– ءبىز وبلىستىڭ ءار وڭىرىندە ءار سالادا ەڭبەك ەتە ءجۇرىپ وتانعا دەگەن سۇيىسپەنشىلىگىمەن ەرەكشەلەنگەن, سونداي-اق ءوز ماماندىعى بويىنشا ايتۋلى تابىسقا قول جەتكىزگەن ەلشىل ازاماتتاردى كوپشىلىككە ۇلگى ەتە ءبىلۋىمىز كەرەك. بۇگىنگى فورۋمنىڭ ماقساتى دا – وسى. سىزدەر – وزدەرىڭىزدىڭ ادال ەڭبەكتەرىڭىز ارقىلى جوعارعى جەتىستىكتەرگە قول جەتكىزىپ, ەل تاۋەلسىزدىگىنىڭ نىعايۋىنا تامشىداي بولسا دا ۇلەس قوسىپ جۇرگەن ناعىز پاتريوت ازاماتسىزدار, – دەدى باقىت ەسىموۆا.
فورۋم جەڭىمپازدارى ءبىلىم, عىلىم, مەديتسينا, سپورت, ازاماتتىق قورعانىس, مادەنيەت جانە ونەر سالاسىندا ەڭبەك ەتىپ جۇرگەن الدىڭعى قاتارلى ماماندار اراسىنان تاڭدالىپ الىندى.
ءبىلىم جانە عىلىم سالاسىنداعى جەتىستىكتەرى ءۇشىن قۇرمەتكە بولەنىپ, مەرەيى ۇستەم بولعان قانات ەسەنعۇلوۆ قوستاناي قالاسىنداعى №19, №23 مەكتەپتەردە ماتەماتيكا پانىنەن ساباق بەرەدى. بىلتىر پاندەميانىڭ پارمەنىمەن بالالار قاشىقتان وقۋعا كوشكەندە, جاڭا جاعدايعا بەيىمدەلگەن وقۋ باعدارلاماسى بويىنشا مەملەكەتتىك تەلەجوباعا قاتىسىپ, «ەلارنا» رەسپۋبليكالىق تەلەارناسى ءۇشىن 7 اي ىشىندە 37 بەينەساباق دايىنداعان.
سالتاناتتى جيىندا بەلگىلى قوستانايلىق گروسسمەيستەر, بالالار جانە جاسوسپىرىمدەر شاحماتىنان ەل قۇراماسىنىڭ باس باپكەرى پەتر كوستەنكو «سپورت سالاسىنداعى جەتىستىگى ءۇشىن» اتالىمى بويىنشا ماراپاتتالدى. شارشى تاقتا شەبەرى بيىل تاشكەنتتە ەرلەر اراسىندا وتكەن فيدە چەمپيوناتىنىڭ قولا جۇلدەسىنە يە بولعان.
– پاتريوتيزم دەگەن ۇعىم – ەڭ الدىمەن, ءار ادامنىڭ ءوز تۋعان جەرىنە دەگەن سۇيىسپەنشىلىگى دەپ ويلايمىن. جۇمىس بابىمەن كوبىنە سىرتتا جۇرسەم دە, قوستانايدى ۇنەمى ساعىنىپ تۇرامىن. ەلىمىزدىڭ استاناسى نۇر-سۇلتان دا مەن ءۇشىن ەرەكشە ىستىق قالا. مەنىڭ سپورت سالاسىنداعى ەڭ باستى جەتىستىگىم ءالى الدا دەپ ويلايمىن. ءوزىم جاتتىقتىرىپ جۇرگەن جاس شاحماتشىلاردىڭ ىشىندە بولاشاعىنان ۇلكەن ءۇمىت كۇتتىرەتىن دارىندى بالالار كوپ. باستى مىندەت – شاكىرتتەرىمنىڭ شەبەرلىگىن شىڭداپ, حالىقارالىق جارىستارعا دايىنداۋ. كەلەشەكتە ولاردىڭ اراسىنان الەمدىك تۋرنيرلەردە جەڭىس تۇعىرىنان كورىنىپ جۇرگەن جانسايا ابدىمالىك سياقتى شەبەر شاحماتشىلار شىعاتىنىنا سەنەمىن, – دەدى پەتر كوستەنكو.
«دەنساۋلىق ساقتاۋ سالاسىنداعى جەتىستىكتەرى ءۇشىن» اتالىمى بويىنشا ۇزدىك اتانعان قايرات بەگەنوۆ قوستاناي وبلىستىق اۋرۋحاناسىنىڭ جۇرەك-قان تامىرلارى بولىمىندە كارديوحيرۋرگ بولىپ جۇمىس ىستەيدى.
– 2008 جىلى ەلوردامىزداعى مەديتسينا اكادەمياسىن ءتامامداپ, ءۇش جىلداي كوكشەتاۋدا, ودان كەيىن نۇر-سۇلتان قالاسىندا بەس جىلداي جۇمىس ىستەدىم. 2016 جىلدان بەرى قوستانايعا كەلىپ, جۇرەك اۋرۋى بار ناۋقاستارعا وتا جاساپ, ولاردىڭ ءومىرىن ۇزارتۋعا سەپتىگىمدى تيگىزىپ كەلەمىن. مىسالى, بىزدە جۇرەگى اۋىراتىن ناۋقاستارعا جاسالاتىن اورتوكورونارلىق ۇشتاستىرۋ دەگەن وپەراتسيا بار. ادەتتە قالىپتى جاعدايدا وتا جاساعاندا ءبىز ءتوستى كەسەمىز. ءتوستى كەسكەن سوڭ, ناۋقاستىڭ وتادان كەيىن قالپىنا كەلۋى, وڭالۋ مەرزىمى ۇزاعىراق بولادى. كەم دەگەندە ءۇش اي كەتەدى. ال ەندى وتا جاساۋدىڭ ءبىز ەنگىزگەن جاڭا ءادىسى بويىنشا, ءتوستى كەسپەي, قابىرعا ارالىعىنان ءوتىپ, جۇرەك تامىرلارىن تىگىپ جاتىرمىز. مۇنى ەندى ناۋقاستاردىڭ بارىنە بىردەي جاساي بەرەمىز دەپ ايتۋعا بولمايدى. ويتكەنى مۇنداي وتا ءتۇرىن كوتەرە المايتىن ناۋقاستار بار. قوستانايدا ءتوستى تىلمەي جۇرەككە وتا جاساۋدى ەنگىزگەنىمىزگە ءبىراز ۋاقىت بولىپ قالدى. بىلۋىمشە, مۇنداي كۇردەلى وتانى ەلىمىز بويىنشا ءارى كەتسە 4-5 كلينيكادا عانا جاسايدى, – دەدى قايرات بەگەنوۆ.
ماراپاتتاۋ راسىمىندە باقىت ەسىموۆا مادەنيەت جانە ونەر سالاسىندا جەتىستىككە جەتكەن رۋسلان بۋشينسكيگە, «ەڭبەكتەگى جەتىستىگى ءۇشىن» اتالىمى بويىنشا كۇلاي مۇحامەدجانوۆا مەن ۆلاديمير بوندارەنكوعا, «تاريحي-مادەني مۇرانى ساقتاۋعا قوسقان ۇلەسى ءۇشىن» اتالىمىنىڭ جەڭىمپازى باتىرلان ساعىنتاەۆقا, «تۋعان جەرگە كومەك كورسەتكەنى ءۇشىن» اتالىمى بويىنشا گۇلسارا جامانقۇلوۆا سىندى ۇزدىكتەرگە ارنايى سىي-سياپات تارتۋ ەتتى.
ءىس-شارانى ۇيىمداستىرۋشىلاردىڭ ايتۋىنشا, بيىل سانيتارلىق تالاپقا بايلانىستى ماراپاتتاۋ راسىمىنە جەڭىمپازداردىڭ ءبىرازى شاقىرىلماي قالىپتى. شالعاي اۋدانداردا تۇراتىن تاڭداۋلىلاردى جەرگىلىكتى اۋدان اكىمدەرى ماراپاتتايتىن بولادى.
