ەلوردا 20 جىلدىڭ ىشىندە قاناتىن كەڭگە جايدى. ەسىلدىڭ ەكى بەتى قايناعان تىرلىك. وڭ جاعالاۋ ەسكى تاريح, قازىنالى شەجىرە بولسا, سول جاعالاۋ ەرتەڭگە ۇمتىلعان, بولاشاقتىڭ بەينەسى ىسپەتتى. ءتىپتى قالا حالقىنىڭ تەڭ جارتىسى سول جاعالاۋدى مەكەندەيتىندەي كورىنەدى كەيدە. مۇندا استانالىقتار مەن بارلىق قازاقستاندىققا جوعارى دەڭگەيدە ءتۇرلى مەديتسينالىق كومەك كورسەتەتىن زاماناۋي ورتالىقتار كوپ ورنالاسقان. ۇلتتىق نەيروحيرۋرگيا, كارديولوگيا, ونكولوگيا, انا مەن بالا, رەسپۋبليكالىق دياگنوستيكالىق ورتالىق سىندى كلينيكالار قاتار تۇزەگەنىمەن, تۇرعىندارعا ارنالعان كادۋىلگى قالالىق ەمحانا بىرەۋ عانا. بۇل – №9 قالالىق ەمحانا. سوندىقتان دا ەسىگى ءبىر جابىلمايدى, تىركەلگەندەردىڭ دە سانى كوپ, قارالۋشىلار دا ءبىر تولاستامايدى. ال دياگنوستيكا بولىمشەسى پاتسيەنتتەردىڭ دياگنوزىن انىقتاۋدا قاراپايىم تالدامالاردان باستاپ, كۇردەلى زەرتتەۋلەر جۇرگىزەدى. الما ساياتقىزى – وسى جۇمىستى رەتتەيتىن, پاتسيەنتتەردىڭ تابانىنان توزباۋىنا مۇددەلى جان.
«ماماندىعىما رازى اداممىن, ءار سىرقاتقا كومەكتەسىپ, ولاردىڭ العىسىن الۋدان ءلاززات الامىن. قاراعاندى مەدينستيتۋتىنىڭ 2-كۋرسىندا وقىپ جۇرگەنبىز. پەرزەنتحاناعا پراكتيكاعا بارىپ, العاش شارانانىڭ شىر ەتكەن ءساتىن كورگەندەگى تولقىنىسىم ءومىرى ەسىمنەن شىققان ەمەس. بالا شار ەتە قالعاندا بۇكىل دەنەم, جان-دۇنيەم سوزبەن جەتكىزە المايتىن كەرەمەت كۇيگە ەندى. مىنە, قۋانىش, ومىرگە ادام وسىلاي كەلەدى, ەندەشە مەن گينەكولوگ بولامىن دەپ شەشتىم. سول ساتتەن باستاپ ماقساتتى تۇردە ارنايى اكۋشەرلىك ۇيىرمەلەرگە بارىپ, ءوزىمدى تەك سوعان دايارلادىم. ال ءبىز وقىپ جۇرگەن ۋاقىتتا جالپى ەمدەۋدەن گورى, ارنايى ماماندىق, كاسىپ يەسى بولۋعا قاتاڭ تالاپتار قويىلاتىن. سونىڭ بارلىعىنان ءوتىپ, بەسكە تاپسىرىپ, اكۋشەر-گينەكولوگ اتاندىم», دەيدى كەيىپكەرىمىز.
بىراق الما ساياتقىزى قاراعاندىدا ەڭبەك جولىن باستاپ, ءوز جۇمىسىن سۇيەتىن, كانىگى مامانعا اينالعاندا جەزقازعان قالاسىنا قونىس اۋدارىپتى. سونداعى دەنساۋلىق ساقتاۋ باسقارماسىنداعىلار «بىزدە اكۋشەر-گينەكولوگتەر بار, ال قات مامان – ونكوگينەكولوگ» دەپ ونى قيىندىعى مەن العىسى مول جاڭا سالاعا باعىتتادى.
«باقىتىما وراي نەسكەن اسانقىزى بەيسەنباەۆا سىندى تاجىريبەلى ونكوگينەكولوگپەن جۇمىستاس بولدىم. سول كىسىدەن كوپ دۇنيە ۇيرەندىم. بىزدە ول كەزدەگى مەدينستيتۋتتاعى ساباق تا, قاراعاندىداعى قالالىق پەرزەتحاناداعى جۇمىستاعى ورتا دا ورىس ءتىلدى بولاتىن. ال جەزقازعاندا وزگەشە, مۇندا مەن قازاقى قارىم-قاتىناسقا, ارىپتەسپەن, پاتسيەنتتەرمەن قازاقشا سويلەۋگە توسەلدىم. ونكوگينەكولوگتىڭ ادام تىرشىلىگىن ۇزارتۋداعى جانكەشتىلىگىن باستان كەشىرىپ, 1988 جىلدان باستاپ 2002 جىلعا دەيىن وسى باعىتتا ايانباي ەڭبەك ەتتىم. ومىرلىك ءبىر مەكتەپتەن ءوتتىم دەسەم بولادى. وبلىس جابىلعاندا ءوزىم ءبىر كەزدە ءبىلىم العان ورداما كەلىپ, ستۋدەنتتەرگە ساباق بەردىم. قازىر سول كەزدە الدىمنان وتكەن جاستار – بىلدەي ماماندار. ەلورداعا كوشىپ كەلگەن سوڭ 2008 جىلدان باستاپ استانا قالاسىندا قوعامدىق دەنساۋلىق سالاسىنا باعىت بۇرىپ, قىزمەتىمدى شىڭدادىم. وسى كۇنگە دەيىن مەديتسينا سالاسىنداعى جالپى ەڭبەك قىزمەتىم 35 جىلدى قۇرايدى ەكەن. 2016 جىلى «دەنساۋلىق ساقتاۋ ىسىنە قوسقان ۇلەسى ءۇشىن» مەدالىمەن ماراپاتتالدىم», دەدى ا.ساياتقىزى.
«دارىگەر بولۋ ءۇشىن ادامعا ەڭ باستىسى نە قاجەت, قانداي قاسيەتتەر بولۋى كەرەك؟» دەگەن ساۋالعا كەيىپكەرىمىز: «ەڭ ءبىرىنشى وسى ماماندىققا دەگەن ۇلكەن ماحاببات بولۋ قاجەت. سونىمەن قاتار وسى ماماندىقتى تاڭداعان ءار دارىگەردە جاۋاپكەرشىلىك, كۇيزەلىسكە قارسى تۇرۋ, زەيىندىلىك, شىنشىلدىق, ءار ناۋقاسقا قاتىستى كاسىبي دۇرىس شەشىم قابىلداۋ قابىلەتى بولۋ كەرەك. كاسىبي دۇرىس شەشىمنىڭ ارتىندا ادام ءومىرى تۇر. ءجۇز رەت ويلانىپ, مىڭ رەت تولعانىپ, ءبىلىمىڭدى جەتىلدىرە ءجۇرىپ, ءار ۋاقىتتا ميىڭنىڭ تۇكپىرىندەگى ءبىلىمىڭ مەن تاجىريبەڭدى باسشىلىققا الىپ, پاتسيەنتكە كومەكتەسۋ كەرەك. ەڭ باستىسى وسى شىعار. ال قازىرگى جۇمىستاعى باستى مىندەتىم – ءبولىمنىڭ تىنىسىن دۇرىس باعىتتا ۇيىمداستىرۋ, دارىگەر جانە ناۋقاس اراسىنداعى شەشىلمەگەن ماسەلەلەردىڭ شەشىمىن تابۋ ءارى دارىگەردىڭ مۇددەسىن قورعاۋ, سونىمەن قاتار اكىمشىلىك تاپسىرمالاردىڭ ۋاقتىلى جانە ناتيجەلى ورىندالۋىن قاداعالاۋ» دەپ جاۋاپ بەردى.
تاجىريبەلى دارىگەر باسشىلىعىمەن جۇمىس ىستەپ جاتقان بولىمشەدەگى ءار ەسىكتىڭ الدى بوس ەمەس ەكەن. الايدا تابلودا جانعان ءنومىر بويىنشا كەزەگىمەن كىرىپ, كەيدە ويلى جۇزبەن, كەيدە العىسىن ايتىپ شىعىپ جاتقان پاتسيەنتتەرگە قاراپ ويلانادى ەكەنسىڭ. جابىعىپ شىققاندار جازىلىپ كەتسە, ال قۋانىپ شىققاندار قايتا قارالىپ, ەمحانا تابالدىرىعىن اتتاماسا دەيسىڭ.
