شاعىن گرانتتار كونكۋرسىنىڭ قورىتىندىسى بويىنشا ەلىمىزدىڭ 20 ۇەۇ الەۋمەتتىك-كاسىپكەرلىك يدەيالاردى ىسكە اسىرۋعا 500 مىڭ تەڭگەدەن گرانتتار ۇتىپ الدى.
كونكۋرس جەڭىمپازدارىنىڭ ءبىرى – اقمولا وبلىسىنىڭ اتباسار قالاسىنان قاتىسقان «انگەل» قوعامدىق بىرلەستىگى. ولار ء«بىز ەكوسومكەلەر تىگەمىز» جوباسىن ىسكە اسىراتىن بولادى.
ء«بىزدىڭ قىزمەت باعىتتارىمىزدىڭ ءبىرى – ەكولوگيا. بىرنەشە جىل بويى ءبىز اتباسار قالاسىندا ەكولوگيالىق ۆولونتەرلىك قوزعالىسىن دامىتا وتىرىپ, وقۋشىلار مەن جاستاردى جۇمىسقا تارتتىق. وسىلايشا, پوليەتيلەن پاكەتتەردەن باس تارتۋ بويىنشا بەلسەندى ناۋقان جۇرگىزىپ كەلەمىز», دەيدى «انگەل» قوعامدىق بىرلەستىگىنىڭ وكىلدەرى.
ۇكىمەتتىك ەمەس ۇيىمدار 20 جىلدان استام ۋاقىت جۇمىس ىستەپ كەلەدى. ولاردىڭ قاتىسۋىمەن كوپتەگەن الەۋمەتتىك جوبا ىسكە اسىرىلدى, جەرگىلىكتى قوعامداستىقتىڭ بىرقاتار پروبلەماسى شەشىلدى. بىراق ۇەۇ قىزمەتىنىڭ تۇراقتىلىعى تەك جوبالاردىڭ بولۋىنا جانە ۇيىم مۇشەلەرىنىڭ ۇلەسىنە عانا ەمەس, سونىمەن قاتار تۇراقتى قارجىلاندىرۋعا دا بايلانىستى. سوندىقتان ۇيىم ءوز بازاسىندا الەۋمەتتىك كاسىپورىندى دامىتۋ تۋرالى ويلانا باستادى.
اتباسارلىق قوعامدىق ۇيىمدار وكىلدەرىنىڭ ايتۋىنشا, مۇندا ونەركاسىپ جوق, جۇمىسسىزدىق دەڭگەيى جوعارى. دەسە دە كەنتتە كوللەدج بار, وندا قىزداردى شاشتاراز, اسپاز, تىگىنشى ماماندىقتارىنا وقىتادى. الايدا قولىندا ديپلومى بار قىزداردىڭ كوپشىلىگى جۇمىسسىزدار قاتارىن تولتىرۋدا. ويتكەنى باستاپقى كاپيتالسىز ءوز بيزنەسىن باستاۋ جانە تاجىريبە جيناۋ قيىن, ال تاجىريبەسىز كليەنتتىك بازانى جيناۋ جانە تابىستى بولۋ وڭاي ەمەس.
الەۋمەتتىك-كاسىپكەرلىك باستامالاردى ىسكە اسىرۋ شەڭبەرىندە ۇيىمداستىرۋشىلار قىزدارعا تىگىن تاجىريبەسىن الۋدى جانە وندىرىستىك پراكتيكا شەڭبەرىندە ەكوسومكەلەردى تىگۋ بويىنشا تىگىن شەبەرحاناسىندا تابىس تابۋدى ۇسىنادى, وندا كاسىپتىك باعدار بەرۋدەن باسقا, كوشباسشىلىق قاسيەتتەردى دامىتۋعا كوڭىل بولىنەدى. ال ەكوسومكەلەردى تىگۋ ارقىلى جوبا تاعى ءبىر ماڭىزدى مىندەت – پوليەتيلەن پاكەتتەردى قولدانىستان ازايتۋ ارقىلى قورشاعان ورتانىڭ لاستانۋىن ازايتۋعا ۇلەس قوسۋ بولماق.
«ەگەمەن-اقپارات»
