پرەزيدەنت • 16 ماۋسىم، 2021

توقاەۆ تسويعا دارىگەرلەردى قولداۋدى تاپسىردى

16 رەت كورسەتىلدى

پرەزيدەنت قاسىم-جومارت توقاەۆ دەنساۋلىق ساقتاۋ ءمينيسترى الەكسەي تسويدى قابىلدادى، دەپ حابارلايدى Egemen.kz.

كەزدەسۋدە قاسىم-جومارت توقاەۆقا قازاقستانداعى قازىرگى سانيتارلىق-ەپيدەميولوگيالىق احۋال جانە تۇرعىندارعا ەكپە سالۋ بارىسى تۋرالى ەسەپ بەرىلدى.

ءمينيستردىڭ ايتۋىنشا، جالپى ەلىمىزدەگى احۋال تۇراقتى، وتكەن ايلارمەن سالىستىرعاندا ىندەت جۇقتىرعانداردىڭ سانى ەكى ەسە قىسقارعان. رەسپۋبليكا بويىنشا ءولىم-ءجىتىم كورسەتكىشى 2 اپتانىڭ ىشىندە 1،6 ەسە تومەندەگەن. وڭىرلەردەگى ەپيدەميولوگيالىق احۋالدىڭ جاقسارۋىنا بايلانىستى اۋرۋحانالاردا ەم الىپ جاتقان ناۋقاستاردىڭ سانى ازايعان.

16 ماۋسىمداعى جاعداي بويىنشا مەملەكەت باسشىسىنا ۇسىنىلعان مالىمەتتەرگە سايكەس COVID-19 ىندەتىنە قارسى ۆاكتسينانىڭ ءبىرىنشى كومپونەنتى 2 ميلليون 587 مىڭ ادامعا، ەكىنشى كومپونەنتى 1 ميلليون 480 مىڭ ادامعا سالىنعان. كۇن سايىن شامامەن 80-100 مىڭ ادامعا ەكپە ەگىلەدى. وڭىرلەردە ۆاكتسينا تاپشىلىعى جوق. ۆاكتسينا كەستەگە سايكەس جەتكىزىلىپ جاتىر.

قاسىم-جومارت توقاەۆ حالىقتى ۆاكتسينالاۋ ماسەلەسىنە نازار اۋدارىپ، وڭىرلەر بويىنشا اتالعان باعىتتاعى جۇمىستاردى كۇشەيتۋدى تاپسىردى. 

پرەزيدەنت ەكپە ەگۋ كوروناۆيرۋس ىندەتىن ەڭسەرۋدىڭ بىردەن-ءبىر جولى ەكەنىن ەسكە سالىپ، حالىقتى قازاقستاندا قولجەتىمدى ۆاكتسينالاردى بەلسەندى تۇردە سالعىزۋعا شاقىردى.

مەملەكەت باسشىسى دارىگەرلەردى قورعاۋ ماسەلەسىنە ارنايى توقتالدى. ونىڭ پىكىرىنشە، مەديتسينا قىزمەتكەرلەرىنىڭ قۇقىقتىق جانە الەۋمەتتىك تۇرعىدان قورعالۋى ءالى دە تومەن دەڭگەيدە قالىپ وتىر. وسى ورايدا دارىگەرلەردىڭ مارتەبەسىن ايقىنداۋدىڭ جانە ولاردى ىنتالاندىرۋدىڭ كەشەندى جۇيەسىن ەنگىزۋ قاجەت.

قاسىم-جومارت توقاەۆ الەكسەي تسويعا مەديتسينا قىزمەتكەرلەرىنىڭ مارتەبەسىن قولداۋ جونىندەگى زاڭنامالىق باستامالاردى پىسىقتاۋدى تاپسىردى.

 

سوڭعى جاڭالىقتار

دوللار قايتا قىمباتتاي باستادى

ەكونوميكا • بۇگىن، 11:47

ۇقساس جاڭالىقتار