولامىز.
مىنا تىرلىكتە بەيمازا ويلاردان ارىلعىمىز كەلسە دە كىتاپقا ۇڭىلەمىز. كىتاپ-قازىنا توقىعانعا اقىل-كەڭەسىن بەرىپ قويماي, وقىرمانىنىڭ دۇنيەتانىمىن قالىپتاستىرىپ, قۇندىلىعىن قۇنتتاپ, دۇنيەگە باسقا كوزبەن قاراتىپ, جاراتىلىستىڭ قۇپياسىن تانۋعا اسەر ەتە باستايدى. مازالاعان سۇراقتىڭ جاۋابىن كىتاپتان تاپقاندا, كوڭىلىڭ وسەدى. ءومىردىڭ ءمانىن تەرەڭىرەك تۇسىنەسىڭ. اسىرەسە الەم ادەبيەتىنىڭ جاۋھارلارىن تىزبەلەگەن سايىن جاراتىلىستىڭ اقيقاتى ورتاق ەكەنىنە كوزىم جەتىپ كەلەدى. ءتىلى بولەك, ءسوزى بولەك, ادەت-ءداستۇرى مەن ۇستانىمى كەرەعار, بىراق ۇمتىلىسى ءبىر ءبارىنىڭ دە ىزدەگەنى ۇيلەسىم, ىڭكارلىك, ماحاببات. سوندا ءومىر بويىنا ىزدەپ وتەتىنىمىز وسى ۇيلەسىم ەكەن عوي دەپ تاڭعالامىز. ۇيلەسىم دە سان سيپاتتى. ونىڭ باعاسىن كىتاپ وقىعان سايىن پارىقتاي الاسىڭ.
قاي زاماندا بولماسىن, ادامداردىڭ جان ازىعىن كىتاپتان ىزدەۋدىڭ سىرى وسىندا. بۇگىندە بۇكىل الەمگە ەڭ كوپ تاراعان كىتاپتىڭ تيراجى 6 ملpد بولىپتى. تاسقا باسىلعان دۇنيەنىڭ تارالىمى جاعىنان العا شىققان ءىنجىلدى جەر شارىنىڭ تۇرعىندارىنىڭ بارلىق تىلىنە اۋدارىپ, ءالى كۇنگە دەيىن ۇزدىكسىز باسىلۋدا. كەلەسى كەڭ تارالعان باسىلىم Mao تسزەدyننىڭ ايتقان سوزدەرى, ەۋروپاشا ايتقاندا, «قىزىل كىتاپ» ەكەن. ول دۇنيەگە 900 ملن دانامەن تارالىپتى. كوپ تارالعان كىتاپتاردىڭ وندىعىندا كوبىمىزگە تانىس انىقتامالىقتار, سوزدىكتەر تاعى باسقا جالپىعا ورتاق وقىلىمدى باسىلىمدار بار. ءبىر قىزىعى, ولاردىڭ ىشىندە كوركەم ادەبيەتتەر جوقتىڭ قاسى. سەبەبى تۇسىنىكتى. كوركەم ادەبيەت – تەك ءسوزدىڭ پارقىن بىلەتىندەردىڭ عانا ءتىسى باتاتىن – اسىل قازىنا.
قازىر ءار تاراپتان اقپاراتتىڭ قۇيىلىپ جاتقان ۋاقىتى. اركىم قال-قادەرىنشە اقپاراتىمەن بولىسۋگە اسىعادى. سول ءنوپىر شىنايى وقىرمانداردىڭ التىن ۋاقىتىن اياۋسىز تارتىپ الىپ جاتىر. تاۋلىگىنە وزىمىزگە قاجەتتى دۇنيەنى كىتاپقا ۇڭىلدىرۋگە مۇرشا بەرمەي, جارقىراۋىق وتكەن-كەتكەن دۇنيەلەرمەن باسىمىزدى تولتىرىپ الاتىن بولدىق. اقىرىندا, باس-اياعى جوق ازىن-اۋلاق ارزىمايتىن نارسەلەرگە توقمەيىلسىپ, ىزدەنبەيتىن كۇيگە جەتتىك. دۇنيەنىڭ شۇرق تەسىگىنەن اتقىلاعان اقپارات لەگى ەمەس, ءبىزدىڭ ىشكى الەمىمىزگە, جان دۇنيەمىزگە جارىق تۇسىرەتىن – ۇلى دۇنيەلەر. ول ءۇشىن كۇن ساناپ, قولىمىز قالت ەتكەندە كىتاپتى پاراقتاپ ىجداعاتتىلىق تانىتۋىمىز كەرەك. بارا-بارا ينەمەن قۇدىق قازعانداي العان ءبىلىمىمىز شالقار كولگە اينالادى. جاعالاۋىندا جەلكىلدەپ وسكەن قۇراقتاي جان دۇنيەڭىز قۇلپىرىپ سالا بەرەدى.
بۇگىندە بار ۋاقىتىن گادجەتتەر مەن ينتەرنەتكە زايا ەتكەندەرگە جانىم اشيدى. كلاسسيكالىق دۇنيەلەردىڭ ۇلى تۇلعالارىنىڭ ماڭگىلىك ۇلگىسىن بىلمەي وتكەن ءومىرزايا وسى عوي. تەلەديداردان باستالىپ قول تەلەفونمەن اياقتالعالى, (مۇمكىن ءالى دە ء«ومىر جەگىش» زاتتار پايدا بولار) ادام بالاسىنىڭ ءبىر كەمدىگى ارتىپ, بىلىمسىزدىگى, كەڭ ويلاي المايتىندىعى, جاسامپازدىعى جوعالىپ بارادى. اۋزىنداعى ايتار ءسوزى دە ازايىپ, ويىنداعىسىن جەتكىزۋگە شورقاق.
كىتاپ وقۋعا دا ماشىقتانعان ءجون.
ءوز باسىم بىرنەشە كىتاپتى قاتار وقيمىن. قايتالاپ وقيتىن, مۇقاباسى مۇجىلگەن كىتاپتارىم دا جوق ەمەس. باسپادان جاڭا شىققان, ارىپتەرى ۇلكەن كوركەم بەزەندىرىلگەن كىتاپتى العاش قولىما العاندا كوڭىلمەن بىرگە كوزىم دە قۋانادى. سىرتقى سانىنە مازمۇنى ساي كەلسە, ول دا ءبىر مەرەكە. كەيدە قىزىق ەمەس دەپ كەيىنگە قالدىرعان اۆتورلارىم دا تارتىمدى بولاتىن كەزى بولادى. سونداي قۇپيالى, ءاربىر جولى سىرعا تولى اۆتورلارىم جەتكىلىكتى. مىسالى, ابايدان كەيىن ماعجاندى وقىسام اقىلىم تولىپ, جۇمەكەندى جاتتاسام, كەمەلدەنگەندەي بولامىن. مۇقاعاليدى وقىعان سايىن جۇرەگىمنىڭ كىرى كەتىپ جەڭىلدەپ قالامىن. الىپ مۇحتاردىڭ مىسى باسادى, ءتىلى توگىلىپ تۇرعان ابىشتەن كەيىن قالامىم قامشى سالدىرماي, وزىنەن ءوزى جەلىپ كەتەدى. تىنىمباي اعاممەن بىرگە, بەيىمبەتتى ەسكە الىپ مەن دە ومىرگە قاراپ جادىراپ ءبىر ك ۇلىپ الامىن. ايتا بەرسەڭ, ارقايسىسىنىڭ ادامعا اسەرى ءارتۇرلى. ونى سەزىنۋدىڭ ءوزى عاجاپ. وقىعان كىتاپتان العانىڭىز بولماسا, مىنا دۇنيەنى تانىپ, ادامداردىڭ ءىس-ارەكەتىن باعامداۋ قيىنعا سوعار. ماحابباتسىز عانا ەمەس, كىتاپسىز وتكەن ءومىردىڭ دە ماعىناسىز تىرشىلىك ەكەنىن ۇمىتپايىقشى.
امانگەلدى كەڭشىلىك ۇلى
