قىزىلجار اۋداندىق سانيتاريالىق-ەپيدەميولوگيالىق باقىلاۋ باسقارماسىنا اۋداندىق اۋرۋحانادان 105 جەدەل حابارلاما تۇسكەن. دارىگەرلەر ەمدەۋ مەكەمەسىنە بەسكول اۋىلى تۇرعىندارىنىڭ قۇسىپ, ىستىعى كوتەرىلىپ, ءىشى ءوتىپ (ديارەيا) كەلىپ جاتقانىن ايتقان. مەديتسينا قىزمەتكەرلەرى سىرقاتتارعا «ەنتەروۆيرۋستى ينفەكتسيا» دياگنوزىن قويدى.
«قازىرگى ۋاقىتتا سانيتاريالىق-ەپيدەميولوگيالىق قىزمەت ەپيدەمياعا قارسى جانە الدىن الۋ ءىس-شارالارىن جۇرگىزىپ جاتىر. اۋىرعانداردىڭ ۇيىنەن جانە ەسىل وزەنى قۇياتىن كولدەن سۋدىڭ سىناماسى الىنىپ, سانيتاريا-حيميالىق, باكتەريولوگيالىق جانە ۆيرۋسولوگيالىق كورسەتكىشتەرگە تەكسەرىلدى.
ناتيجەسىندە ۇيلەردەن الىنعان 6 سىناما باكتەريولوگيالىق كورسەتكىشتەر بويىنشا وڭ ناتيجە كورسەتتى. ياعني اۋىز سۋ لاستانعان. قوسىمشا ساراپتاما تاعايىندالدى», دەيدى قىزىلجار اۋدانىنىڭ باس مەملەكەتتىك سانيتار دارىگەرى جانگەلدى يبراەۆ.
3 ماۋسىمداعى مالىمەت بويىنشا, قازىر ەمدەۋ مەكەمەلەرىنە 18 ادام جاتقىزىلعان. ونىڭ بىرەۋى عانا – ەرەسەك. جاعدايلارى قالىپتى. ەم-دوم قابىلداپ جاتىر.
«جاعداي دۇرىستالعانعا دەيىن كراننان سۋ ىشپەۋگە كەڭەس بەرەمىز. اس-سۋعا تەك قانا قايناتىپ قولدانۋعا بولادى. ىشۋگە بوتەلكەدەگى تازا سۋدى پايدالانۋ كەرەك. سونداي-اق ازىرگە اشىق سۋ قويمالارىندا سۋعا شومىلماۋ قاجەتتىگىن ەسكەرتەمىز», دەيدى جانگەلدى يبراەۆ.
ەسكە سالا كەتسەك, سولتۇستىك قازاقستاندا جاپپاي ءبىر اۋىل ۋلانىپ, اۋرۋحاناعا تۇسكەن ەدى.
