كەلۋشىلەردى كىم تەكسەرىپ جاتىر؟
بۇل ءموبيلدى قوسىمشانىڭ ازاماتتاردىڭ مارتەبەسىن قىزىل, سارى, كوك, جاسىلعا بولۋگە ءتيىستى تەحنولوگيالىق قىزمەتىنە كوڭىل كونشي بەرمەيتىن كەزدەر از بولمايدى. بۇگىندە Ashyq باعدارلاماسى مينيسترلىكتىڭ قاراماعىنا ءوتىپ, ونى «ۇلتتىق اقپاراتتىق تەحنولوگيالار» اق سۇيەمەلدەيدى. دەمەك اتالعان باعدارلاما تولىقتاي مەملەكەتتىڭ قولىنا ءوتتى. ءمينيستردىڭ ايتۋىنشا, قوسىمشانىڭ قاۋىپسىزدىك جانە باسقا دا تەحنولوگيالىق ماسەلەسىنە «ۇلتتىق اقپاراتتىق تەحنولوگيالار» اق جاۋاپ بەرەدى. ۆەدومستۆو باسشىسى قازىر Ashyq-تىڭ قىزمەتتەرى eGov mobile قوسىمشاسىنا ەنگىزىلگەنىن جەتكىزدى.
«ياعني eGov mobile قوسىمشاسى بار ازاماتتار Ashyq باعدارلاماسىن جۇكتەمەي-اق, ونىڭ كومەگىمەن Ashyq-تى پايدالانا الادى. ەكىنشىدەن, كوپشىلىكتىڭ سۇرانىسىنا سايكەس ءبىز مۋلتيپلاتفورمالىق باعىتتا جۇمىس ىستەيتىنىمىزدى ايتقان ەدىك. سوندىقتان Kaspi.kz قوسىمشاسىندا دا Ashyq قولجەتىمدى. وسى باعىتتا Halyk Bank-پەن دە جۇمىس ىستەپ جاتىرمىز. ولاردىڭ قوسىمشاسىندا دا Ashyq جوباسىن پايدالانۋدىڭ مۇمكىندىكتەرى قاراستىرىلادى. باسقا قارجى ينستيتۋتتارى مەن كاسىپكەرلەر وسىعان بايلانىستى ءوز ۇسىنىستارىن ايتىپ جاتىر. تۇتاستاي ايتقاندا, قازىر 10 مىڭعا جۋىق بيزنەس سۋبەكتىسى Ashyq ارقىلى ءوز قىزمەتتەرىن جالعاستىرىپ, ەكونوميكاعا ءوز پايداسىن اكەلىپ جاتىر. بۇل كۇنىنە 100 مىڭنان استام ادام QR كودتى سكانەرلەۋ ارقىلى ءتۇرلى قىزمەتتى پايدالانىپ جاتقانىن اڭعارتادى. مۇنىڭ ءوزى ۇلكەن جەتىستىك دەپ ويلايمىز. ويتكەنى كوپتەگەن كاسىپكەرلىك سۋبەكتىسى جۇمىستارىن جۇرگىزە الماي جاتقانى بىزگە ءمالىم. قازىر وسى پاندەمياعا قاراماستان اتالعان باعدارلاما ارقىلى ىسكەر ازاماتتار ءوز كاسىبىن جالعاستىرۋعا مۇمكىندىك الىپ وتىر», دەدى ب.مۋسين.
2 ملن ادام ەلەكتروندى قوسىمشانى پايدالاندى
مينيستر eGov mobile-دا بۇگىندە 15 تسيفرلى قۇجاتتى الۋعا بولاتىنىن, سونداي-اق نوتاريۋستىڭ قىزمەتىنە وسى قوسىمشا ارقىلى جەكە كۋالىكتى كورسەتىپ, جۇگىنۋگە بولاتىنىن ايتتى.
«مىسالى, Kaspi.kz قوسىمشاسى ارقىلى eGov mobile-دى پايدالانىپ, مەملەكەتتىك قىزمەت تۇرلەرىن الۋعا جاعداي جاسالعانىن ايتا كەتكىم كەلەدى. قازىر بۇل قىزمەتتى 2 ملن-نان اسا ادام پايدالانعانىن كورىپ وتىرمىز. سوندىقتان وسى تسيفرلى قۇجاتتى الۋ تەتىگىن دامىتۋ ءۇشىن قازىر باسقا دا مەملەكەتتىك ورگاندارمەن جۇمىس ىستەپ, الداعى ۋاقىتتا ولاردىڭ دا قىزمەتىن eGov mobile-عا ينتەگراتسيالاۋ جوسپارلانۋدا. ايتالىق, نۇر-سۇلتان – الماتى باعىتىنداعى اۋە رەيسىمەن قاتىناپ جۇرگەن ازاماتتار مەملەكەتتىك پلاتفورمانى پايدالانىپ, ونىڭ تيىمدىلىگىن بايقاپ كەلەدى. وسى باعىتتا يندۋستريا جانە ينفراقۇرىلىمدىق دامۋ مينيسترلىگىمەن كەلىسىپ, باسقا اۋە رەيستەرىنە ەنگىزۋ قاراستىرىلىپ جاتىر», دەدى تسيفرلىق دامۋ ءمينيسترى.
«ۇلتتىق اقپاراتتىق تەحنولوگيالار» اق باسقارما توراعاسى روستيسلاۆ كونياشكين ايتقانداي, بيىل 5 ايدا 28 ملن-نان استام مەملەكەتتىك قىزمەت كورسەتىلىپ, ونىڭ شامامەن 20%-ى eGov mobile ارقىلى ۇسىنىلدى. ونىڭ مالىمەتىنە سايكەس 1 ملن-نان استام ازامات وسى ءموبيلدى قوسىمشانىڭ بەلسەندى پايدالانۋشىسى سانالادى.
«سوڭعى كەيستەردىڭ ءبىرى رەتىندە ىندەتكە قارسى ەكپە العان 250 مىڭنان استام ازاماتتىڭ ۆاكتسينالاۋ پاسپورتىن ايتۋعا بولادى. بۇدان باسقا, قازىر حالىققا قىزمەت كورسەتۋ ورتالىقتارىندا پويىز ارقىلى قاتىناۋ بارىسىندا تسيفرلى قۇجاتتار قابىلدانىپ جاتىر. جوعارىدا ايتىلعانداي, اۋە تاسىمالى بويىنشا قاناتقاقتى جوبا ىسكە قوسىلدى. وسى ارقىلى ماۋسىمدا 5 اۋەجاي مەن باسقا اۆياكومپانيالاردى قامتۋ كوزدەلىپ وتىر. Ashyq قوسىمشاسىنا توقتالساق, ونىڭ قاراماعىمىزعا وتۋىنە بايلانىستى قىزمەتتەردىڭ ءبىر بولىگى زاماناۋي مانەرگە اۋىستىرىلىپ, سەرۆەرلىك جابدىقتاۋ تەتىگى ەنگىزىلدى. بۇل باعىتتاعى جۇمىستى دەنساۋلىق ساقتاۋ مينيسترلىگى دە جۇرگىزىپ, ازاماتتاردىڭ پتر ناتيجەلەرى ۆەدومستۆونىڭ رۇقساتىمەن قوسىمشاعا جولدانىپ جاتىر», دەدى ر.كونياشكين.
كەزەك ماسەلەسىن شەشۋگە ۋادە ەتتى
تاعى ءبىر وزەكتى ماسەلە, مامانداندىرىلعان حالىققا قىزمەت كورسەتۋ ورتالىقتارىنداعى كەزەككە الدىن الا جازىلۋعا بايلانىستى. ويتكەنى ونسىز دا ۇزىن-سونار كەزەك تولاستامايتىن قىزمەت كورسەتۋ ورىندارىنا كىرۋدىڭ ءوزى مۇڭ. ال Ashyq ارقىلى كىرۋ بۇل كەزەكتى ودان سايىن ۇزارتىپ جىبەرە مە دەگەن قاۋىپ جوق ەمەس. ايتسە دە سالالىق مينيسترلىك بۇل ءتارتىپ وزگەرىسسىز قالاتىنىن, كەرىسىنشە ونىڭ وڭ تۇسى كوپ ەكەنىن جەتكىزدى.
«بۇل سەرۆيس 5-7 جىل بۇرىن ەنگىزىلىپ, وڭ ناتيجە بەردى جانە توقتاتىلمايدى. قىزمەت كورسەتۋ ورتالىعىنا كەلىپ, انىقتاما الۋعا, ءبىر مينۋتقا كەڭەس سۇراۋعا كەلەتىن ادامدار بار. ءار وتىنىشكە 15-30 مينۋت ۋاقىت بەلگىلەنەدى. ەگەر وسى 15-30 مينۋتتى بارلىق حالىققا قىزمەت كورسەتۋ ورتالىعىنا بولسەك, قازاقستاننىڭ بارلىق ازاماتىنىڭ سانىنا بايلانىستى تەرەزە مەن كەزەك بەرە المايمىز. سوندىقتان Ashyq-تى قولدانۋ ارقىلى وسى ماسەلەنى شەشۋدىڭ امالى قاراستىرىلۋدا», دەدى ب.مۋسين.
مينيستر ەلەكتروندى ۇكىمەتتى پايدالاناتىن رەزيدەنتتەر انىقتامالاردى داعدىلانعان فورماتتا الا بەرەتىنىن ايتتى.
تۋريستىك نىسانداردا بايلانىس قاشان ورناتىلادى؟
تاياۋدا ەلىمىزدىڭ ۇلتتىق پاركى مەن تۋريستىك ورىندارىندا بولعان قايعىلى جاعداي بايلانىسى ناشار جەرلەردە دابىل حابارلاماسىن جىبەرۋگە مۇمكىندىك بەرەتىن ارنايى قۇرىلعىلاردى ورناتۋدىڭ ۋاقىتى كەلگەنىن كورسەتتى. ۆەدومستۆو باسشىسىنىڭ ايتۋىنشا, مۇنداي قۇرىلعىلاردى ورناتۋدىڭ ەش قيىندىعى جوق. ماسەلەنىڭ بارلىعى قاراجات بولۋگە تىرەلىپ تۇر.
«ۇلتتىق پاركتەردە جانە تۋريستىك جولداردا ۇيالى بايلانىس سيگنالىن تاراتۋ ءۇشىن بازالىق ستانسالار قاجەت. بۇل ءۇشىن انتەننالى-ماچتالىق قوندىرعىلار ورناتىلۋى ءتيىس. ونى ورناتۋ اسا قيىن ەمەس. تەك سوناۋ شالعاي جەرگە ەنەرگەتيكانى تارتۋ وڭاي شارۋا ەمەس. سوندىقتان بۇل ماسەلەگە بايلانىستى ءتيىستى ەسەپتەۋلەر جاسالىپ, ۇكىمەتكە بۇعان قانشا قاراجات قاجەت ەكەنىن جەتكىزەمىز. وسىدان كەيىن سالاعا جاۋاپتى ۆەدومستۆو وسىعان قاجەتتى اقشانى تارتۋدىڭ كوزىن قاراستىرادى. تۇسىنەسىز بە, بايلانىس وپەراتورلارىنا دالالى ايماقتارعا, تاۋلى جەرلەرگە سىم تارتۋ ادام ويلاعانداي وڭاي ەمەس. ءبىز ءالى 1200 اۋىلدى 4G جانە تاعى باسقا بايلانىس جەلىلەرىمەن قامتىپ ۇلگەرە الماي جاتىرمىز. سوندىقتان تۋريستىك ورىنداردا بايلانىس نۇكتەلەرى بولۋى ءۇشىن ۋاكىلەتتى ورگان ناقتى قاراجات ءبولۋى كەرەك. قازىر مادەنيەت جانە سپورت مينيسترلىگىمەن بىرلەسىپ, بۇل ماسەلەنى شەشۋ ءۇشىن قاراجات تارتۋ جاعى پىسىقتالىپ جاتىر», دەدى مينيستر.
تسيفرلىق دامۋ مينيسترلىگىنىڭ اقپاراتىنا سايكەس ءبىر ايدىڭ ىشىندە سالالىق ۆەدومستۆودان وتىنىمدەر قابىلدانىپ, ءتيىستى نۇكتەلەر تاڭدالادى.
