باسقارمانىڭ بۇقارالىق سپورت ءبولىمىنىڭ باس مامانى اقەركە وتەگەنوۆا العاشقى جاتتىعۋ الداعى دەمالىس كۇندەرى اشىلاتىن «Demalys promenad» كوشەسىندە باستالاتىنىن ايتتى.
«تەگىن ساباقتار مەن جاتتىعۋلار 12 ماۋسىم كۇنى اشىلاتىن «Demalys promenad» دەمالىس كوشەسىندە باستاۋ الادى. سونىمەن قاتار اتالعان كوشەدە سپورتشىلارىمىز كيوكۋشينكاي كاراتە, مۋاي تاي, تاەكۆاندو, كوركەم گيمناستيكا سەكىلدى سپورت تۇرلەرىنەن شەبەرلىك ساباقتارىن وتكىزەدى. سونداي-اق «قولجەتىمدى سپورت» باعدارلاماسى اياسىندا ەلوردا تۇرعىندارىنا فيتنەس, جۇگىرۋ, ۆوركاۋت, زۋمبا, يوگا, تىنىس الۋ گيمناستيكاسى, سكانديناۆيالىق ءجۇرىس سەكىلدى سپورت تۇرلەرىنەن كاسىبي جاتتىقتىرۋشىلارمەن ساباقتار ۇيىمداستىرامىز. ساباقتار قالامىزدىڭ بارلىق ساياباقتارى مەن شالعاي اۋدانداردى دا قامتيتىن بولادى», دەدى سپورت باسقارماسىنىڭ وكىلى.
ساباقتاردىڭ كەستەسىن باسقارمانىڭ الەۋمەتتىك جەلىدەگى پاراقشالارىنان (@sport_nursultan) جانە 55-75-61 بايلانىس نومىرىنەن بىلۋگە بولادى.
