13 ماۋسىمدا الماتىدا وتكەن گرەپپلينگ بويىنشا كاسىپقويلار اراسىندا Arlan «Grip PRO 8» تۋرنيرىندە اتالعان كلۋبتىڭ ءۇش وكىلى, اتاپ ايتقاندا جاتتىقتىرۋشىلار نۇرسۇلتان ورىنباساروۆ, سامات ايتپانبەت جانە دياس قانايبەكوۆ جەڭىمپاز اتاندى.
دەپۋتات «Sagadat batyr – QTT» كلۋبىنىڭ وسى جىلدارداعى جەتىستىكتەرىن ەرەكشە اتاپ ءوتىپ, ساتتىلىك تىلەدى. ول كلۋبتىڭ جاتتىقتىرۋشىلارى مەن تاربيەلەنۋشىلەرى ءتۇرلى تۋرنير وتكىزەتىنىن, قايىرىمدىلىق اكتسيالارى مەن قوعامدىق جۇمىستارعا قاتىساتىنىن, كوپتەگەن بەدەلدى جارىستا جەڭىسكە جەتەتىنىن, شەتەلدە ەل نامىسىن لايىقتى قورعاپ, حالىق قاھارمانى, قازاقستاننىڭ ءبىرىنشى قورعانىس ءمينيسترى ساعادات نۇرماعامبەتوۆتىڭ ەسىمىن بەلسەندى ناسيحاتتايتىنىن اتاپ ءوتتى.
«بۇگىندە «Sagadat batyr – QTT» كلۋبى ءارتۇرلى جاستاعى 200-دەن استام سپورتشىنى تاربيەلەپ وتىر. ولاردىڭ كوپشىلىگى حالىقارالىق تۋرنيرلەردە ماقتانىشپەن ونەر كورسەتتى. سىزدەر ساعادات نۇرماعامبەتوۆ, قاسىم قايسەنوۆ, باۋىرجان مومىش ۇلى سىندى باتىرلاردىڭ, سونداي-اق مىقتى بالۋان قاجىمۇقان مۇڭايتپاسوۆتىڭ لايىقتى ۇرپاعىسىزدار. سىزدەر جارىستاردا ابىرويمەن ونەر كورسەتىپ, حالىقارالىق ارەنادا ەلدىڭ نامىسىن قورعاۋ ءوز مىندەتىڭىز دەپ سانايسىز. الدا كوپتەگەن ءتۇرلى سىناقتار بار, بىراق سىزدەر لايىقتى تۇردە جەڭىسكە جەتە الاسىزدار دەپ ويلايمىن. ەلىمىزدىڭ دامۋى مەن گۇلدەنۋىنە ۇلكەن ۇلەس قوسىپ, ءبىزدىڭ العاشقى قورعانىس ءمينيسترىمىز ساعادات نۇرماعامبەتوۆتىڭ ەسىمىن ناسيحاتتاپ جۇرسىزدەر. وسكەلەڭ ۇرپاققا لايىقتى ۇلگى كورسەتەسىزدەر دەپ سەنەمىز. جاستار – ءبىزدىڭ بولاشاعىمىز», دەدى دەپۋتات ءوزىنىڭ قۇتتىقتاۋ سوزىندە.
ودان كەيىن باقىتبەك سماعۇل كلۋبتىڭ باس باپكەرى نۇرسۇلتان ورىنباساروۆقا العىس حات پەن باۋىرجان مومىش ۇلى اتىنداعى «نامىس» مەدالىن تابىس ەتتى. ول جارىسقا قاتىسقان بارلىق جاتتىقتىرۋشىلار سامات ايتپانبەت, ەلجان ءجۇمادىل, نۇرتۋعان بەكمۇراتوۆ, دياس قانايبەكوۆ ەكى دۇركىن الەم چەمپيونى جىبەك ق ۇلىمبەتوۆا, سپورتشىلار ازامات ابديەۆ, ماقسات مۇرات ۇلىنا ۇلكەن تابىستار تىلەدى.
سونداي-اق «اۋعان» سوعىسىنىڭ ارداگەرى, 3-دارەجەلى «ايبىن» وردەنىنىڭ كاۆالەرى, ءدىنتانۋشى الداجار سەيىت ۇلى بالالارعا ساتتىلىك تىلەدى. ءوز كەزەگىندە نۇرسۇلتان ورىنباساروۆ ولارعا كورسەتىلگەن سەنىم مەن نازار ءۇشىن العىس ايتىپ, ەل يگىلىگى ءۇشىن ودان ءارى دامىپ, جۇمىس ىستەيتىنىن مالىمدەدى.
«بۇل مەنىڭ عانا ەمەس, بۇكىل كوماندامنىڭ ەڭبەگى. شاكىرتتەرىمە, سونداي-اق كلۋبىمىزدىڭ پرەزيدەنتى ەربولات ساپار ۇلىنا كورسەتكەن قولداۋى ءۇشىن ۇلكەن العىسىمدى بىلدىرگىم كەلەدى. بارشاڭىزدى وسى ماراپاتپەن قۇتتىقتايمىن», دەدى ول.
«Arlan Grip PRO 8» تۋرنيرىندە نۇرسۇلتان ورىنباساروۆ رەسەيلىك ماگوممەد كابارديەۆتى جەڭدى. بۇل – قازاقستاندىق سپورتشىنىڭ بەس جىلدان كەيىنگى العاشقى ءتۋرنيرى بولدى. سوڭعى رەت ول قىرعىزستاننىڭ وش قالاسىندا شارشى الاڭعا شىققان بولاتىن.
«مەن بەس جىل بويى ونەر كورسەتپەگەندىكتەن, قيىن بولدى. بۇل ۇزاق مەرزىم. مەنىڭ قارسىلاسىم ۋشۋ-ساندا بويىنشا رەسەيدىڭ ەكى دۇركىن چەمپيونى, مما بويىنشا الەم چەمپيونى بولدى. سوندىقتان مەن بۇل كۇرەسكە مۇقيات دايىندالدىم. سالماق قۋدىم. جاقىندا دجيۋ-دجيتسۋدىڭ قارا بەلبەۋىن الدىم, بۇل مەنى جىگەرلەندىرگەنى انىق. ءبىر جاعىنان, بۇل ۇلكەن جاۋاپكەرشىلىك جانە مەن ءبىزدىڭ جاتتىقتىرۋشىمىز ادام فوكستىڭ ءۇمىتىن اقتاپ, ناتيجەسىندە جەڭىسكە جەتتىم. وتە قۋانىشتىمىن. ماعان لايىقتى قارسىلىق كورسەتكەن قارسىلاسىما العىس ايتامىن. بۇل دا جاقسى تاجىريبە», دەپ ءوز اسەرىمەن ءبولىستى ن. ورىنباساروۆ.
ول بۇل جەڭىستىڭ تەك باستاماسى عانا ەكەنىن جانە بولاشاقتا ءوز وقۋشىلارىمەن بىرگە ۇلكەن جارىستاردا ونەر كورسەتۋگە نيەتتى ەكەنىن جەتكىزدى.
سونىمەن قاتار «Sagadat batyr-QTT» كلۋبىنىڭ تاعى ەكى جاتتىقتىرۋشىسى سامات ايتپانبەت باۋىرجان الىمباەۆتان باسىم تۇسسە, دياس قانابەيبەكوۆ شاميل بالاەۆتى جەڭدى.
ايتا كەتەيىك, كلۋبتىڭ الماتى وبلىسى مەن الماتى قالاسىنداعى قازاقفيلم شاعىن اۋدانىندا ەكى زالى بار.
