دەنيس تەننىڭ ءولىمى: بوستاندىققا شىققان جانار تولىباەۆا قايتا قامالدى

2021 جىلدىڭ باسىندا تولىباەۆانى ناقتى مەرزىمدى باس بوستاندىعىن شەكتەۋگە اۋىستىرا وتىرىپ, ۇكىمىن جەڭىلدەتكەن. جانار تولىباەۆانىڭ ايتۋىنشا, ونى كولونيادان شىعارعان اۋداندىق سوت جابىرلەنۋشى تاراپقا ونىڭ ءوتىنىشى تۋرالى حابارلاماعان. ول بوستاندىققا شىققاننان كەيىن دەنيس تەننىڭ تۋىستارى شاعىم ءتۇسىرىپ, 2021 جىلدىڭ ساۋىرىندە سوت شەشىمىمەن جانار تولىباەۆا قايتادان تۇرمەگە جابىلدى.

زاڭعا سايكەس اۋىر قىلمىس ءۇشىن سوتتالعان كەز كەلگەن ازامات جازا مەرزىمىنىڭ 1/3 بولىگىن وتەگەننەن كەيىن قالعان بولىگىن جازانىڭ ەداۋىر جەڭىل تۇرىنە اۋىستىرۋ تۋرالى سوتقا ءوتىنىش بىلدىرە الادى. 2019 جىلدىڭ جەلتوقسانىندا تولىباەۆا وسى قۇقىعىن پايدالانعان. وسىلايشا 2020 جىلى جازاسىن باس بوستاندىعىن شەكتەۋگە اۋىستىردى.

الايدا اراعا ءبىر جىل ءۇش اي سالىپ ونى قايتادان تۇرمەگە قامادى.

ول قازىر بالاسىمەن بىرگە الماتى وبلىسى جاۋعاشتى اۋىلىنداعى لا-155/4 تۇزەتۋ مەكەمەسىندە جازاسىن وتەپ جاتىر.

ايتا كەتەيىك, قازاقستاندىق مانەرلەپ سىرعاناۋشى دەنيس تەن 2018 جىلدىڭ 19 شىلدەسىندە ۇرىلار قولىنان قازا تاپتى. سوت 2019 جىلدىڭ باسىندا دەنيس تەننىڭ ولىمىنە قاتىستى سوتتالعاندارعا ۇكىم شىعاردى.

ارمان قۇدايبەرگەنوۆ قىلمىستىق كودەكستىڭ 188-بابى «ۇرلىق», 192-بابى «قاراقشىلىق» جانە 99-بابى «ادام ءولتىرۋ» بويىنشا ايىپتى دەپ تانىلىپ, 18 جىلعا سوتتالدى. ال نۇرالى قياسوۆقا «ادام ءولتىرۋ» جانە «قاراقشىلىق» باپتارى بويىنشا 18 جىلعا باس بوستاندىعىنان ايىرۋ جازاسى كەسىلدى. جانار تولىباەۆا 434-باپ «قىلمىس تۋرالى حابارلاماۋ» بويىنشا كىنالى دەپ تانىلدى. ول 4 جىلعا باس بوستاندىعىنان ايىرىلدى. ءىس بارىسىندا ونىڭ جۇكتى ەكەنى بەلگىلى بولدى.