كەلىسسوز بارىسىندا قاسىم-جومارت توقاەۆ پەن نۇر-سۇلتان قالاسىنا جۇمىس ساپارىمەن كەلگەن ارمەن ساركيسيان ساياسي ديالوگتى, ساۋدا-ەكونوميكالىق جانە مادەني-گۋمانيتارلىق بايلانىستاردى نىعايتۋعا باسا ءمان بەرە وتىرىپ, قازاق-ارميان ىنتىماقتاستىعىن دامىتۋ ماسەلەلەرىن تالقىلادى. سونىمەن قاتار پرەزيدەنتتەر ەۋرازيالىق ەكونوميكالىق وداق, ۇقشۇ جانە باسقا دا حالىقارالىق قۇرىلىمدار اياسىنداعى ىقپالداستىقتىڭ پەرسپەكتيۆالارىن قاراستىرىپ, جاھاندىق جانە وڭىرلىك كۇن تارتىبىندەگى ماسەلەلەر بويىنشا پىكىر الماستى.
مەملەكەت باسشىسى ەكىجاقتى ىنتىماقتاستىققا تىڭ سەرپىن بەرۋ تۇرعىسىنان ارمەنيا پرەزيدەنتىنىڭ وسى ساپارىنىڭ ماڭىزدى ەكەنىن اتاپ ءوتتى.
– ارمەنيا – بىزگە دوستاس مەملەكەت. ەلدەرىمىز اراسىنداعى ءوزارا قارىم-قاتىناستار ەجەلدەن كەلە جاتقان داستۇرلەرگە نەگىزدەلەدى. ارينە, ءبىز ىقپالداستىعىمىزدىڭ ءبىر ورنىندا تۇرىپ قالماي, جاڭا مازمۇنمەن تولىعا وتىرىپ دامۋىنا مۇددەلىمىز. سوندىقتان ەلدەرىمىزدىڭ ۇكىمەتتەرى مەن ناقتى سالالىق ۆەدومستۆولارى وسى ماقساتقا قول جەتكىزۋ ءۇشىن جۇمىس ىستەپ جاتىر, – دەدى قاسىم-جومارت توقاەۆ.
قازاقستان پرەزيدەنتى ءتۇرلى سالالار بويىنشا قارىم-قاتىناستاردى نىعايتۋ ءۇشىن مول مۇمكىندىكتەر بار ەكەنىن اتاپ ءوتىپ, ارمەنيانىڭ ۇكىمەتتىك دەلەگاتسياسىنىڭ جۋىردا قازاقستانعا جاساعان ساپارىنىڭ قورىتىندىلارىن وڭ باعالادى.
سونىمەن قاتار مەملەكەت باسشىسى ەاەو, ۇقشۇ, تمد, بۇۇ جانە ەقىۇ اياسىنداعى ەكىجاقتى ىقپالداستىقتىڭ جاقسى قارقىنمەن جالعاسا بەرەتىنىنە سەنىم ءبىلدىردى.
ارمەن ساركيسيان ءوز كەزەگىندە قازاقستانعا جۇمىس ساپارىمەن كەلۋگە مۇمكىندىك جاساعانى ءۇشىن قاسىم-جومارت توقاەۆقا العىس ايتتى.
– مەن ءۇشىن قازاقستانعا كەلۋ – بەلگىلى ءبىر ماعىنادا ءوز ۇيىمە, دوستارىما كەلگەنمەن بىردەي. ءوزىڭىز ايتقانداي, ءبىزدىڭ حالىقتارىمىز اراسىنداعى قارىم-قاتىناستار وتە جاقسى جانە ونىڭ تاريحي تامىرى تەرەڭدە, – دەدى ارمەنيا پرەزيدەنتى.
ارمەن ساركيسيان قاسىم-جومارت توقاەۆتىڭ نۇر-سۋلتان مەن ەرەۆان اراسىنداعى بايلانىستاردى ودان ءارى كەڭەيتۋدىڭ الەۋەتى زور دەگەن پىكىرىمەن كەلىستى. وسى رەتتە ول ساۋدا, ءبىلىم بەرۋ, جاڭا تەحنولوگيالار, تاماق ونىمدەرىن قايتا وڭدەۋ سالالارى بويىنشا جاسالىپ جاتقان قولايلى شارتتارعا نازار اۋدارىپ, اتالعان ىنتىماقتاستىقتىڭ مازمۇنىن بايىتىپ, كەڭەيتە بەرۋگە نيەتتى ەكەنىن جەتكىزدى.
