فورۋمنىڭ اشىلۋىندا مەملەكەت باسشىسى قاسىم-جومارت توقاەۆتىڭ قۇتتىقتاۋ حاتى وقىلدى. پرەزيدەنتتىڭ لەبىزىن ەرلان قارين جەتكىزدى.
«بارشاڭىزدى پرەزيدەنتتىك جاستار كادرلىق رەزەرۆى فورۋمىنىڭ اشىلۋىمەن قۇتتىقتايمىن! بۇل – جۇزدەن جۇيرىك, مىڭنان تۇلپار شىققان ۇزدىكتەردىڭ باسقوسۋى. مەن جاس ۇرپاقتىڭ ەلدىك مۇددەگە بەرىك, مەملەكەتشىل تۇلعا بولىپ وسۋىنە باسا ءمان بەرەمىن. ءبىلىمدى دە بىلىكتى, بەلسەندى ءارى وتانشىل ورەندەرگە جول اشۋ – ماڭىزدى مىندەتتەردىڭ ءبىرى. ءبىز ولاردىڭ جاۋاپتى قىزمەت اتقارىپ, شىڭدالا تۇسۋىنە تولىق جاعداي جاسايمىز.
مەن بايقاۋ جەڭىمپازدارىمەن بىلتىر قاڭتار ايىندا كەزدەستىم. الداعى مىندەتتەر تۋرالى ويىمدى ورتاعا سالىپ, باعىت-باعدار بەردىم. سودان بەرى كوپشىلىگىڭىز ءتۇرلى لاۋازىمعا تاعايىندالدىڭىزدار. بيىل ارالارىڭىزدان ماجىلىسكە ەكى دەپۋتات سايلاندى. سونىمەن بىرگە ەكى ازامات ۇلتتىق قوعامدىق سەنىم كەڭەسىنە مۇشە بولدى. وڭىرلەرگە بارىپ ەڭبەك ەتىپ جۇرگەن قىز-جىگىتتەردى دە بىلەمىن. جاس مامانداردىڭ ەلمەن ەتەنە جۇمىس ىستەۋى – قۇپتارلىق قادام. سەبەبى بۇل – ناعىز ءومىر مەكتەبى.
مۇنىڭ ءبارى جاس وركەننىڭ الەۋەتى قانشالىقتى زور ەكەنىن كورسەتەدى. پرەزيدەنتتىك جاستار كادر رەزەرۆىندە بولۋ – تالاپتى جاستار ءۇشىن تاپتىرماس مۇمكىندىك ەكەنى انىق. الايدا ونى بيلىككە جەتۋدىڭ ەمەس, حالىققا قىزمەت ەتۋدىڭ توتە جولى دەپ ءبىلۋ كەرەك. شىن مانىندە ەڭ ۇلكەن مارتەبە دە, ابىروي دا وسىندا. بيىل قاستەرلى تاۋەلسىزدىگىمىزگە 30 جىل تولادى. سىزدەر – ەركىن ەلدە تۋىپ-وسكەن رۋحى ازات, ساناسى اشىق ازاماتسىزدار. قازاقستاندى ودان ءارى وركەندەۋ – وزدەرىڭىزگە جۇكتەلەتىن ۇلكەن جاۋاپكەرشىلىك. وسى ورايدا وسكەلەڭ ۇرپاق ەل ءۇمىتىن اقتايدى دەپ سەنەمىن. بارشاڭىزعا مىقتى دەنساۋلىق, باق-بەرەكە تىلەيمىن! فورۋمنىڭ جۇمىسى تابىستى بولسىن!», دەلىنگەن پرەزيدەنت قۇتتىقتاۋىندا.
ودان كەيىن ەرلان قارين كادرلىق رەزەرۆتىڭ ساپاسى ماسەلەسىنە توقتالدى. «بۇگىنگى كەزدەسۋ – ءبىزدىڭ جاس ارىپتەستەرىمىزدىڭ ۇيىمداستىرۋشىلىق كۇش-جىگەرىنىڭ ناتيجەسى, بۇل پرەزيدەنتتىك جاستار كادر رەزەرۆىنە شىن مانىندە بەلسەندى جاستار جينالعانىن تاعى دا دالەلدەيدى. پرەزيدەنتتىك كادرلىق رەزەرۆ بەلسەندى دامىپ كەلەدى. كادر رەزەرۆىنىڭ ىشىندە دە دەڭگەيلەس بايلانىستاردىڭ دامىپ جاتقانى مەنى قاتتى قۋانتادى. ءاردايىم رەزەرۆتىڭ ىشىندە تالقىلاۋلار, پىكىرتالاستار بار ەكەنىن كورەمىن. ءبىزدىڭ جاس ارىپتەستەر ۇنەمى كەزدەسەدى, باستامالار كوتەرەدى», دەپ اتاپ ءوتتى ە.قارين.
پرەزيدەنت كومەكشىسى سوڭعى ۋاقىتتا رەزەرۆشىلەر تاراپىنان ءتۇرلى تالدامالىق ماتەريالدار, ۇسىنىمدار تۇسە باستاعانىن باسا ايتتى.
«بۇل رەزەرۆشىلەردىڭ ۇيىمداستىرۋشىلىق الەۋەتى دە, زياتكەرلىك الەۋەتى دە زور ەكەنىن تاعى دا كورسەتەدى. ءبىزدىڭ مىندەتىمىز – تەك جۇمىسقا ورنالاستىرۋ عانا ەمەس, ءبىز ءۇشىن ەڭ باستىسى, ءوزارا ساپالاندىرۋدىڭ تۇراقتى پروتسەسى بولۋى ءتيىس», دەدى پرەزيدەنت كومەكشىسى.
فورۋمعا قاتىسقان يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ تا جاستارعا ءوز لەبىزىن جەتكىزدى.
«كەيبىر ەلدەردىڭ زاڭدارى ونداعان, ءتىپتى جۇزدەگەن جىلدار بويى وزگەرمەيدى. وسىلاي قابىلداندى, ءبىتتى. ارينە, ۋاقىت وزگەرەدى, جاڭا بۋىن كەلەدى, قانداي دا ءبىر سىن-قاتەرلەر پايدا بولادى. بىراق تۇراقتىلىق ولاردىڭ وسۋىنە جانە ۇنەمى العا جىلجۋىنا كومەكتەسەدى. مۇندا ۆاليۋتانىڭ تۇراقتىلىعىن, زاڭداردىڭ تۇراقتىلىعىن, ەرەجەلەردىڭ تۇراقتىلىعىن جانە باسقالارىن ايتامىز. سوندىقتان سىزدەر ءۇشىن, كوشباسشىلار ءۇشىن ومىرلىك قاعيدالاردىڭ ءبىرى – ىشكى تۇراقتىلىق, ىشكى ارقاۋ, ىشكى تازالىق پەن ءتارتىپ ەرەجەسى بولۋى كەرەك. بۇل قاعيدالاردى بۇزۋعا بولمايدى. ءبىر نارسەنى شەشۋ ءۇشىن ءبىر رەت بۇزساڭىز, ىشىڭىزدە ديسبالانس ورنايدى. بۇل ديسبالانستى توقتاتۋ قيىن جانە ادام ماياتنيكتەي شايقالۋى مۇمكىن. ال مۇنداي ادام كوشباسشى جانە جەتەكشى بولا المايدى. بولعان كۇننىڭ وزىندە دە جاقسى جەتەكشى بولا المايدى», دەدى ول.
مينيستر ارقاشان وڭ ناتيجەگە جەتۋگە ماقسات قويۋ قاجەتتىگىنە توقتالدى. «كەز كەلگەن ءىستى باستاعاندا ارقاشان ونىڭ نەمەن اياقتالاتىنىن ويلاۋ كەرەك. جانە ناتيجە ارقاشان وڭ بولۋى ءتيىس. سىزدەردە امبيتسيا بار. بارلىق ادامعا امبيتسيا كەرەك. العا شىعىپ, ءوز سوڭىنان توپ ەرتە الۋى ءۇشىن دۇرىس امبيتسيا قاجەت دەپ ويلايمىن. تاعى ءبىر ايتارىم, جەگەن تاعامنان باستاپ, ءجۇرىس-تۇرىسقا, اقپاراتتى تۇتىنۋعا, ادامدارمەن سويلەسۋگە ىشكى فيلتر ورناتۋعا تىرىسىڭىزدار. اينالانى جاقسى ادامدارمەن قورشاپ, ءوز ىستەرىڭىزدىڭ شەبەرى بولىڭىزدار», دەدى ب.اتامقۇلوۆ.
پرەزيدەنتتىڭ جاستار كادرلىق رەزەرۆى مۇشەلەرى دە ءوز تاجىريبەلەرى تۋرالى ايتىپ بەردى. باس قوسقان جاستار تالقىلاۋ بارىسىندا ەلىمىزدەگى بىرقاتار ماسەلەنىڭ باسىن اشىپ, كەلەشەككە جوسپارلارىمەن ءبولىستى.
