جاستاردىڭ قازاقستانداعى ۇلەسى جوعارى ەكەنىن بىلەمىز. ستاتيستيكاعا سۇيەنسەك 18 بەن 29 جاس ارالىعىندا جاستاردىڭ سانى 4,5 ميلليونعا جۋىق. جاستارعا ءبىلىم بەرۋ, جۇمىسقا ورنالاستىرۋ جانە باسپانا بەرۋ مەملەكەت ءۇشىن باسىم باعىت. سوڭعى جىلدارى مەملەكەت جاستارمەن ولاردىڭ وتباسىنا ايتارلىقتاي كوڭىل ءبولۋى - ءۇش باعىتتىڭ ايقىن كورىنىسى. ەلىمىزدىڭ بارلىق ايماقتارىندا كوپقاباتتى ۇيلەر سالىنىپ, جاستارعا جەڭىلدەتىلگەن شارتتارمەن بەرىلىپ جاتىر.
ءۇيدى ساتىپ الۋ قۇقىعىنسىز جالعا الۋ
نۇر-سۇلتان, الماتى جانە شىمكەنت قالالارىندا ساتىپ الۋ قۇقىعىنسىز جالعا بەرىلەتىن تۇرعىن ءۇي الۋ باعدارلامالارى قاراستىرىلعان. بۇل باعدارلاما جۇمىس ىستەيتىن جاس مامانداردىڭ ۋاقىتشا باسپانامەن قامتۋعا باعىتتالعان. ساتىپ الۋ قۇقىعىنسىز جالعا بەرىلەتىن ۇيلەردى 5 جىلعا دەيىن جالداپ تۇرۋعا بولادى.
پرەمەر-مينيستر اسقار ءماميننىڭ ايتۋىنشا, ەلىمىزدە جۇمىس ىستەيتىن جاستارعا جالعا بەرىلەتىن باسپانا جوباسىن قارجىلاندىرۋ 2025 جىلعا دەيىن ۇزارتىلاتىنى جايلى ايتتى. وتكەن جىلى نۇر-سۇلتان, الماتى, شىمكەنت قالالارىندا جاستاردى قولداۋ ماقساتىندا 4 مىڭ باسپانا جالعا بەرىلدى. ال 2021 جىلى جوسپار بويىنشا 3 مىڭ باسپانا بولىنەدى.
«يندۋستريا جانە ينفراقۇرىلىمدىق دامۋ مينيسترلىگى اعىمداعى جىلى 3 مىڭ پاتەر بەرۋ ماسەلەسىن قاراستىرۋدا. سونىمەن قاتار, باعدارلامانى 2025 جىلعا دەيىن ىسكە اسىرۋ بويىنشا جۇمىستار اتقارىلىپ جاتىر. 2021-2025 جىلدارى «Nur Otan» پارتياسىنىڭ سايلاۋالدى باعدارلاماسىنا سايكەس جىل سايىن رەسپۋبليكالىق ماڭىزى بار قالالاردا 3 مىڭ جاستى وسىنداي تۇرعىن ۇيمەن قامتاماسىز ەتۋ جوسپارلانۋدا», دەدى اسقار مامين.
ول 2025 جىلعا قاراي ەلىمىزدىڭ جۇمىس ىستەيتىن جاستارىنا 15 مىڭ پاتەر بەرىلەتىنىن اتاپ ءوتتى.
باعدارلاماعا قاتىسۋ ءۇشىن قويىلاتىن تالاپتار:
- جاسى - 29-عا دەيىن;
- اتىندا جىلجىمايتىن م ۇلىكتىڭ بولماۋى;
- رەسمي تۇردە جۇمىسى نە كاسىبى بار ازاماتتار;
- جالپى ءبىلىم بەرەتىن مەكتەپتەردىڭ, تەحنيكالىق جانە كاسىپتىك جانە ورتا بىلىمنەن كەيىنگى, جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ ءبىلىم بەرەتىن وقۋ باعدارلامالارىن مەڭگەرۋى;
- ءوتىنىش بەرەتىن قالادا سوڭعى 2 جىلدان كەم ەمەس تۇراقتى تىركەلۋىن راستاۋ;
- ايلىق تابىسى كەمىندە - 40 اەك (2021 جىلى - 116 680 تەڭگە);
- قازاقستاندىق ەكىنشى دەڭگەيلى بانكتە دەپوزيتتىڭ بولۋى شارت.
«جاس وتباسى» باعدارلاماسى
2020 جىلى 1 شىلدەدەن باستاپ جاس وتباسىلاردى قولداۋعا ارنالعان تاعى ءبىر باعدارلاما ىسكە قوسىلدى. جاڭا باعدارلاما وتاۋ قۇرعاندارعا ارزان يپوتەكامەن باسپانا ساتىپ الۋعا مۇمكىندىك بەرەدى. يپوتەكانىڭ العاشقى ەكى جىلدا جىلدىق نەسيە مولشەرلەمەسى 6%-كە تەڭ, ودان كەيىن ول 5%-كە دەيىن تومەندەيدى. يپوتەكا 6 جىلدان 9 جىلعا دەيىن بەرىلەدى.
باعدارلاماعا قاتىسۋشىلارعا قويىلاتىن تالاپتار:
- ەرلى-زايىپتىلاردىڭ بىرەۋى نەمەسە ەكەۋى وتباسى بانكتە «جاس وتباسى» دەپوزيتىن اشۋ;
- ءبىر جىل ىشىندە بولاشاقتا ساتىپ الاتىن پاتەر باعاسىنىڭ 50%-ءىن جيناپ, باعالاۋ كورسەتكىشىنىڭ 5-ءشى دەڭگەيىنە جەتكىزۋ;
- ەرلى-زايىپتىنىڭ نەكەگە تۇرعان مەرزىمى 3 جىلدان اسپاۋى ءتيىس.
باعدارلاما رەسپۋبليكانىڭ بارلىق ايماعىندا تۇراقتى تۇردە جۇزەگە اسىرىلادى. دەپوزيتكە اقشا جيناۋ كەزىندە دەپوزيتكە جىلدىق 2%-دىق بانك سىياقىسى جانە 20%-دىق جىل سايىنعى مەملەكەت سىياقىسى تۇسەدى. بۇعان قوسا, ەرلى-زايىپتىنىڭ جاسى مەن وتباسىنداعى بالالار سانىنا شەكتەۋ قويىلمايدى.
باعدارلاما شارتىنا سايكەس, جاس وتباسى پاتەردى جاڭا جانە بۇرىن قولدانىستا بولعان تۇرعىن ۇيلەردەن ساتىپ الا الادى. مۇنىمەن قاتار, جەر تەلىمىن الىپ, ءۇي سالۋىنا دا بولادى.
سۇندەت ورالبەكوۆ
