پارلامەنت • 11 ماۋسىم، 2021

ۇكىمەت ساعاتىندا مەملەكەتتىك باعدارلامانى ىسكە اسىرۋ ماسەلەسى تالقىلاندى

26 رەت كورسەتىلدى

سەنات ۆيتسە-سپيكەرى نۇرلان ءابدىروۆتىڭ توراعالىعىمەن «قازاقستان رەسپۋبليكاسىنىڭ اگروونەركاسىپتىك كەشەنىن دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىن ىسكە اسىرۋ» تاقىرىبىنا ارنالعان ۇكىمەت ساعاتى ءوتتى، دەپ حابارلايدى Egemen.kz.

شارانى اشقان نۇرلان ءابدىروۆ ەلىمىزدىڭ اگروونەركاسىپتىك كەشەنىن دامىتۋعا مەملەكەت تاراپىنان ەرەكشە كوڭىل ءبولىنىپ كەلە جاتقانىن، سوعان سايكەس الدا بىرقاتار ماڭىزدى مىندەتتەر تۇرعانىن ايتتى.

ولار – اۋىل شارۋاشىلىعى ءوندىرىسىن تۇراقتى دامىتۋ، الەمدىك نارىقتا باسەكەگە قابىلەتتى جانە ەكسپورتقا ارنالعان ونىمدەر ءوندىرىسىن ۇلعايتۋ، ەلدىڭ ازىق-ت ۇلىك قاۋىپسىزدىگىن قامتاماسىز ەتۋ جانە 2022 جىلعا دەيىن وسى سالاداعى ەڭبەك ونىمدىلىگىن 2،5 ەسەگە ارتتىرۋ بولىپ تابىلادى. سەنات ۆيتسە-سپيكەرى اگرارلىق سالاعا كەرى اسەرىن تيگىزىپ وتىرعان جۇيەلى ماسەلەلەرگە دە نازار اۋداردى.

«اتالمىش سالانى قازاقستان ەكونوميكاسىنىڭ جەتەكشى كۇشىنە اينالدىرۋ ماقساتىندا سوڭعى ونجىلدىقتاردا اگرارلىق ونەركاسىپ كەشەنىن دامىتۋعا ارنالعان بىرنەشە سالالىق باعدارلامالار دا ازىرلەندى، قارجىلاندىرۋ تاسىلدەرى دە بىرنەشە مارتە وزگەردى. بىراق ايتارلىقتاي ناتيجە بولمادى. وعان مەملەكەتتىك قولداۋ قۇرالدارىنىڭ ناتيجەسىزدىگى، ءوندىرىس كورسەتكىشىنىڭ تومەندىگى، سونداي-اق اگروعىلىم مەن اگروكاسىپ اراسىنداعى الشاقتىق، اۋىل شارۋاشىلىعى تاۋارلارىن ساقتاۋ جۇيەسىنىڭ جولعا قويىلماۋى سەكىلدى ماسەلەلەر سەبەپ بولىپ وتىر»، دەدى نۇرلان ءابدىروۆ.

اۋىل شارۋاشىلىعى ءمينيسترى ساپارحان وماروۆ ءوز كەزەگىندە مەملەكەتتىك باعدارلامانى ىسكە اسىرۋدىڭ ناتيجەلەرى تۋرالى باياندادى. سونداي-اق مينيستر اگروونەركاسىپتىك كەشەندى دامىتۋ ءۇشىن قابىلدانعان شارالارعا توقتالىپ ءوتتى.

ونىڭ ىشىندە اۋىل شارۋاشىلىعى سالاسىندا ساقتاندىرۋدىڭ جاڭا جۇيەسى ەنگىزىلگەنىن، تۇقىم شارۋاشىلىعىن سۋبسيديالاۋ قولعا الىنعانىن، ماشينا-تراكتور پاركىن جاڭارتۋ قارقىنى ارتا تۇسكەنىن جانە باسقا دا جۇمىستاردى ايتتى. سەناتور دۇيسەنعازى مۋسين مەملەكەتتىك باعدارلامانىڭ كورسەتكىشتەرىن ورىنداۋ كەزىندەگى پروبلەمالارعا نازار اۋداردى.

«ۇلتتىق ەكونوميكا مينيسترلىگى باعدارلامانىڭ ىسكە اسىرىلۋ بارىسىنا جۇرگىزگەن مونيتورينگتىڭ قورىتىندىلارىنا سۇيەنسەك، 2020 جىلى 8 نىسانالى ينديكتورعا جانە 45 ناتيجەلى كورسەتكىشكە قول جەتكىزۋ، سونداي-اق 111 ءىس-شارا وتكىزۋ كوزدەلگەن. الايدا، قولداعى دەرەكتەرگە سايكەس، بىلتىر تەك 3 نىسانالى ينديكاتورعا قول جەتكىزىلگەن جانە جوسپارلانعان ءىس-شارالاردىڭ وتكىزىلۋى تەك 45 پايىزدى قۇراعان»، دەدى دۇيسەنعازى مۋسين.

سەناتورلار مەملەكەتتىك باعدارلامانى تولىق ىسكە اسىرۋ ءۇشىن ءتيىستى زاڭنامالىق بازا قالىپتاسقانىن ايتىپ، ەندى مەكەمەارالىق ءوزارا ءىس-قيمىلدى ارتتىرۋ قاجەتتىگىن جەتكىزدى.

ودان بولەك، دەپۋتاتتار اتالعان مەملەكەتتىك باعدارلاما اياسىندا جوسپارلانعان نىسانالى ينديكاتورلارعا قول جەتكىزۋ ماقساتىمەن تۇبەگەيلى شارالار قابىلداۋ كەرەكتىگىن دە تىلگە تيەك ەتتى.

بۇگىنگى ءىس-شاراعا ورتالىق مەملەكەتتىك جانە جەرگىلىكتى اتقارۋشى ورگانداردىڭ، ۇلتتىق حولدينگتەردىڭ، بيزنەس قاۋىمداستىقتىڭ جانە عىلىمي ورتانىڭ وكىلدەرى قاتىستى.

وتىرىستىڭ قورىتىندىسى بويىنشا ۇسىنىمدار ازىرلەنىپ، ۇكىمەتكە جولداندى.

سوڭعى جاڭالىقتار

دوللار قايتا قىمباتتاي باستادى

ەكونوميكا • بۇگىن، 11:47

نۇرحاننىڭ دومبىراسى

ونەر • بۇگىن، 09:05

ۇقساس جاڭالىقتار