شاۆقات 1994 جىلى وزبەكستاننىڭ سۋرحانداريا وبلىسىندا جارىق دۇنيە ەسىگىن اشتى. 16 جاسىندا اتا-اناسىمەن بىرگە قازاقستانعا كوشىپ كەلىپ, قاراعاندى قالاسىنا قونىستاندى. كۇنكورىس قامىمەن جاستايىنان قارا جۇمىسقا ارالاسقان ول جەرگىلىكتى بازارلاردىڭ بىرىندە جۇك تاسۋشى بولىپ تا ەڭبەك ەتتى. سونىمەن قاتار بوس ۋاقىتىندا سپورتپەن شۇعىلدانىپ, جەكپە-جەك ونەرىنىڭ سان ءتۇرىن جەتىك مەڭگەردى. اۋەلدە اۋەسقويلار سايىسىندا باق سىناپ, ءتۇرلى جارىستاردا مول ولجاعا كەنەلدى. سولاردىڭ اراسىنداعى راحمونوۆتىڭ ەڭ ءىرى تابىسى – مما-دان 2013 جىلى الەم چەمپيونى اتانۋى.
كاسىپقويلار اراسىندا ءوزىنىڭ تۇساۋكەسەر كەزدەسۋىن شاۆقات 2014 جىلدىڭ قازان ايىندا وتكىزىپ, رەسەيلىك ادام تسۋروۆتى قىلقىندىرىپ تاستادى. سول كەزدەن بەرى 13 رەت ايقاس الاڭىنا شىققان قانداسىمىز بارلىق باسەكەنى ءوز پايداسىنا شەشتى. ءبىر كەرەمەتى, سول جەكپە-جەكتەردى ول تۇگەلدەي مەرزىمىنەن بۇرىن اياقتادى. تارقاتىپ ايتساق, راحمونوۆ پولشالىق بارتوش حىرەك پەن ميحال ۆينتسەك, قىرعىزستاندىق رينات ساياكباەۆ, برازيليالىقتار ماركۋس ۆينيشيۋس, مارسەلو بريتو جانە تياگو ۆارەجاو لاسەرەدونى ءبىرىنشى راۋندتا-اق تاس-تالقان ەتىپ جەڭدى. ءوزىنىڭ وتانداسى ءادىل بورانباەۆ, كورەيالىق يۋن يون پاك جانە رەسەيلىك يۆان سولودوۆنيك پەن دانيلا پريكازانى ەكىنشى كەزەڭدە ويسىراتا ۇتتى. تەك تاجىكستاندىق فاريدۋن وديلوۆ قانا بىرازعا دەيىن شىدادى. بىراق قازاق سپورتشىسى ونىڭ دا وسال جەرىن تاپتى. شاۆقاتتىڭ اۋىر سوققىلارىنا شىداي الماعان فاريۋدين ءۇشىنشى راۋندتىڭ بەل ورتاسىندا ءوزىنىڭ جەڭىلگەنىن مويىندادى.
2019 جىلدىڭ 30 مامىرىندا الماتىدا وتكەن جارىستا شاۆقات راحمونوۆ دانيلا پريكازانى جىعىپ الىپ, اۋىر سوققىلارىن قارشا بوراتتى. رەسەيلىك سپورتشىنىڭ قورعانۋعا شاماسى كەلمەدى. ونىڭ شاراسىز كۇيىن كورگەن تورەشى سول مەزەتتە باسەكەنى توقتاتۋعا ءماجبۇر بولدى. وسى جەڭىستىڭ ارقاسىندا قازاقتىڭ ۇلى م-1 Global نۇسقاسى بويىنشا التىن بەلبەۋدى يەلەندى. ارادا ءبىر اي وتپەي جاتىپ ول تياگو ۆارەجاو لاسەرەدومەن كۇش سىناستى. بۇل جەكپە-جەك ءبىرىنشى راۋندتا اياقتالدى. قارسىلاسىن ەسىنەن تاندىرعان جەڭىسىنىڭ ناتيجەسىندە راحمونوۆ چەمپيوندىق اتاعىن ساقتاپ قالدى.
قارسى كەلگەندەردىڭ بارلىعىن قوعاداي جاپىرعان جىگىت كوپ ۇزاماي UFس-دەگى مايتالمان مامانداردىڭ قىراعى نازارىنا ىلىكتى. 2019 جىلدىڭ شىلدە ايىندا شاۆقات ارالاس جەكپە-جەك الەمىندەگى ەڭ بەلدى ۇيىممەن كەلىسىمشارتقا وتىردى. وسىلايشا, ايگىلى پروموۋشەندە ونەر كورسەتۋ مۇمكىندىگىنە يە بولعان قازاقستاننىڭ تۇڭعىش سپورتشىسى رەتىندە ونىڭ ەسىمى تاريحتا قالدى.
جەر-جاھاندى جايلاعان كوروناۆيرۋس ىندەتىنە بايلانىستى شاۆقات راحمونوۆتىڭ UFس-دەگى تۇساۋكەسەر كەزدەسۋى بىرنەشە مارتە كەيىنگە شەگەرىلدى. قازاقستاندىق جانكۇيەرلەر سول ءساتتى تاعاتسىزدانا كۇتتى. اقىرى ول بىلتىرعى جىلدىڭ 24 قازانىندا العاش رەت وكتاگونعا شىقتى. 26 جاستاعى جەرلەسىمىزدىڭ ءابۋ-دابيدەگى قارسىلاسى الەكس وليۆەيرا ەدى. 33 جاستاعى برازي-
ليانىڭ ساقا سپورتشىسى سول كەزگە دەيىن 30-دان اسا جەكپە-جەك وتكىزىپ, سونىڭ باسىم بولىگىن ءوز پايداسىنا شەشتى. بىراق ول دا قازاقتىڭ قارۋلى جىگىتىنە جارىتىپ قارسىلىق كورسەتە المادى. ءبىرىنشى راۋندتىڭ اياقتالاۋىنا 20 سەكۋند قالعاندا راحمونوۆ وليۆەيرانى «قىلقىندىرۋ» ادىسىمەن تىرپ ەتكىزبەي ۇتتى. تەمىر قۇرساۋدان قۇتىلا المايتىنىنا انىق كوزى جەتكەن برازيليالىق كوكجالدىڭ جەر توقپاقتاۋدان باسقا امالى قالمادى.
الەمدەگى ەڭ بەلدى پروموۋشەندەگى ءوزىنىڭ ەكىنشى كەزدەسۋىن شاۆقات ميشەل پرازەرەسكە قارسى وتكىزەتىنىن ءبىز جوعارىدا ايتتىق. جاسى 40-قا تاياپ قالعان برازيليانىڭ بەلەن قالاسىنىڭ تۋماسى 2000 جىلدان بەرى وسى سپورت ءتۇرىن سەرىك ەتۋدە. «كوۆبوي» دەگەن لاقاپ اتپەن تانىمال ميشەلدىڭ دجيۋ-دجيتسۋدان قارا بەلبەۋى بار. العاشقى 13 جىلدا 16 مارتە وكتاگونعا شىققان ول بارلىق باسەكەدە باسىمدىق تانىتتى. سول كەزدەرى پرازەرەسكە UFC-تەن ۇسىنىس ءتۇستى.
بەلدى ۇيىمنىڭ تۋى استىندا وتكەن جارىستاردا دا پرازەرەس ءوزىن جاقسى قىرىنان كورسەتتى. وسى كۇنگە دەيىن بارلىعى 29 مارتە جەكپە-جەككە شىققان برازيليالىق 26 رەت باسىمدىق تانىتتى. 12 كەزدەسۋىن مەرزىمىنەن بۇرىن اياقتادى. ءار جىلى ول فرەدريك سامۋراي, دجەسسي رونسون, مايربەك تايسۋموۆ, گيلبەرت بەرنس, رەسموند گرين, زاك كاممينگس سىندى ساڭلاقتاردى سان سوقتىردى. سپورتتىق كارەراسىندا وڭتۇستىك امەريكانىڭ وعلانى تەك ءۇش رەت ۇپاي سانىمەن ۇتىلدى. ميشەل ءوزىنىڭ وتانداسى پاۋلۋ تياگۋ, امەريكالىق كەۆين لي جانە اۋستريالىق يسمايل ناۋرديەۆكە عانا ەسە جىبەردى.
ەستەرىڭىزگە سالا كەتەيىك, 26 ماۋسىمدا اقش-تىڭ لاس-ۆەگاس قالاسىندا وتەتىن جارىستىڭ باستى باسەكەسىندە اسا اۋىر سالماقتاعى رەسەيلىك الەكساندر ۆولكوۆ پەن فرانتسيالىق سيريل گانا ايقاسادى. بويى 2 مەتردەن اساتىن 32 جاستاعى ورىس الىبى كۇنى بۇگىنگە دەيىن 41 كەزدەسۋ وتكىزىپ, 33 رەت جەڭىس تويىن تويلادى. 31 جاستاعى سيريل گاننىڭ بويى 195 سانتيمەتر. ول كاسىپقويلار اراسىندا 2018 جىلدان بەرى ونەر كورسەتۋدە. سول كەزدەن بەرى سەگىز رەت وكتاگونعا شىققان فرانتسيانىڭ وكىلى بىردە-ءبىر رەت جەڭىلىستىڭ كەرمەك ءدامىن تاتقان ەمەس.
