دۇنيەجۇزىلىك مۇحيتتار كۇنىندە National Geographic كارتوگرافتارى مەن اقش ۇلتتىق گەوگرافيالىق قوعامى وڭتۇستىك دەپ اتالاتىن جەردەگى بەسىنشى مۇحيتتىڭ بار ەكەنىن مويىندادى. 2021 جىلدىڭ 8 ماۋسىمىنان باستاپ ۇيىمدار ونى كارتالاردا بەلگىلەي باستايدى.
عالىمدار وڭتۇستىك مۇحيت تەرمينىن انتاركتيكانى قورشاپ تۇرعان تەڭىزدەردى كورسەتۋ ءۇشىن بۇرىننان قولدانىپ كەلسە دە, بەسىنشى مۇحيتتىڭ شەكارالارىن بەلگىلەيتىن حالىقارالىق كەلىسىم ءالى جوق. ساراپشىلار ونى انتاركتيكاعا, الدە, ءۇندى, اتلانت جانە تىنىق مۇحيتتارىنىڭ وڭتۇستىك ايماقتارىنا جاتقىزۋ دۇرىس پا دەگەن سۇراقتى زەرتتەگەن.
«وڭتۇستىك مۇحيتتى عالىمدار بۇرىننان بىلەدى. بىراق حالىقارالىق كەلىسىم بولماعاندىقتان, ءبىز ونى ەشقاشان رەسمي تۇردە مويىندامادىق», دەيدى ۇلتتىق گەوگرافيالىق قوعامنىڭ گەوگرافى الەكس تەيت.
ەندى وڭتۇستىك مۇحيت تەرمينى انتاركتيكانى قورشاپ تۇرعان جانە اتلانت مۇحيتىنىڭ وڭتۇستىگىنە جاتاتىن, درەيك بۇعازى مەن سكوشا تەڭىزىن قوسپاعاندا, وڭتۇستىك ەندىكتەن 60 گرادۋسقا دەيىن سوزىلاتىن سۋلارعا قاتىستى ايتىلادى. باسقا ءتورت مۇحيتتان ايىرماشىلىعى - وڭتۇستىك مۇحيتتىڭ شەكارالارى ماتەريكپەن ەمەس, انتاركتيكالىق تسيركۋمپوليارلى اعىسپەن جانە باتىستان شىعىسقا قاراي انتاركتيدا اينالاسىنان وتەتىن باتىس جەلدەرىنىڭ اعىمىمەن انىقتالادى. اعىندى سۋ وڭتۇستىك ەندىكتەن 60 گرادۋس سولتۇستىكتە ورنالاسقان سۋلارعا قاراعاندا سۋىق ءارى تۇزدىلىعى ازداۋ بولادى.
