سولتۇستىك وڭىرلەردە كەزدەسە بەرمەيتىن تۇياقتى جانۋاردىڭ تورعاي دالاسىندا تۇڭعىش رەت تولدەۋىن وبلىس جۇرتشىلىعى بۇرىن-سوڭدى بولماعان تاڭعالارلىق وقيعا رەتىندە قابىلدادى.
– وسىدان 3-4 جىل بۇرىن وبلىسقا 9 قۇلان اكەلىنگەن. ولار تورعاي دالاسىنا جىبەرىلدى. ءبىر-ەكەۋى كەيىن قاراعاندى وبلىسىنا قاراي اۋىپتى. بىرنەشە قۇلاننىڭ موينىنا ەلەكتروندى بەلگى بەرگىش چيپ سالىنعان, ولاردىڭ ءبىرىنىڭ ولەكسەسى ارقالىقتىڭ ماڭايىنان تابىلدى. جانۋاردىڭ اجالى ادامنىڭ قاسكويلىگىنەن كەلدى مە, الدە باسقا ءبىر سەبەپ بولدى ما, ول جاعى بەيمالىم. تاعى بىرەۋىن براكونەرلەر اتىپ كەتتى. قالعاندارىنىڭ موينىندا چيپ جوق, ولاردىڭ قاي ماڭدا جۇرگەنىن بىلمەيمىز عوي. بىراق وسى ءوزىمىزدىڭ وبلىستىڭ اۋماعىندا جۇرگەن بولۋى كەرەك. ويتكەنى وتكەندە ءبىر كىسىلەر امانگەلدى اۋدانىنان ءبىر-ەكەۋىن كوردىك دەدى. سوندىقتان كەم دەگەندە, 4-5 قۇلاندى جەرسىنىپ كەتتى دەپ جورامالداپ وتىرمىز. ولاردىڭ ق ۇلىنداعاندارىن كورگەن جوقپىز. ماماندار سوڭعى اكەلىنگەن قۇلانداردىڭ ءبىرىنىڭ بۋاز ەكەنىن كوكتەمدە بايقاعان. ودان كەيىن ادەيى جابايى جانۋارلاردى جەرسىندىرۋ ورتالىعىندا ۇستاپ, كۇتىم جاسالعان عوي. نەگىزى قۇلاندى قاماۋدا كوپ ۇستاۋعا بولمايدى. مىسالى, العاش كەلگەن قۇلانداردى كۇزدە اكەلدى دە, ءبىر قىستاپ شىققان سوڭ, كوكتەمدە ەركىنە جىبەردى, – دەدى وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى باسشىسىنىڭ ورىنباسارى عيلىمحان مولداعۇلوۆ.
العاش كورگەن ادام باس-قۇلاعىنا قاراپ, ەسەكتىڭ قودىعى ما دەپ قالاتىن, سوسىن سيراقتارىنا قاراپ جىلقى ءتولى شىعار دەيتىن ءسۇپ-سۇيكىمدى ق ۇلىننىڭ جارىق دۇنيەگە كەلگەنىنە ءبىر اپتا بولدى. اۋەلى وتە ءالجۋاز كورىنگەنىمەن, ساعات ساناپ شيراي باستادى. ەنەسى شابا جونەلسە, قالىسپايتىن سەكىلدى. ەرەكشە ق ۇلىندى جەرسىندىرۋ ورتالىعىنىڭ ماماندارى كۇندەلىكتى باقىلاۋعا العان.
قۇلاندار قوستاناي وبلىسىنا العاش 2017 جىلدان باستاپ, ورتالىق قازاقستانداعى جابايى جانۋارلاردىڭ تابيعي پوپۋلياتسياسىن قالپىنا كەلتىرۋ جوباسى اياسىندا اكەلىنە باستادى. جوبانى قازاقستان بيوالۋانتۇرلىلىكتى ساقتاۋ قاۋىمداستىعى شەتەلدىك ارىپتەستەرىمەن بىرلەسىپ جۇزەگە اسىرۋدا.
