بۇگىندە ايماقتا كۇن سايىن 2,5 مىڭنان استام وقۋشى مەكتەپكە اۆتوبۋسپەن بارىپ-كەلىپ وقيدى. بىلتىر وبلىس بيۋدجەتىنەن بولىنگەن
200 ملن تەڭگەگە 13 اۆتوبۋس ساتىپ الىنىپ, اۋىل مەكتەپتەرىنىڭ يگىلىگىنە بەرىلگەن ەدى.
– بيىل بالالاردى مەكتەپكە تاسىمالداۋدىڭ قاۋىپسىز ءارى جايلى بولۋىن قامتاماسىز ەتۋ ماقساتىندا تاعى 17 جاڭا اۆتوبۋس ساتىپ الىپ وتىرمىز. Nur Otan پارتياسىنىڭ «وزگەرىس جولى: اركىمگە لايىقتى ءومىر!» سايلاۋالدى باعدارلاماسىن ىسكە اسىرۋ بارىسىندا 2025 جىلعا دەيىن 407 اۋىل مەكتەبىن جاڭعىرتۋ جوسپارلانعان, 82 مەكتەپتى جوندەۋ جۇمىستارى بيىلدان باستاپ قولعا الىناتىن بولادى. مۇنىڭ سىرتىندا, وڭىردە 7 جاڭا مەكتەپ سالۋدى جوسپارلاپ وتىرمىز. بۇل باعىتتاعى جۇمىستار باستالىپ تا كەتتى. قوستانايداعى «بەرەكە» جانە «قوناي» شاعىن اۋداندارىندا ەكى مەكتەپ, جىتىقارا قالاسىندا ءبىر مەكتەپ, قارابالىق اۋدانىندا ەكى مەكتەپ جانە قوستاناي, اۋليەكول اۋداندارىندا ءبىر-بىردەن جاڭا مەكتەپ سالىناتىن بولادى. بيىل 46 ءبىلىم مەكەمەسىنە 3,6 ملرد تەڭگەگە جوندەۋ جۇمىستارىن جۇرگىزۋ كوزدەلىپ وتىر. 10 ءبىلىم مەكەمەسى كۇردەلى جوندەۋدەن وتەتىن بولادى, – دەدى ايماق باسشىسى.
وبلىس ورتالىعىنان شالعاي جاتقان قامىستى اۋدانىنا قاراستى جايىلما, قامىستى جانە التىنسارين ورتا مەكتەپتەرىندەگى ينتەرناتتاردا جاتىپ وقيتىن بالالار سول ماڭايداعى مەكتەبى جوق اۋىلداردان كەلەدى. وبلىس اكىمىنىڭ قولىنان 22 ورىندىق اۆتوبۋستىڭ كىلتىن العان اۋداندىق ءبىلىم ءبولىمىنىڭ باسشىسى تالعات قۋانىشباەۆ جاڭا كولىكتى التىنسارين ورتا مەكتەبىنىڭ جانىنداعى ينتەرناتقا تاپسىراتىنىن ايتتى.
– الداعى جاڭا وقۋ جىلى التىنسارين اۋىلىنىڭ ماڭايىنداعى شاعىن ەلدى مەكەندەردە تۇراتىن بالالار ينتەرناتتا جاتىپ ءبىلىم الاتىن بولادى. 70 شاقىرىم جەردەگى ارالكول اۋىلىنان 15 بالا, مامىركولدەن بىرنەشە وقۋشى بار. ولاردى مەكتەپكە وسى اۆتوبۋسپەن تاسيتىن بولامىز, – دەدى ءبىلىم ءبولىمىنىڭ باسشىسى.
