ايماقتار • 15 ماۋسىم، 2021

ءوندىرىس وركەندەگەن ءوڭىر

23 رەت كورسەتىلدى

قوستاناي وبلىسىندا 6 مىڭ جاڭا جۇمىس ورنىن اشۋعا مۇمكىندىك بەرەتىن جالپى قۇنى 1،5 ترلن تەڭگە تۇراتىن 42 ينۆەستيتسيالىق جوبا جۇزەگە اسىرىلۋدا. مىسالى، بىلتىر قارابالىق اۋدانىنداعى قۇس فابريكاسىن قايتا جانداندىرۋ جۇمىستارى باستالدى. ال وبلىس ورتالىعىنداعى ماشينا جاساۋ زاۋىتى ءوندىرىس اۋقىمىن كەڭەيتىپ، بيىل عانا ىسكە قوسىلعان جاڭا جەلىدەن سوڭعى ۇلگىدەگى كIA اۆتوكولىكتەرىن قۇراستىرا باستادى.

20 مىڭ توننا قۇس ەتى وندىرىلەدى

ونەركاسىپ پەن اۋىل شارۋاشىلىعى قاتار دامىعان قوستاناي وبلىسىندا بيىل بىرقاتار اۋقىمدى جوبا قولعا الىندى. ماسەلەن، بىلتىر وبلىس باسشىلىعى قارابالىق اۋدانىندا ءبىرازدان بەرى تۇرالاپ تۇرعان «كومسومول» قۇس فابريكاسىن قايتا جاڭعىرتۋ تۋرالى شەشىم قابىلداعان. وسىلايشا ماڭىزدى جوبانى جەرگىلىكتى Poultry-Agro جاۋاپكەرشىلىگى شەكتەۋلى سەرىكتەستىگى جۇزەگە اسىرا باستاعان. جىلىنا 20 مىڭ تونناعا دەيىن قۇس ەتىن وندىرەتىن كاسىپورىن ىسكە قوسىلسا، قارابالىقتىڭ ماڭايىنداعى ەلدى مەكەندەردە تۇرىپ جاتقان 260 ادام تۇراقتى جۇمىسپەن قامتىلماق.

14 مامىردا قارابالىق اۋدانىنا جۇمىس ساپارىمەن بارعان ايماق باسشىسى ارحيمەد مۇحامبەتوۆ اۋدان ورتالىعىنداعى قۇس سويۋ پۋنكتىنە ارنايى ات باسىن بۇرىپ، مۇنداعى كۇردەلى جوندەۋ جۇمىستارىنىڭ بارىسىمەن تانىستى. قازىر عيماراتتى جوندەۋ، قايتا جابدىقتاۋ جۇمىستارى قىزۋ ءجۇرىپ جاتىر. قۇرىلىس باسىندا 82 ادام ەڭبەك ەتۋدە. بۇگىنگە دەيىن قۇس سويۋ پۋنكتىنىڭ شاتىرى تولىقتاي جاڭارتىلىپ، عيماراتتىڭ سىرتقى جوندەۋ جۇمىستارى اياقتالعان. تسەح ىشىندەگى الىپ توڭازىتقىشتار قايتا جوندەلىپ، قۇس سوياتىن جانە ەت بولشەكتەيتىن تسەحتارداعى جەلدەتكىش جۇيەسىنىڭ جۇمىسى جونگە كەلتىرىلگەن.

قۇس فابريكاسىنىڭ باس عيماراتى – قارابالىقتىڭ ىرگەسىندەگى گۋريانوۆ اۋىلىندا. مۇنداعى 11 قۇس قورانىڭ شاتىرى الماستىرىلىپ، عيماراتتىڭ سىرتىنا جوندەۋ جۇمىستارى جۇرگىزىلىپ جاتىر. قورالاردىڭ ىشىندەگى قۇس ۇستايتىن ورىنداردىڭ قۇرىلعىلارىن جوندەپ، قالپىنا كەلتىرۋ جۇمىستارى دا ەڭسەرىلىپ قالعان.

Poultry-Agro جاۋاپكەرشىلىگى شەكتەۋلى سەرىكتەستىگىنىڭ باسشىسى قايرات مايشەۆتىڭ ايتۋىنشا، كۇردەلى جوندەۋ جۇمىستارى اياقتالعان سوڭ، بىردەن قۇس فابريكاسى دا ىسكە قوسىلادى. بيىل 5 مىڭ توننا برويلەر ەتىن ءوندىرۋ كوزدەلىپ وتىر. الداعى جىلى ءوندىرىس كولەمى 12،5 مىڭ تونناعا دەيىن ارتادى. ال 2023 جىلعا قاراي كاسىپورىن تولىق وندىرىستىك كۇشىنە ەنگەن سوڭ جىلىنا 20 مىڭ توننادان اسا قۇس ەتىن وندىرەدى.

اۋداننىڭ الەۋمەتتىك-ەكونوميكالىق دامۋىنا تىڭ سەرپىن اكەلەتىن ينۆەستيتسيالىق جوبانىڭ جالپى قۇنى 5،6 ملرد تەڭگە بولادى. قوماقتى قارجىنىڭ كولدەنەڭ كوك اتتىعا جەم بولماي، ءتيىمدى جۇمسالۋىن سىبايلاس جەمقورلىققا قارسى ءىس-قيمىل دەپارتامەنتى قامتاماسىز ەتەدى. جەمقورلىققا قارسى قىزمەت پەن Poultry-Agro سەرىكتەستىگى Protecting Business and Investments جوباسى اياسىندا ءوزارا ىنتىماقتاستىق ورناتىپ، وسىنداي ۇيعارىمعا كەلىپ وتىر.

– ءوزارا ارىپتەستىك شەڭبەرىندە ءبىز بيزنەس وكىلدەرىنە ءتۇرلى بيۋروكراتيالىق كەدەرگىلەردىڭ، مەملەكەتتىك ورگاندار تاراپىنان جاسالۋى مۇمكىن ءجونسىز تەكسەرىستەر مەن توسىن توسقاۋىلداردىڭ بولماۋىن قاداعالايمىز. ال كاسىپكەرگە جەمقورلىق تاۋەكەلدەرىنىڭ پايدا بولۋىنا سەبەپ بولاتىن جاعدايلاردى تۋىنداتپاي، زاڭ شەڭبەرىندە عانا جۇمىس ىستەپ، ءوز بيزنەسىن ادال جۇرگىزۋ مىندەتى جۇكتەلەدى. ءبىزدىڭ باستى ماقساتىمىز – بيزنەسكە قولايلى جاعداي جاساۋ جانە قانداي دا ءبىر سىبايلاس جەمقورلىق تاۋەكەلدەرىنە جول بەرمەۋ، – دەدى سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى قۋانىش بەكباسوۆ.

 

كىا اۆتوكولىگىنە سۇرانىس جوعارى

وبلىستا اۆتوكولىك قۇراستىرۋ ءوندىرىسىنىڭ دامۋ قارقىنى ەرەكشە ەكەنىن ايتا كەتكەن ءجون. ماسەلەن، بيىل ناۋرىز ايىندا «سارىارقااۆتوپروم» سەرىكتەستىگى وزبەكستاندىق ارىپتەستەرىمەن بىرلەسە وتىرىپ Chevrolet اۆتوكولىكتەرىن شىعاراتىن ءوندىرىس ورنىن اشتى. مۇنىڭ سىرتىندا «اگروماشحولدينگ KZ» اق-دا اۋىلشارۋاشىلىق تەحنيكالارىنىڭ بولشەكتەرىن شىعاراتىن لوكاليزاتسيالىق ورتالىقتىڭ قۇرىلىسى ءجۇرىپ جاتىر. وبلىستاعى ماشينا قۇرىلىسىنىڭ ۇلەسى بۇگىندە 50 پايىزعا جۋىقتاعان. ال ماشينا قۇراستىرۋ ءوندىرىسى جىل باسىنان بەرى ءبىر جارىم ەسەگە دەيىن ۇلعايدى. ايماقتا الداعى جىلى كاماز جۇك كولىكتەرىنە ارنالعان جەتەكشى بەلدەمەلەر شىعاراتىن شويىن زاۋىتىن اشۋ جوسپارلانىپ وتىر. بۇلاردىڭ ءبارى – ەكسپورت باعىتىنداعى جوبالار. ءونىمنىڭ 90 پايىزى رەسەيدىڭ «كاماز» زاۋىتىنا جىبەرىلەتىن بولادى.

سونىمەن قاتار قوستانايداعى يندۋستريالىق ايماقتا قۇنى شامامەن 80 ملرد تەڭگە بولاتىن جاڭا شويىن قۇيۋ زاۋىتىنىڭ قۇرىلىسى ءجۇرىپ جاتىر. تاياۋدا عانا قوستانايعا جۇمىس ساپارىمەن كەلگەن «كاماز» جاق باس ديرەكتورىنىڭ ءبىرىنشى ورىنباسارى يۋري گەراسيموۆ وبلىس اكىمىمەن كەزدەستى. ودان كەيىن يندۋستريالىق ايماققا بارىپ، بىرلەسكەن جوبانىڭ جۇزەگە اسىرىلۋ بارىسىمەن تانىستى.

– ءبىز قوستانايداعى KamLitKZ زاۋىتى مەن جەتەكشى بەلدەمە زاۋىتىنىڭ ىسكە قوسىلۋىن اسىعا كۇتىپ وتىرمىز. قازىر بىرلەسكەن جوبا كەزەڭ-كەزەڭىمەن ۋاقتىلى جۇزەگە اسىرىلىپ جاتىر. ەڭ باستىسى، بۇل زاۋىتتاردا جۇمىس ىستەيتىن بولاشاق ماماندار دايارلاۋ ماسەلەسىن قاتار قولعا الىپ وتىرمىز. ماشينا قۇراستىرۋ سالاسىنىڭ ماماندارى بىزگە اسا قاجەت. ءبىز كاماز كولىكتەرىن شىعاراتىن بولساق، كوللەدج سول كولىكتى قۇراستىراتىن مامانداردى دايارلايتىن بولادى. قازىر كوللەدجدە 300-گە جۋىق ستۋدەنت ءبىلىم الىپ جاتىر. ءوز جاتاقحاناسى بار. ونىڭ قۇرىلىسىنا 1 ملرد 300 ملن تەڭگە باعىتتالىپ وتىر. ياعني جان-جاقتى قولداۋ كورسەتىلىپ جاتىر. مەن بۇگىنگى كوللەدج ستۋدەنتتەرىنىڭ ءبىر-ەكى جىلدان سوڭ جاڭا زاۋىتقا جۇمىسقا ورنالاسىپ، ودان ءارى كاسىپورىننىڭ بىلىكتى مامانى بولىپ شىعاتىنىنا سەنىم بىلدىرەمىن، – دەدى «كاماز» جاق باس ديرەكتورىنىڭ ورىنباسارى.

قوستانايدا جاڭا سالىنىپ جاتقان KamLitKZ شويىن زاۋىتى مەن قۇرىلىسىنىڭ ءبىرىنشى كەزەڭى بيىل قازان ايىندا اياقتالادى. زاۋىت 2023 جىلى تۇبەگەيلى سالىنىپ بىتەدى دەپ جوسپارلانىپ وتىر. قۇنى 80 ملرد تەڭگە بولاتىن اۋقىمدى جوبا ىسكە قوسىلسا، مۇندا 300-دەن استام جاڭا جۇمىس ورنى پايدا بولماق.

بيىل قوستانايدا KIA جانە Renault اۆتوموبيلدەرىن قۇراستىراتىن جاڭا جەلى ىسكە قوسىلىپ، ۇزىن سانى 18 ديلەرلىك ورتالىق اشىلدى. بۇگىندە قوستانايدا، سونداي-اق نۇر-سۇلتان، الماتى جانە شىمكەنت شاھارلارىندا ديلەرلىك ورتالىقتار جۇمىس ىستەپ جاتىر. وسىلايشا Sorento، Sportage، Rio كروسسوۆەرلەرى سەكىلدى الەمگە ايگىلى برەندتەر توبىل وڭىرىندە ءوندىرىلىپ، ساۋداعا شىعىپ ۇلگەردى. قازىردىڭ وزىندە وبلىس ورتالىعىندا وسىندا قۇراستىرىلعان ون شاقتى كىا Sorento ماركالى كروسسوۆەرلەرى ءجۇر. قوستانايلىق تەلمان يساەۆ سوڭعى ۇلگىدەگى «اقىلدى» كولىكتىڭ ءبىرىن تاياۋدا عانا ساتىپ الىپتى.

– جاڭا كولىگىمدى تاياۋدا عانا ساتىپ الدىم. قوستانايدا قۇراستىرىلعان. ءمىنىپ جۇرگەنىمە ەكى اپتا ءوتتى. كولىگىمنىڭ ءجۇرىسى جەڭىل، ءىشى كەڭ، جەتى ورىندىعى بار. بۇل كولىك ناعىز وتباسىنا ارنالعان. ءوزىمنىڭ ەكى بالام بار، الداعى ايدا ەڭبەك دەمالىسىنا شىقسام، ايەل، بالا-شاعامدى مىنگىزىپ الىپ، تارباعاتاي تاۋلارىنا بارىپ، تىنىعىپ قايتۋدى جوسپارلاپ وتىرمىن. اسىرەسە، تەمىر تۇلپارىمنىڭ ديزاينى ەرەكشە. وتە «اقىلدى» ماشينا. الدىڭنان كەزدەسكەن كەدەرگىنى بايقاماي قالساڭ، تەجەگىش اۆتوماتتى تۇردە ىسكە قوسىلادى. كوشەدەگى قارسى باعىتتاردى ءبولىپ تۇراتىن اق جولاقتى اڭداماي باسىپ كەتسەڭ، كولىك وزدىگىنەن باعىتىن تۇزەپ جولاقتىڭ ورتاسىنا تۇسەدى. توق ەتەرىن ايتقاندا، قولايلى ءارى سەنىمدى كروسسوۆەر، – دەدى جاڭا كولىكتىڭ يەسى.

قازاقستان اۆتوبيزنەس قاۋىمداستىعىنىڭ مالىمەتىنشە، 1 مامىرعا دەيىن ىشكى نارىقتا قوستانايدا قۇراستىرىلعان 1 030 كىا كولىگى ساتىلىپ كەتكەن.

 

قوستاناي وبلىسى

 

سوڭعى جاڭالىقتار

اقتوبەدە قوقىس پوليگونى ورتەندى

ايماقتار • بۇگىن، 19:58

تۋريستكە دە ءتارتىپ بار

ايماقتار • بۇگىن، 18:06

دوللار قايتا قىمباتتاي باستادى

ەكونوميكا • بۇگىن، 11:47

ۇقساس جاڭالىقتار